←  Ezekiel (21/48)  →
1. Chun, LALPA thu chu ka kuomah a hung tlung a.
2. "Mihriem naupa, Jerusalem hmason la, an hmun thienghlimhai kal zawngin thu hril la, Israel ram chungthu ding hril lawk rawh.
3. Hieng hin hril rawh: 'LALPA chun hieng hin a tih: Ka do che a nih. Ka kawlhnam chu a paia inthokin phawi ka ta, mi fel le mi rilohai inang rongin rawt ka tih.
4. Sim le hmar inkara um mi fel le mi rilohai ka rawt ding a ni leiin ka kawlhnam chu phawi zing ka tih.
5. Chu pha chun mi po poin, kei LALPA hin ka kawlhnam chu ka phawi a nih ti hung hre tang an ta, a paiah lut nawk ta naw nih.
6. "Chuleiin, mihriem naupa, inrum rawh! An hmaah lung na tak le beidong takin inrum ngawi ngawi rawh.
7. Ieng leia inrum am i na?' an ti che chun, 'Chanchin pangzatum hung tlung ding leia inrum ka nih. Lungril tin intui zop a ta, ban po po zoi thlang a ta, ngaituona po po chau tlep a ta, khup po po tui angin zop thlang a tih' ti rawh. Ngai rawh, a hung tlung mek ie! Tlung ngei a tih, ti hi Lalpa PATHIEN thu suok a nih, ti rawh" tiin.
8. Chun, LALPA thu chu ka kuomah a hung tlung a.
9. "Mihriem naupa, hril lawk la, hieng hin ti rawh: 'LALPA chun hieng hin a tih:'Kawlhnam chu, kawlhnam chu,Tat ngei le nawt tler a ni tah:
10. Mi satna dinga tat ngei,Tle lep dinga nawt tlet chu!Ka naupa Juda lal hmol ringin,Ei la hlim zing ding am a ni?Kawlhnam chun ieng ang hmol khom,Tham naw hrim a nei der nawh.
11. Kawlhnam chu vai vel dinga,An innawt tlettir a na,Thattu kuta vilik dinga,An intat ngeitir a ni si a.
12. Mihriem naupa inrum la,Inring takin khek suok rawh,Ka mihai tuor ding a ni si a;Israel mi lien po pohai khom.Ka mihai leh a ruolin,Kawlhnam kuomah an pek suok;Chuleiin, awm inchum rawh.
13. Fiena hung tlung ngei a tih.Kawlhnamin ienga a ngai naw,Juda lal hmol chu lo tawp ta sien,Iengtin am ni tang a ta?Lalpa PATHIEN chun a tih.
14. "Chuleiin, mihriem naupa,Kut benin thu hril lawk rawh.Kawlhnam chun voi hni sat sien,Voi thum khom sat non raw se;Mi thatna kawlhnam a na,Tam tak thatna ding a na,Sir tinah inleng raw se.
15. An lungril zopna ding le,Mi tam tak vai thlukna di'n,Kotkhar bul tina hai chun,Kawlhnam ka sie vong a nih.Kawlphe ang inlep zok zokin,Thina chemsen chu an vilik.
16. Aw kawlhnam, chang tieng sat la,Voi tieng khom sat zot zot rawh,I be nghatna tieng tieng chu.
17. Kei khomin kut ben ka ta,Ka lungsen re tang a tih,Tiin LALPA chun a hril'tiin hril tawl rawh" a ta..
18. Chun, LALPA thu chu ka kuomah a hung tlung nawk a.
19. "Mihriem naupa, Babulon lal kawlhnam chu a hung tlung theina dingin lampui pahni sat la, chu lampuihai chu ram pakhata inthoka hung suok a ni ding a nih. Khawpui lutna kotsuoa chuong lam pahnihai pengnaa chun lam kawkhmuna kawkbar siem rawh.
20. Kawkbar pakhat chun kawlhnam lutna ding Amon mihai khuo Raba chu inkawktir la, kawkbar dang chun kawlhnam lutna ding Judai ram le Jerusalem kul tieng chu inkawktir bok rawh.
21. Babulon lal chu lam thuoma chun chawl a ta, a thal bawma thalhai chu vawrin ai san a ta, a milemhai rawn a ta, inthawinaa ran an inhlanhai thin chu en a tih.
22. A aisanna thal vawr, Jerusalem tieng kawka tlu po chu a kut chang tiengin lang a tih. Kul sut hongna dinghai siem a ta, mihai chu suom dingin thu peng a ta, haw hawa kul kotkhar chu sut hong dingin hril a ta, kul inhuolna dingin a velin muol deng pawngin, thamte daw kuol a tih.
23. Jerusalem mipuihai chun Babulon lal chu thu an thlungpui ta sa a ni leiin a aisan chu thil thlawn elah ngai an ta, sienkhom a laka an suolnahai inhriettir dingin anni chu bei a ta, man tawl a tih.
24. Chuleiin, Lalpa PATHIEN chun hieng hin a tih: 'In tuol helna chun in lungril suolzie le in thilthaw taphotah in suolzie in suklang leiin, chu thil in thaw lei chun sala thuoiin um in tih ti hi Lalpa PATHIEN thu suok a nih.
25. Aw nang Israel hotu, mi tirdakum le rilopa, i suolna leia hremna tawpkhawk i hmuna ni ding chu a hung tlung tah ie!
26. Lalpa PATHIEN chun hieng hin a tih: I lukawm kha hlip la, i lallukhum kha la thla rawh. A hma ang kha ni ta naw nih: mi hnuoihnunghai chawi sang ning an ta, mi lienhai suktlawm ning an tih.
27. Sietna maw! Sietna maw! Ni e, sietna chu intlungtir mol ka tih! A neitu indik tak a hung hma chun indin thar ni ta naw nih; ama kuta chun peng ka tih.
28. "Nang mihriem naupa, Amon mihai chungthu le an mi hril sietna thua chun hieng ang hin hril rawh: 'Lalpa PATHIEN chun hieng hin a tih: Nangma thatna dingin ka kawlhnam chu phawi saa um a ni ta a, mi thatna ding le sukbohmangna dinga kawlphe anga nawt tlet a nih.
29. I zawlnei tehlem le aisan thiemhaiin inlarna tehlem an hmupek che a, khelin ai an sanpek bok che a. Mi rilo le mi suol i ni leiin, i chunga hremna tawpkhawk tlung ding chu a hung tlung mek a, i ringah kawlhnam inbur a tih.
30. "Kawlhnam chu a paiah khum nawk el rawh. I pi le pu chengna ram, i pieng le murna ram ngeiah i chungthu chu rel ka tih.
31. I chungah ka lungsenna mei buok ka ta, ka lungsen chokin hlieu ka ti che a, mi suksiet thiema chemkal mi tawrothai kutah pe suok ka ti che.
32. Meiah ting an ti che a, i ram ngeiah i thisen luong a ta, tu khomin hre zui ta naw ni hai che' ti hi LALPA thu suok chu a nih, ti rawh" a ta.
←  Ezekiel (21/48)  →