←  Ezekiel (16/48)  →
1. LALPA thu chu ka kuomah a hung tlung a:
2. "Mihriem naupa, Jerusalem chu a thil ching tirdakumhai leh hmason la, a kuomah,
3. 'Lalpa PATHIEN chun hieng hin a tih: I pieng le murna ram chu Kanan mihai ram a na, i pa chu Amor mi a na, i nu chu Hit mi a nih.
4. I hung pieng thlakin i laihrui at a ni naw a, tuia insil fai i ni naw a, machi nal i ni naw a, tuom lum i ni bok nawh.
5. Tu khomin an lainat en naw che a, chuong ang thil thaw dingin lunginsiettu che i nei bok nawh. Lainat nek hmanin kawhnawmah an pei che a, i pieng nia inthoka mi ten i nih.
6. "Chun, kei ka hung a, thisena sipa inperin ka hmu che a, i thisena i'n buol lai chun keiin, 'Dam rawh' ka ti che a.
7. Rama thing tuoi angin ka'n thanglientir che a. I hung seilien a, lunghlu laia mawi tak ang i hung ni a, iitang a hung inbal a, i sam a hung sei a, sienkhom saruok le ruok ringot el i la ni zing si.
8. Ka hung hmu nawk che chun ngaizawng nei ruol i ni ta leiin ka puon ka'n zawn che a, i saruokna ka'n khumpek che a. Khun takin thu tiemin, thu ka thlungpui che a, ka ta i hung ni tah" ti hi Lalpa PATHIEN thu suok a nih.
9. "Chuongchun, tui ka'n siltir che a, i thisen kai chu ka sawp fai a, hriek rimtuiin ka chul che a.
10. Puon cheiin ka tuom che a, savun pheikhok ka'n buntir che a, puon zai inhmi le silfen man toin ka'n thuom che a.
11. Belmawi tinrenga cheiin, i kutah banbun inbuntirin, i ringah rangkachak thi inhlitirin,
12. i hnarah hnarbe le i naah nabe inbetirin, i luah lallukhum ka'n khumtir che a.
13. Chuongchun, rangkachak le tangruo belmawia chei i ni ta a, puon zai inhmi le silfen man to le puon cheimawia inthuom i ni a, beiphit indip le khuoizu le oliv hrieka chawm i ni bok a. I hmel a hung tha ta em em a, lalnu ni dinga hlangkai i ni bok a.
14. Ka mawina ropuia ka'n thuom che leiin i hmel a tha famkim a, i hmel that lei chun hnam tin lai i hming a'n thang luoi luoi a" ti hi Lalpa PATHIEN thu suok a nih.
15. "Nisienlakhom, i hmel thatna chu suongin, i hming inthangna chu nawchizora insiem phanain i hmang a. A hung pan taphot che kuomah i'n phalrai a, i hmel thatna chu a ta a hung ni ta a.
16. I silfenhai hlipin, hmun sanga bawlhmunhai chu i cheimawi a, chu taka chun i'n zor a. Chuong thil chu a la tlung ngai naw a, tlung hlak chi khom a ni bok nawh.
17. Rangkachak le tangkaruo belmawi tak tak ka pekhai che kha i lak a, pasal lem i siem a, chuonghai hmaa chun i'n phalrai a.
18. Mawi tak taka thui i silfenhai chu i lak a, anni inthuomnan i hmang a, ka hriekhai le rimtuihai chu anni hmaah rimtui dingin i'n hlan a.
19. Fak dinga bu ka pek che beiphit tha, oliv hriek le khuoizu hai khom chu rimtui inhnik dingin an hmaah i'n hlan a. Chu chu thil um dan chu a nih' ti hi Lalpa PATHIEN thu suok a nih.
20. "Chu bakah, i mi hringpek i naunuhai le naupahai chu milemhai kuoma pumraw inthawina dingin i pek a. Nawchi i zor hi i la dit tawk naw a ni?
21. Ka nauhai thatin, milem hmaah i'n hlan a.
22. Thil tirdakum thaw ching a, nawchi i zor hnung hin i naupang lai, saruoka uma i thisena i'n per lai nihai dam kha i hriet fuk ta si nawh.
23. "Lalpa PATHIEN chun, 'I chung a pik! I chung a pik!' a tih.
24. Chuong i rilonahai baka chun tuolzawl laili tinah muol deng pawngin, a chungah bawlhmun insang i bawl a.
25. Kotthler tontir taphotah bawlhmun insang i bawl bok a, i mawina chu thil tirdakumah inchangtirin, a fe inlon taphot kuomah uolau takin i lo inhlim a.
26. Aigupta mihai, i tuolbawm mi hurhai kuomah inzorin, uolau taka i hur herna chun lungsen dingin i mi cho phawk a.
27. Chuleiin, i chungah kut ka'n let a, i ram chu ka sukchin a; nangma theidatu Filistin mihai, i hur dan makti em emtu kuoma chun nuom nuoma an soisak dingin ka pek suok che a.
28. I la dit tawk ta naw rop leiin Asuriahai kuoma khom i'n zor a, chu khom chun i la dit tawk chuong bok nawh.
29. Inphalrai zuol peiin sumdawnga hung Babulon mihai kuomah i'n zor a, sienkhom i la dit tawk chuong naw rop.
30. "Nawchizor zakmaw anga hieng thilhai i hang thaw el hi chu, thlem thluk i lo va hang olsam de aw!" ti hi Lalpa PATHIEN thu suok a nih.
31. "Kotthler hmatawng taphotah muol siem a, tuolzawl lailia bawlhmun sang i bawl lei hin nawchizor naran el khom i ni nawh; i'n zorna man khom i lak bok nawh.
32. "Nang uirenu, mani pasal neka mi dang dit lemtu!
33. Nawchizor tinin an inzor man an lak hlak a, nang ruok chun a zalpuitu ding che hmun tina mihai i zawr a, a zalpui taphot che chu thilpek i pek lem si a.
34. Nawchizor dangdai le letling i nih: zalpui dingin an pan naw che a, nangnin i zawr tawl lem a; an zalpui man che pe loin nangin a man i pek lem si.
35. "Chuleiin, nang nawchizor, LALPA thu hi ngaithla rawh!
36. Lalpa PATHIEN chun hieng hin a tih: I ngaizawng taphot kuomah phalrai taka inzor a, milem tirdakum tam tak nei a, i nauhai thisen chu an kuomah i'n hlan leiin,
37. nangma ngaitu le inhoi i chenpui po po hai le i lo inngaipuihai le i theidahai po po chu ko khawm ka ta, saruokin kei phar ka ti che a, i saruokna po po hmung an tih.
38. Nuhmei uire le nauhai thisen insuotu chungthu an rel angin i chungthu khom rel ka ta, thisen phuba le ka thikna che leia ka lungsenna phuba chu i chungah hung intlungtir ka tih.
39. An kutah pe suok ka ti che a, i muol pawng siemhai le bawlhmun sang bawlhai chu sukchimin sir sop an tih. I silfenhai hlippek an ti che a, i belmawi thahai lakpek an ti che a, saruok le ruokin hluihlawn an ti che.
40. I chungah tlang inpung an ta, lungin deng an ti che a, kawlhnamin chan phit an ti che.
41. I inhai raw hmang an ta, nuhmei tam tak mithmua ngei i chungah hremna chu hlen ka ta, i nawchizor suktawp ka ta, i zawlpuihai kuoma zawrna thilpek i pek hlakhai khom pe ta naw ti nih.
42. Chu pha chun ka thik em che leia i chunga ka lungsenna chu rein, ka lung nat khom hung dam tang a tih.
43. "I tleirawl lai nihai kha hre zing ta loa, hieng thilhaia i mi suklungsen leiin, i thilthaw maw chu i lu chungah intlaktir ka tih ti hi Lalpa PATHIEN thu suok a nih. I thil ching tirdakum po poah hurna rong i'n kai zaptir vong a ni naw am a ni?
44. I chungthua thuvar tawi an hril sawng zatin, 'A naunuin a nu a sun' hung ti zieng an tih.
45. A pasal le a nauhai lungtentu, i nu i puo fuk hle a, mani pasal le nauhai lungtentu i zuorpuihai unaunu indik tak i ni chieng khop el! I nu chu Hit mi a na, i pa chu Amor mi a nih.
46. I zuorpuinu upa lem, hmar tienga a naunuhai le um chu Samaria mi a na, sim tienga a naunuhai le um i sangnu chu Sodom mi a nih.
47. An thaw dan zawma an thil tirdakum ching po po chu i ching ve el chauh khom ni loin anni neka zuolkai lemin i lelo ta hi.
48. Nang le i naunuhaiin in thaw ang hrima nasa hin i sangnu Sodom le a naunuhai khomin an thaw ngai nawh ti hi kei Lalpa PATHIEN hin ka hringna salin ka hril a nih.
49. "I sangnu Sodom le a naunuhai suolna chu hi hi a nih: an chapo a, an khop inlet a, ieng khom an bengkhon naw a, mi rethei le tlasamhai an uksak bok nawh.
50. An uongthuong em em a, ka mithmua ngei thil tirdarkum an thaw hlak a, chuleiin in hmu tah angin, ka sukbohmang tawl a ni kha.
51. Samaria chun i suol thaw zatve khom hi a thaw ve nawh. Anni nek daia zuolkaia thil tirdakum i thaw leiin i unaunuhai chu mi fel angin i suklang tawl hiel a nih.
52. I zuorpuihai chu indik awm hiela i'n langtir leiin nangin inzakna le hmaimawkna chu tuor i tih.
53. "Amiruokchu, Sodom le a naunuhai le Samaria le a naunuhai vangneina chu i vangneina leh la tungding nawk ka tih,
54. anni chu ngai sukngam khopa i siem tawlna chunga inzaka i hmai a mawkna dingin.
55. I zuorpuihai, Sodom le a naunuhai le Samaria le a naunuhai chu an um dan hmasa angin um nawk an ta, nang le i naunuhai khom in um dan hmasa angin um nawk in tih.
56. I chapo vang lai khan chu i zuorpuinu Sodom hming khom i sam ngai naw kha.
57. Tu ruok hin chu i ritlozie khawvel hmaah phor suok a ni ta a, Arame mihai le an se vela ramhai le Filistinhai cheksol i kai thung tah hi.
58. I hur herna le i thil ching tirdakumhai maw chu i phur pei ding a ni si a" ti hi LALPA thu suok a nih.
59. "Lalpa PATHIEN chun hieng hin a tih: Ka thuthlung bawse a, ka thu intiemkamna chu i hmusit leiin i phu ang charin i chungah thaw veng ka tih.
60. Nisienlakhom, i tleirawl lai huna i kuoma ka thuthlung kha ka hriet zing a, kumkhaw thuthlung siempui ka ti che.
61. Chuongchun i zuorpuihai, i u le i sanghai i hmu hunah i um danhai hung hre suok i ta, inzapui i ta, anni chu i kuoma ka thuthlunga thang ni ve naw hai sienkhom, i naunuhai angin ngai ka tih.
62. Chuongchun, thuthlung thlungpui ka ti che a, LALPA chu ka nizie hung hre tang i tih.
63. I thilthaw tah po po ka ngaidam vong pha che chun i suolnahai hung hre suokin inzak i ta, i bau phong ngam loin um i tih" ti hi Lalpa PATHIEN thu suok a nih.
←  Ezekiel (16/48)  →