←  Ezekiel (14/48)  →
1. Israel upa thenkhat ka kuomah an hung a, ka hmaah an inthung a.
2. Chun, LALPA thu chu ka kuomah a hung tlung a:
3. "Mihriem naupa, hieng mihai hin lungrilah milem pathien an sie tlat a, suola intluktirtu milemhai chu an pom tlat si leiin, an thu chu ka donsak an ring hrim hrim am a ni?
4. Chuleiin, hieng hin hril tawl rawh: 'Lalpa PATHIEN chun hieng hin a tih: Israel sungkuohai, lungrila milem pathien sie a, suola intluktirtu milem pom tlat sihai chu zawlnei rawn dinga an hung pha leh kei LALPA hin milem betuhai chu an milem biek le inphu tawk charin ka lo don ding a nih.
5. Hieng milemhai lei hin Israelhai chun an mi lo fe hmangsan tah leiin, an lungril hne kir nawk theina dinga ka thaw a nih.
6. "Chuleiin, Israel sungkuohai kuomah hril la, Lalpa PATHIEN chun hieng hin a tih: Sim unla, in milemhai nghatsanin, thil tirdakum in chinghai po po khom bansan ro.
7. Israel sungkuohai laia mi tu khomin amanih, Israel rama cheng ram dang mi tu khomin amanih mi fesan a, lungrilah milem sie a, suola intluktirtu milem pomtuin zawlnei rawn dinga a fe chun, kei LALPA ngei hin lo don ka tih.
8. Lo soisak ka ta, mi pangzat le hrilsimah siem ka ta, ka mihai laia inthokin pei suok ka ta, chu pha chun LALPA chu ka nih ti hung hre tang in tih.
9. "Chun, zawlnei tu khom thu puong dinga hlema a um chun, chu zawlnei hlemtu chu kei LALPA hi ka na, a chungah kut inlet ka ta, Israelhai laia inthokin sukbohmang ka tih.
10. An suolna maw chu phur an ta, zawlnei le a rawntu chu thiem naw an chang dan thuhmun char ning a tih.
11. Israel sungkuohai chu ka laka inthokin invak hmang ta naw ni hai a, suol lakah insukporche ta ngai naw ni hai. Ka mihai ning an ta, an Pathien ning ka tih ti hi Lalpa PATHIEN thu suok chu a nih' tiin hril rawh" a ta.
12. Chun, LALPA thu chu ka kuomah a hung tlung a:
13. "Mihriem naupa, ka chungah ringum loa a ram mihai an suol a, keiin an chungah kut inlet a, an fak dinghai siktan a, an chungah tam intlaktir a, mi le sahai ka sukbohmang lai chun,
14. hieng mi pathum Nova hai, Daniel hai le Joba hai khom hi an lo thang ve khom ni sien, an felna lei chauin anni hringna chauh sanhim an tih' ti hi Lalpa PATHIEN thu suok a nih.
15. "An naw leh a ram pumah ram sakol tirin, suon le thla khom nei loa siemin, sakolhai an hrang leiin a ram chu tu khom sir ngam loa rausanin lo um ni ta ang sien,
16. hieng mi pathumhai hi chu hmuna chun an lo um khom ni sien, an naunu le naupahai khom hum thei naw ni hai a, anni hringna chauh sanhim thei an ta, a ram chu sukramin um a tih ti hi ka hringna salin kei Lalpa PATHIEN hin ka puong a nih.
17. "An naw leh, chu ram chunga chun kawlhnam inletin, 'A ram phekin kawlhnam inleng raw se' ti lang, a rama mi le sahai sukhlum ni ta lang,
18. hieng mi pathumhai hi lo um khom ni hai sien, an naunu le naupahai khom hum thei naw ni hai a, anni hringna chauh sanhim an tih ti hi ka hringna salin kei Lalpa PATHIEN hin ka puong a nih.
19. "An naw leh, chu rama chun hripui inlengtirin, an chungah thisen insuoin ka lungsenna bun thla lang, mi le sahai chu lo rawt bo tah lang,
20. Nova hai, Daniel hai le Joba hai meu khom an lo um ni sien, an naunuhai le naupahai khom hum thei naw ni hai a, an felna leiin anni hringna chauh sanhim an tih ti hi ka hringna salin kei Lalpa PATHIEN hin ka puong a nih.
21. "Lalpa PATHIEN chun hieng hin a tih: Mi le sahai sukhlum dinga Jerusalem chunga ka hremna tibaium pali- kawlhnam le tam le sakol le hripui-hai ka tir pha chun ieng anga nasa nawk zuol am ning a ta!
22. Chuong sa khom chun dama hla iemani zat um an ta, chuonghai naunuhai le naupahai chu thuoi suokin um an tih. Anni chu in kuomah an hung chun, an nungchang le an thil thawhai in hmu pha leh, Jerusalem chunga sietna ka'n tlungtir chungthua ka thil thaw po po chu thaw awm hrim a nih ting in tih.
23. An nungchang le an khawsak dan in hmu pha chun an chunga ka thaw po po chu san boa ka thaw a ni nawzie hung hre tang in tih' ti hi Lalpa PATHIEN thu puong a nih" tiin.
←  Ezekiel (14/48)  →