Ezekiel (18/48)  

1. Pathien thu ka kuomah a hung tlung nawk a.
2. "Israel ram sunga nangni rawiin thuvar in hmang hlak, 'Pahaiin grep thur an fak a, an nauhai ha a tim' ti hi ieng tina am a na?
3. Hi thuvar hi Israel ramah hmang nawk ta ngai naw ti niu ti hi kei Lalpa PATHIEN hin ka hringna salin ka hril.
4. Hringna po po hi ka ta a na, pa hringna chu ka ta a ni ang bokin naupa hringna khom ka ta a nih. A thi ding chu thil suol thawtu chu a nih.
5. "Mi fel pakhat hin thil fel le indik chauh thaw sien,
6. tlanga an bawlhmunahai bu fa ve loin, Israel sungkuohai milem biek tieng chun ngha ve ngai naw sien, a tuolbawm nuhmei sukporche loin, nuhmei thla pal lai pawl bok naw sien,
7. tu khom neksawr loin, a laka miin thil an puk aia dakhama an sie chu pe kir sien, tu khom rok loin, phingtamhai chu bu pein, saruokhai chu silfen pe sien,
8. a pung hnota inpuktir loin, a pung khom la bok naw sien, suol thawna dinga kut hmang loin, mi le mi inkara thu indik takin rel sien,
9. ka thu suokhai zawmin, ka danhai vong tlat sien, chu mi chu mi fel a na, matheiloin hring a tih' ti hi Lalpa PATHIEN thu suok a nih.
10. "An naw leh nau tawrot, thisen insuo hmang neiin,
11. a pain a thaw ve ngai der lo chuong ang thil suol chu thaw hlak sien, tlanga bawlhmunahai bu fain, a tuolbawm nuhmei sukporche sien,
12. mi rethei le tlasamhai neksawrin, mi rokin, dakhama thil an siehai chu pe kir ngai loin, milem tieng nghain, thil tirdakumhai thaw sien,
13. a pung hnota inpuktirin, a pung la teu sien, chuong ang mi chu a hring ding maw? Hring lo e! Hieng thil tirdakum po po hi a thaw si leiin matheiloin sukhlum ning a ta, ama thisen maw chu phur a tih.
14. "Amiruokchu, a naupa hin nau nei sien, a pa thil suol thaw po po chu hmu vong sien, thaw nuom ve der naw sien,
15. tlanga bawlhmunahai bu fa ve loin, Israel sungkuohai milem biek tieng chun ngha ve ngai naw sien, a tuolbawm nuhmei sukporche naw sien,
16. tu khom neksawr loin, thil a'n puktirin dakham la nuom ve naw sien, mi rok ngai loin, phingtamhai chu fak ding pein, saruokhai chu silfen pe sien,
17. suol tawk lo dinga kut intim tlatin, a pung neia inpuktir loin, a pung la bok naw sien, ka danhai vongin ka thusuokhai zawm sien, chu mi chu a pa thilsuol thaw leiin thi naw ni a, matheiloin hring a tih.
18. A pa ruok chu rawng taka mi neksawr a, a unauhai rok a, a mihai laia thil tha lo thawtu a ni leiin, ama suolna leiin a thi ding a nih.
19. "Sienkhom nangni chun, 'Ieng leiin am naupa chun a pa khawlona chu a tuor ve naw ding?' in ti hlak. A naupa chun thil fel le indik thaw a, ka thu suokhai fimkhur taka a zawm leiin, ama chu matheiloin hring a tih.
20. A thi ding chu thil suol thawtu chu a nih. Naupa chun a pa khawlona chu tuor naw ni a, pa khomin a naupa khawlona chu tuor bok naw nih. Mi fel chun a fel man intel a ta, mi rilo chun a ritlona man tuor a tih.
21. "Amiruokchu, mi rilo chun a suol thawhai bansan a, ka thuruothai zawm a, thil fel le indik a thaw chun, matheiloin hring a ta, thi naw nih.
22. Thil suol a lo thaw tahai po po chu hriet zing ni ta naw nih. Thil indik a thawhai lei chun hring a tih.
23. Mi rilo thi hi ka lawma in ngai am a ni? A lampui maksan a, a hring hi an naw maw ka lawm lem chu? ti hi Lalpa PATHIEN thu suok a nih.
24. "Sienkhom, mi fel chun a lampui maksanin, thil suol thawin, mi rilo thaw hlak thil tirdakumhai chu thaw ve sien, a hring ding am a ni? Thil fel a lo thaw tahai kha pakhat khom hrietpek ni ta naw nih. A ringum nawna leia thiem naw a changna lei le a thil suol thawhai lei chun, ama chu a thi ding a nih.
25. "Chuong a ni sa khom chun, 'LALPA thaw dan hi a'n ang chuong vong ngai lem' in ti hlak. Aw Israel sungkuohai, lo ngaithla ro. Ka thaw dan hi maw a felfak nawh? In thaw dan an naw maw felfak lo lem chu?
26. Mi felin felna lampui maksana thil suol a thaw chun, chu chu thipui a tih; a thil suol thaw lei chun a thi ding a nih.
27. Amiruokchu, mi riloin ritlona a thaw hlak chu maksana, thil fel le indik a thaw chun, a hringna chu hum a tih.
28. Thil poi a tawkhai po po chu ngaituo a, chuong thilhai chu a maksan leiin, matheiloin hring a ta, thi naw nih.
29. Sienkhom, Israel sungkuo chun, 'LALPA thaw dan a felfak nawh' in ti tho. Aw, Israel sungkuohai, ka thaw danhai maw a felfak naw chu? In thaw danhai an naw maw felfak lo lem chu?
30. "Chuleiin, aw Israel sungkuohai, mi tinin in thaw dan ang peiin in chungthu rel ka tih, ti hi Lalpa PATHIEN thu suok a nih. Sim ro! In bawsietna po pohai chu nghatsan unla, thil suol thaw chu in tluk sietna san ni ta da'l a tih.
31. In bawsietna po po lakah fihlim unla, lungril thar le thlarau tharin inthuom ro. Aw Israel sungkuohai, ieng leiin am in thi ding a na?
32. Tu thinaa khom lawmna ka nei nawh ti hi Lalpa PATHIEN thu suok a nih. Sim unla, hring ro" tiin.

  Ezekiel (18/48)