←  Ezekiel (23/48)  →
1. LALPA thu chu ka kuomah a hung tlung a.
2. "Mihriem naupa, nuhmei pahni an um a, nu hmunkhat an nih.
3. An tleirawla inthokin Aigupta ramah an inzor a, chu taka chun an nene tlaipekin, an tleirawl tang nem chu an chulpek a.
4. A upa lem hming chu Ohola na, a sangnu hming chu Oholiba a nih. An pahni chun nuhmeiin ka nei a, naupa le naunuhai an mi neipek a. Ohola chu Samaria inentirna a na, Oholiba chu Jerusalem inentirna a nih.
5. "Ohola chu ka nuhmei a ni lai zingin a hur hmang a, mi ralhrat Asuria-hai chu huorin a hnot a.
6. Anni chu zakuo dumpawla inthuom, mi lien le mi lal, tlangval hmeltha thlang khawm, sakor chungchuong mi vong an nih.
7. Chuong mi lienhai lai chun inphalraiin, a hurpui taphot milem biek chu be ve peiin a'n sukporche a.
8. A tleirawl lai Aiguptaah inzor a, mihan zalpui a, a tleirawl tang vum chul a, an chakna an hrikthlak hlak lai nun kha a bansan ngai nawh.
9. Chuleiin, a ngaizawng le a hurpui Asuriahai kutah ka pek tah a nih.
10. Anni chun kawlhnamin an that a, saruokin an maksan a, a naupahai le naunuhai an lakpek a. A thil tuor chu nuhmeihai lai inthina takin an hung hmang tah hiel a nih.
11. A sangnu Oholiba chun chu chu a hmu vong a, hur tieng le inzor a chakna tieng chu a unu nek daiin a zuolkai lem a.
12. Tlangval chakum tak tak vong Asuria mihai, a then ram optu dam, kawmandar dam, raldo mi thuom famkima inthuom dam le sakor chungchuong mihai chu a hnot a.
13. Ama khom chu a'n sukporche ve a, an pahni chun lampui thuhmun an hraw a.
14. A hurna chu a hung zuol tul tul a. Kaldai ruol lim, sen vuta an ziek, banga intar chu a hmu a.
15. Chuonghai chun kawngchun an chun a, lukawm mawi tak an kawm bur a, hang en khoma hotu ni awm hlie hlie an ni a, Kaldai rama Babulon mi sakor tawlailir khaltuhai lim a nih.
16. Anni a hang hmu chun a chak huom huom a, Kaldai ram chenin palai bawngte a tir a.
17. Chuongchun, Babulon mihai chu an hung a, an hung zalpui a, an sukporche a. Dit tawka an sukporche hnung chun anni chu nghokin a zamsan a.
18. Chuonga uolau taka inzor le inhlim a thaw lei chun a u ka nghatsan ang bokin beidongin ka nghatsan a.
19. Sienkhom, a tleirawl laia Aigupta rama a'n zor lai kha hre zingin a'n phalrai deu deu si.
20. Chuong laia a hurpuihai chu sabengtung ser ang ser nei, sakor che zat zet che suok thei an nih.
21. Chuleiin, i tleirawl hur vanglai, Aigupta mihaiin i nene tlai a, i tang vum an chul hrep lai hun kha i ngai vong vong hlak a ni hih.
22. "Chuleiin, aw Oholiba, hieng hin LALPAN a tih: Ngai rawh, ngaizawng i lo umpui tah le hnam em ema i the tahai po po kha nangma khingtu dingin kil tina inthokin ka hung tir tawl ding a nih.
23. Babulon mihai le Kaldai mihai po po, Pekod mihai, Soa mihai, Koa mihai, Asuria mi po po, tlangval hmel tha tak tak, a then ram optu dam, kawmandar dam, sakor tawlailir neitu dam, mi hmingthang dam, an renga sakor chungchuong mi vong chu hung an tih.
24. Anni chun hriemhrei chawiin, indona tawlailir hai, thil phurtu tawlailir hai le mipui tam tak thuoiin hung bei an ti che a, phaw chin le phaw lien chawiin, dar lukhum khumin sir tinah hung inhuol an ti che. An nuom dan ang anga i chungthu rel le hrem ding chein an kutah ka pek suok ta che a nih.
25. Ka thikthu lungsen inling lai ang elin lungsen takin bei an ti che a, i hnar le i nakawrhai at thlang an ta, a la dam sunhai chu kawlhnamin that an tih. I naunuhai le naupahai chu man an ta, an man bang po chu meiin raw hlum an tih.
26. I silfenhai hlippek vong an ti che a, i belmawi tha tak takhai khom lakpek an ti che.
27. Chuong ang chun Aiguptaa inthoka i ching tan hurna le nawchizorna chu suktawp ka ta, chuong tieng pang chu ngaiin mit inlen ta naw ti ni a, Aigupta khom hre fu zing ta naw ti nih.
28. "Lalpa PATHIEN chun hieng hin a tih: 'Ngai rawh, i theida, ngei em ema i nghatsanhai kuta khan ka pek suok ding che a nih.
29. Theida takin soisak an ti che a, inrim taka i thaw rahai po po lakpek vong an ti che. Saruok inkhumna nei loin maksan an ti che a, i nawchizorna chu muolpho taka tar langin um a tih.
30. Hnam danghai hnota an milemhaia i'n sukporche leiin, i zauthauna le inphalraina chun hieng thil hi i chungah a hung intlun a nih.
31. I u anga i khawsak ve pei leiin tuorna no chu i kutah indomtir veng ka ti che.
32. "Lalpa PATHIEN chun hieng hin a tih:I zuorpui no tung, sip luou chu,Nang khomin dawn veng i tih;Nuisaw le cheksolin um i tih,A keng rawn nasa hle si a!
33. Inruina le lungngainaa sip,I zuorpui Samaria no chu,Sietna le rauna no a ni si a!
34. Kang rawtin dawn vong i ta, A no chu deng koi i ta,I tang bawr huot thler i tih'ti hi kei, Lalpa PATHIEN hin ka puong a nih.
35. "Chuleiin, Lalpa PATHIEN chun hieng hin a tih: Mi theinghil a, i mi hnungson tah leiin, i hurna le nawchizorna maw chu nangin phur i tih" tiin.
36. LALPA chun ka kuomah hieng hin a hril nawk a. "Mihriem naupa, Ohola le Oholiba chungthu chu i rel naw ding am a ni? An thil ching tirdakum leh hmason rawh.
37. Inzorin an uire a, an kutah thisen a kai hnuong a nih. Milem an biek a, ka ta dinga an mi hringpek nauhai chu an that a, an milemhai kuomah kang hmang dingin meiah an inhlan a nih.
38. Hi thil chauh hi ka chungah an thaw le! Ka hmun thienghlim an sukporche a, ka chawlnihai an bawsiet a.
39. Milem hmaa an nauhai an inhlan ni la lain, chu ni ngei chun ka Hmun Thienghlimah an hung a, ka in an hung sukporche hlak.
40. "Chuong naw khom chu, hla taka inthokin pasal an incha a, mi an tir a, an hung tlung chun anni epna dingin an insil fai a, an mit an nal a, belmawi tha tha an inbel a.
41. Thungna nemah lo inthungin, an hmaa dawkan lien tak chunga chun ka rimtui le ka hriekhai chu an lo zar a.
42. An bula chun nuomtawl inhawr khawm ri a so a. Chuonghai chu thlalera inthoka an fiel khawm, mi hur le zu rui ruol an nih. Nuhmei le a sangnu chu banbun an inbuntir a, lukhim mawi tak an inkhimtir a.
43. Chun, nawchi zorna leia chul zo tah nuhmei chungthu chu hrilin, 'Hieng anga tar ta hnung nawchizor dam an zalpui nuom phot leh, zalpui ta raw hai se chu' ka ta.
44. Chu char chu an thaw hrim a, nawchizor Ohola le Oholiba chu an zalpui a.
45. Nisienlakhom, mi felhai ruok chun uire le thisen insuo chingah ngai an ta, thiem naw inchangtir ngei an tih; uire hmang an ni hrim a, an kutah thisen a kai rawn a nih.
46. 'Lalpa PATHIEN chun hieng hin a tih: Nangni beitu dingin mipui hung ko khawm ka ta, in roktir ka ti cheu a, soisak hrep an ti cheu.
47. Mipuiin lungin deng an ti cheu a, kawlhnamin sat bong an ti cheu a, in naunuhai le naupahai khom that an ta, in in pumin raw hmang an tih.
48. Chuong ang chun hurherna chu a rama inthokin sukbo ka tih, nuhmei po poin entona hmang tlak in ni nawzie an hriet theina dingin.
49. Nangni unau hin in inphalraina maw chu tuor in ta, milem in biekna leia in suolna maw khom chu phur in tih. Chu pha chun Lalpa PATHIEN chu ka nih ti hung hre tang in tih' tiin" a ta.
←  Ezekiel (23/48)  →