←  Ezekiel (20/48)  →
1. Babulon sala Lal Jehoiachin intanga inthoka kum sari kum, thla ngana, ni sawm nif chun Israel upahai laia thenkhat chu LALPA rawn dingin ka kuomah an hung a, ka hmaah an inthung a.
2. Chun, LALPA thu chu ka kuomaha hung tlung a.
3. "Mihriem naupa, Israel upahai kha inbiekpui la, an kuomah hieng hin hril rawh: 'Lalpa PATHIEN chun hieng hin a tih: 'Mi rawn dinga hung in ni maw? Nangni rawnin um naw ning' ti hi Lalpa PATHIEN hin ka hringna salin ka hril a nih.
4. "An thu i relpek di'm a ni? Mihriem naupa, an thu i relpek naw ding maw? An pahai thil ching tirdakum leh anni chu hmason la,
5. an kuomah, 'Lalpa PATHIEN chun hieng hin a tih tiin hril rawh: Israelhai ka thlang ni khan, Jakob sungkuo le an thlahai hmaah kut phar meuin, "Kei hi LALPA in Pathien chu ka nih" tiin, Aigupta rama khan keima chu anni kuomah ka'n puong a.
6. Chu ni chun inkham meuin, Aigupta rama inthoka thuoi suok a, an ta dinga ka ram huol, nenetui le khuoizu luongna ram, ram po po laia mawi taka ka thuoi lut ding thu chu ka hril a.
7. An kuomah, 'Mi tinin in mit latu milem tirdakumhai chu sie hmang vong unla, Aigupta milemhaiin insukporche ta naw ro, kei hi LALPA in Pathien chu ka ni si a' tiin ka hril tawl a.
8. "Amiruokchu, ka chungah an hel a, ka thu an ngaithlak nuom naw a, an mit latu milem tirdakumhai chu an pei hmang naw a, Aigupta milemhai chu an nghatsan bok nawh. Chuongchun, an chunga ka lungsenna ka hrik thlak ding thu le Aigupta ram sunga ngei ka lungsenna ka bun thlak ding thu ka hril a.
9. Nisienlakhom, an chengna rama hnam danghai mithmua ka hming hril sieta a um ding chu ka veng leiin chuong ang chun an chungah ka thaw ta em naw a, Aiguptahai mithmua ngei Israelhai kuomah keima chu inpuongin, a rama inthok chun ka thuoi suok tawl ta lem a.
10. Aigupta rama inthoka thuoi suokin thlalerah ka thuoi lut tawl a.
11. Ka thu suokhai le ka danhai ka pek a, chuonghai chu mi tu khomin zawm a, an hringpui theina dingin.
12. Keima le anni inkara inchikna dingin ka chawlni Sabat ka pek bok a, kei LALPA hi anni ser hrangtu ka nizie an hriet theina dingin.
13. "Sienkhom Israel sungkuohai chu thlalera khan ka chungah an hel a. An hringpui ding ni si ka thu suokhai chu zawm nuom loin, ka danhai an hnawl a, ka chawlnihai nasa takin an bawsiet a. Chuleiin, thlalera chun ka lungsenna an chungah bun thla a, sukse vong di'm a nih ka ti a.
14. Amiruokchu, ka hung thuoi suok lai hmutu hnamhai laia ka hming inpawi ding ka veng leiin chuong ang chun ka thaw ta naw a.
15. Chu bakah, thlalera khan ka ram pek, nenetui le khuoizu luongna ram, ram po po laia mawi taka chun thuoi lut lo dingin kut phar meuin thu ka'n kham a.
16. A san chu ka danhai hnawlin ka thu ruothai an zawm nuom naw a, ka chawlni an bawsiet bok a; an lungril chu an milemhai tieng a ngha tlat si lei a nih.
17. Nisienlakhom, hang sukbohmang em dingin ka lunginsiet tawl si a, thlalera khom khan ka sukbohmang vong ta naw a nih.
18. Thlalera khan an nauhai kuomah, "In pahai dan siem kha zawm naw unla, an danhai vong naw unla, an milemhaiin insukporche naw ro.
19. Kei hi LALPA in Pathien chu ka na, ka thu ruothai zawm unla, ka danhai fimkhur takin vong ro.
20. Ka chawlni inser ro, kei le nangni inkara inchikna a ni theina dingin. Chuongchun, LALPA in Pathien ka nizie hung hrieng in tih" ka ti a.
21. "Nisienlakhom, an nauhai chu ka lakah an hel a, an hringpui ding ni si ka thu ruothai chu an zawm naw a, ka danhai an vong fimkhur naw a, ka chawlnihai an bawsiet a. Chuleiin, thlalera khan ka lungsenna hrik thla a, an chungah bur khum dingin ka ti a.
22. Amiruokchu, ka hung thuoi suok lai hmutu hnamhai laia ka hming inpawi ding ka veng leiin kut ka kei a.
23. Chun, hnamhai lai sukdar a, ram tinah the dar vong dingin kut phar meuin thlalera khan thu ka'n kham a,
24. a san chu ka danhai an zawm naw a, ka thu ruothai an hnawl a, ka chawlni an bawsiet a, an pahai milem tieng an lungril a nghat tlat leiin.
25. Chuleiin, an thatna ding ni lo dan hnuoiah siein, an nunpui thei lo ding thu ka pek bok a,
26. ka thilpekhai ngei chun anni le anni an insukporche a, an nau lutirhai chu an milem kuomah meiah an inhlan a; LALPA chu ka nih ti an hriet theina dingin, anni chu pangzatnain ka suksip a nih.
27. "Chuleiin, nang mihriem naupa, Israel mipuihai chu inbiekpui la, an kuomah hieng hin hril rawh: Lalpa PATHIEN chun hieng hin a tih: Hieng thila hin in pahai chun mi nghatsanin an mi hrilsiet zui pei a.
28. Ram pek ding ka tiemah ka thuoi lut hnungin, tlang insang le thing zar buk tha an hmuna taphotah inthawina an inhlan a, rimtui rawin, dawn ding thilhlanhai an bun suok a, lungsen dingin an mi cho phawk a.
29. Kei chun, 'Hmun sang in fe hlak hi ieng in tina am a na?' ka ta. (Chuleiin tu chen hin a hmingah 'Bamah'g ti a hung ni tah a nih.)
30. "Chuleiin, Israel sungkuohai kuomah hieng hin hril rawh: 'Lalpa PATHIEN chun hieng hin a tih: In pahai ang bokin nangni khom insukporchein, milem tirdakum chu hnotin in hur hmang ve ding am a ni?
31. In thilpekhai inhlanin, in nauhai meiah peiin, voisun ni chen hin in insukporche zing a ni naw am a ni? Aw Israel sungkuohai, nangni mi rawn ding am ka ni? Nangni rawnin um naw ning ti hi kei Lalpa PATHIEN hin ka hringna salin ka hril a nih.
32. "In lungrilin 'Khawvela hnam danghai ang boka thing bul le lung bul betu ni kan nuom ve' ti inla khom, in ti angin khawsa naw ti niu.
33. Indoi der loin in chungah kut thlak ka ta, ka lungsenna hrik thlang ka tih ti hi kei Lalpa PATHIEN hin ka hringna salin ka hril.
34. Hnam danghai laia sukdara in umnaa inthoka ka thuoi kir pha cheu ka thilthawtheizie le ka lungsenzie inentir ka ti cheu.
35. Hnam danghai ram thlalerah thuoi ka ti cheu a, chu taka chun inhmasonin, in chungthu ka rel ding a nih.
36. Aigupta thlalera in thlatuhai chunga ro ka rel ang bok khan nangni chunga khom ro rel veng ka tih ti hi Lalpa PATHIEN thu suok a nih.
37. Ka hmol hnuoiah inkuntir ka ti cheu a, ka thuthlung khuokhirna hnuoiah thuoi lut ka ti cheu.
38. Nangni laia ka thu awi lo le ka laka helhai chu inthiel fai ka ta, an umna rama inthokin hung thuoi suok ka ta, sienkhom Israel ram chu lut naw top an tih. Chu pha chun LALPA chu ka nih ti hung hre tang in tih.
39. "Aw Israel sungkuohai, in chungthua Lalpa PATHIEN hril chu hi hi a nih: Ka thu in ngaithlak naw law law si chun in rengin fe hmang unla, tuta le a hnung chenin in milem pathien rong chu va bawl ro; in thilpekhai le in milemhaiin ka hming thienghlim sukporche ta naw ro.
40. Ka ram, ka tlang thienghlim, Israel tlang sanga chun Israel sungkuo po poin ka rong an bawl ding a nih; chu taka chun anni chu lo pom ka tih. Chu taka chun in thilhlanhai, in thilpek hlu tak takhai le in inthawina thil ser po pohai khom chu lo pom tang ka tih.
41. Hnam danghai laia inthoka la suok a, in indarna ram tina inthoka ka thuoi khawm pha cheu chun rim inhnikah pom tang ka ti cheu a, hnam danghaiin nangniah ka thienghlimzie hmu tang an tih.
42. In thlatuhai kuoma kut phar meua pek ka tiem Israel ramah ka hung thuoi lut pha cheu chun kei hi LALPA chu ka nih ti hung hre tang in tih.
43. Chu pha chun in um danhai le in thilthaw hlak haia in insukporche danhai hung hrieng in ta, thil tha lo in lo thaw tahai leiin nangni chen khom intirdak phang in tih.
44. Aw Israel sungkuohai, in um dan tha naw ang ni lo le thil porche thaw in ching hlak ang kha ni bok loa, ka hming sika ka dawr pha cheu, kei hi LALPA chu ka nih ti hung hre tang in tih, ti hi Lalpa PATHIEN thu suok a nih" tiin.
45. Chun, LALPA thu chu ka kuomah a hung tlung a.
46. "Mihriem naupa, sim tieng ngha la, sim tieng chungthu hrilin, sim tieng ram ngirhmun ding hril lawk rawh.
47. Sim tienga rampui kuomah hieng hin hril rawh: 'LALPA thu hi ngaithla rawh, Lalpa PATHIEN chun hieng hin a tih: 'Nang hi meiin ka raw tep ta che a, chu mei chun, i thing hring le tawl po po khom lem zo vong a tih. Mei chok puot puot chu sukrem ni naw ni a, sim tieng le hmar tieng inkara um po pohai chu kang ut vong a tih.
48. Chun, mi po poin kei LALPA hi mei insuotu chu ka nih ti hmung an ta, mei chu sukmit ni naw nih a tih' ti rawh" a ta.
49. Kei chun, "A khai, Lalpa PATHIEN! 'Tekhinthu mei mei an naw maw a hril hi?' an mi ti hman der tah a nih" tiin ka hril a.
←  Ezekiel (20/48)  →