←  Ezekiel (2/48)  →

---

1.

Chun, ka kuomah, "Mihriem naupa, ngir suok la, thu ka hril ding che a nih" a ta.

2.

Ka kuoma thu a hril lai chun thlarau chu keimaah a hung lut a, a mi'n ngirtir a, a thu hril chu ka ngaithlak a.

3.

Ama chun, "Mihriem naupa, Israel nauhai, hnam hel hmang tak le ka chunga hel zing zing hlakhai kuomah ka tir ding che a nih; anni le an thlatuhai chu voisun ni chen hin ka lakah an la hel zing a nih.

4.

Ka tirna che mihai hi mi lulul le timaw tak an nih. An kuomah, 'Lalpa PATHIEN chun hieng hin a tih' i ti ding a nih.

5.

Hnam hel hmang an ni leiin, i hril chu an awi ta'm, an awi naw ta'm, anni lai zawlnei a um ti an hriet ve hrim hrim ding a nih.

6.

Nang mihriem naupa, anni chu ti naw la, an vauh zam tum che khomin zam naw rawh. Thul le hling karah, ainuvet ruol laia um ni la khom, ti der naw rawh. Hel hmang sungkuo an nia chu an vaupum le inthinahai chun sukzam naw raw se che.

7.

Hnam hel hmang an nia chu, an ngaithlak ta'm, an ngaithlak naw ta'm, an kuomah ka thu i hril hrim hrim ding a nih.

8.

Mihriem naupa, nang ruok chun ka hril hi ngaithla la, anni angin hel ve naw rawh. I bau ka la, ka thil pek che hi lem rawh" a ti a.

9.

Chuongchun, ka hang en a, ngai ta, kuta a mi hung ban lai chu ka hmu a, lekhabu ziel a chawi a.

10.

Ka hmaa chun lekhabu ziel chu a kei phar a, khing tieng khing tieng chu thu ziekin a sip vong a, chuonghai chu tapna le lusunna le chungpikna thu vong a nih.

---

←  Ezekiel (2/48)  →