←  Ezekiel (22/48)  →
1. LALPA thu chu ka kuomah a hung tlung a.
2. "Mihriem naupa, thisen insuo hmang khawpui chungthu hi i hril naw ding am a ni? A tirdakumna po po chu hmaisanah hril rawh.
3. A kuomah, 'Lalpa PATHIEN chun hieng hin a tih: Aw khawpui, mani chunga sietna intlun dinga mani sunga thisen insuotu le milemhai siema insukporchetu,
4. thisen insuoa thiemnaw i phur lei le milemhai siema i'n sukporche leiin, i tawpna hun ding i kei hnai a, i tawpna kum a tlung mek a, hnam danghai cheksol le ram dang mihai nuizatburah ka siem ding che a nih.
5. Aw, hming inpawi le buoinaa sip khawpui, i se vela umhai le ram hlaa umhaiin nuisawng an ti che.
6. "Ngai ta, Israel mi lien tinin i sunga thisen insuo dinga an thuneina seng an hang chelek dan em em hi!
7. I sunga hin miin nu le pa an hmusit a; i sungah ram dang mihai an suknomna a, fahrahai le hmeithaihai an neksawr a.
8. Ka hmun thienghlim an suknomna a, ka chawlnihai an bawsiet a,
9. sukhlum dingin mi an hek a, tlanga bawlhmunah inthawina ruoi fain an dawn a, hurna thilhai an thaw a.
10. I sungah mani pahai khum sukporchetu le nuhmei thla pal laia pawl lui hlak an um a.
11. I sungah mani tuolbawm nuhmei sukporchetu dam, mani mo inzakumthlak taka sukporchetu dam le mani farhai ngei suol luitu dam an um a.
12. I sungah mihaiin thisen insuo dingin thamna an lak a; a pung tam tak hnotin thil an inpuktir a, tuolbawmhai thil tam tak an lak lui a, kei ngei khom in mi lo theinghil tah ti hi Lalpa PATHIEN thu suok a nih.
13. "Indik lo taka i hleprukna thua le nangma sunga thisen i'n suona thuah kut ben khum ka ti che.
14. Nang ka bei ni che chun, i huoisenna khan mi ngamin i kut hratna khan a mi tuor zo ding am a ni? Kei LALPA hin ka hril ta cheu a, ka hril ang takin thaw bok ka tih.
15. Hnam tin lai sukdar ka ti cheu a, ram tinah indar in ta, in tirdakumna chu sukbo ka tih.
16. Hnamhai mithmua tirdakumah ka siem pha cheu chun LALPA chu ka nih ti hung hre tang in tih' tiin hril rawh," a ta.
17. Chun, LALPA thu chu ka kuomah a hung tlung nawk a.
18. "Mihriem naupa, ka ta ding chun Israel sungkuo chu thir ek, rawtuina hmuna dar hai, tin hai, thir hai le suon kang ek ang chauh an ni tah. Tangkaruo tui ek ang char an nih.
19. Chuleiin, Lalpa PATHIEN chun hieng hin a tih: Thir ek ang chauh in ni vong tah leiin, Jerusalemah deng khawm ka ti cheu.
20. Rawtuina mei sa taka raw tui dinga miin dar hai, tin hai, thir hai le suon hai a lak khawm angin, kei khomin ka lungsen inlingin khawpui sungah la khawm ka ti cheu a, raw tui ka ti cheu.
21. A nih, la khawm ka ti cheu a, in chungah ka lungsenna mei sem ka ta, chu taka chun intui ral in tih.
22. Rawtuina meia tangkaruo an raw tui anga raw tui in ni pha chun, kei LALPA hin ka lungsenna in chungah ka bun thlak a nih ti hung hre tang in tih' tiin.
23. Chun, LALPA thu chu ka kuomah a hung tlung nawk a.
24. "Mihriem naupa, a ram chungthu chu hieng ang hin hril rawh: 'Lungsen nia ruotui um nawna le ruo a sur ngai nawna ram chu i nih.
25. Sakeibaknei inrumin sa se ding a ve lai ang elin anni laia mihai ngeiin an zawlneihai suksiet dan ding thu an phier a, mi hringna an dol a, an thil hlu le rosumhai an lakpek a, nuhmei tam tak hmeithaiin an siem a.
26. An thiempuhaiin ka dan an bawsiet a, ka hmun thienghlim an sukporche a, thil thienghlim le thil naran an thlei naw a, mi inthieng le mi inthieng naw danglamna um lo angin an inchuktir a, ka chawlnihai an bawsiet a, anni lai tu khomin an mi'n za nawh.
27. Anni laia hotuhai chun satene virkawngin a sa se a kei chen ang topin, indik lo taka an hlep ruk theina dingin thisen an insuo a, mi an that a.
28. An thilthawhai chu an zawlneihai chun inlarna tehlem hmuin le khela ai sanin an tlip nam a, 'Hi hi Lalpa PATHIEN hril a nih' an ta, LALPA hlak chun a biek tawl der bok si nawh.
29. A ram mihai chun mi thil la luiin an rok a, mi pasiehai le tlasamhai an neksawr a, ram dang mihai chungthu indik naw taka relpekin an suknomna a.
30. Ram chu ka suksiet nawna dinga anni laia dai lo saktu ding le kan inkara kut lo phartu ding mi ka zong a, ka hmu si nawh.
31. Chuleiin, an thilthaw phu angin an lu chungah ka lungsenna chu bun thlang ka ta, ka lungsen inlingin anni chu kang hmang a tih ti hi Lalpa PATHIEN thu suok a nih,' ti rawh" a ta.
←  Ezekiel (22/48)  →