←  Ezekiel (15/48)  →

---

1.

LALPA thu chu ka kuomah a hung tlung a:

2.

"Mihriem naupa, grep hrui le a kauhai hi ramngaw thing kau danghai neka a that chuong bikna iem a um a?

3.

Grep hruia inthokin thil hmang tlak an siem suok hlak hrim hrim am a ni? Thil tarna ding takngiel khomin an hmang hlak am a ni?

4.

Meiah an ti a, a bul le a ler tieng a kang a, a kang bang thingthu bong chu ieng am hmangna ding a um a?

5.

A kang hma hmana hmangtlak a ni naw chun, a kang char hnung lem chu hmangna ding a um naw nawk zuol awm ngei de!

6.

"Chuleiin, Lalpa PATHIEN chun hieng hin a tih: 'Ramhnuoi thinghai lai meia ti dinga grep hrui ka pek angin, Jerusalem hluotuhai khom siem ka tih.

7.

Anni chu soisak ka ta, meia inthoka hung suokhai khom, mei chun la kang hlum tho tho a tih. Anni ka soisak pha chun LALPA chu ka nih ti hung hre tang in tih.

8.

Ka chungah an ringum naw leiin a ram chu suktlaran ka tih' ti hi Lalpa PATHIEN thu suok chu a nih" tiin.

---

←  Ezekiel (15/48)  →