←  Ezekiel (13/48)  →
1. LALPA thu chu ka kuomah a hung tlung a:
2. "Mihriem naupa, Israelhai zawlnei ruol, zeldin thu hmanga thil hril lawkhai chungthu chu hril la, LALPA thu ngaithla dingin hril tawl rawh.
3. Lalpa PATHIEN chun hieng hin a tih: Zawlnei invet, ieng khom hmu nei si loa mani zeldin thu khekpuituhai chung chu a pik ie!
4. Aw Israel, i zawlneihai chu khaw ram sihal ang chauh an nih.
5. Israel sungkuo ta dinga LALPA nia indonaa ngir zo dinga siem tha dingin kul chimna lai an va paw ngam nawh.
6. An inlarna hmu chu a lem a na, thum vawra an hril lawkhai chu thukhel vong a nih. LALPA tir ni reng reng loin, "LALPA thu suok a nih" an ti ve a, an thu hrilhai chu hung tlung kim dingin an ring nawk nghal a!
7. Keiin in kuomah thu hril si loa, 'LALPA thu suok a nih' in ti chun inlarna hmang lo hmuin thu indik lo in hril lawk a ni naw am a ni?
8. "Chuleiin, Lalpa PATHIEN chun hi hi a hril a nih: In khel hril lei le inlarna tehlem hmua in inhril leiin ka khing cheu a nih ti hi Lalpa PATHIEN thu suok a nih.
9. Inlarna tehlem hmutu le thu khel hmanga thil hril lawktu zawlneihai chu ka kutin dodal a ta, ka mihai inrawn khawmnaah thang naw ni hai a, Israel sungkuo hming zieknaah ziek sa ni naw ni hai a, Israel ramah lut bok naw ni hai. Chu pha chun Lalpa PATHIEN chu ka nih ti hung hre tang an tih.
10. "Muongna um si loin, 'A muongum' tiin ka mihai an thuoi hmang a; bang lem an bawl a, chinaiin an zut var a.
11. Chuleiin, bang nal vartuhai kuoma khan an bang nal var kha a tlu tho ding a nih ti hril rawh. Ruopui vanawn hung tir ka ta, riel inhrolin hung deng a ta, thlipui hratin hung nuoi bok a tih.
12. Bang chu a chim thla pha leh mihaiin, 'Chinaia i nal var bang kha khaw lai am a um ta leh?' tiin indon ngei an tih.
13. "Chuleiin, Lalpa PATHIEN chun hieng hin a tih: 'Ka lung inlingin thlipui na tak insuong ka ta, ka lungsenin riel inhrol le ruopui vanawn tir thlang ka ta, sukse rem rum a tih.
14. I bang nal var chu sukchim ka ta, hnuoiah tlu sop a ta, a lungphumhai hung dawk vong a tih. A chim pha leh thi veng in ta, chu pha chun LALPA chu ka nih ti hung hre tang in tih.
15. Chuong ang chun bang le a nal vartu chungah ka lungsenna hrik thlang ka ta, 'Bang chu a um ta naw a, a nal vartuhai khom an um ta bok nawh' la ting ka tih.
16. Chuong ang chu Israel zawlneihai, Jerusalem chungthu hril lawk a, muongna um si loa muongna um anga inlarna hmutuhai chan chu ning a tih" ti hi Lalpa PATHIEN thu suok a nih.
17. "Tuhin nang mihriem naupa, mani zeldinna hmanga hril lawktu i mi, nuhmeihai hi hmason la, anni kal zawngin an chungthu hril lawk rawh.
18. Lalpa PATHIEN chun hieng hin a tih: Kut ringa zawldi-ai banbun bun a, mihai zawl thlukna dinga hmai dier chi hrang hrang khumtu nuhmeihai chung chu a va pik ngei! Ka mihai awkin nangni in him bik ding maw?
19. Barli tlawmte le bei phek tlawmtein ka mihai zawr hmangin ka hming in suksiet a. Khel ngaithla chak ka mihai chu khel inbain, thi lo dinghai chu in sukhlum a, dam tlak lohai kuomah damna thu in tiem hlak si a.
20. "Chuleiin, Lalpa PATHIEN chun hieng hin a tih: Mihai awkna dinga vate tokdar anga bana zawlaidi in bun hi ka theida a, in bana inthokin pot thlang ka ta, vate anga awk ka mihai chu insuoktir ka tih.
21. In hmai dierhai pot thler ka ta, in kuta inthokin ka mihai insuoktir ka ta, in nuom nuomin awk thei ta naw ti niu. Chu pha chun LALPA chu ka nih ti hung hre tang an tih.
22. Suklungngai ka nuom lo mi indikhai chu khel thuin an lungril in sukhnuol a, mi rilohai inlamlettir tum nekin suolna lampui nghatsan lo dingin in infuipor lem hlak si.
23. Chuleiin, inlarna tehlem in hmuhai hi suktawp ka ta, thumvawra aisan khom thaw ta naw bok in tih. In kuta inthokin ka mihai ka san suok ding a nih. Chu pha chun kei hi LALPA chu ka nih ti hung hre tang in tih' tiin hril rawh" a ta.
←  Ezekiel (13/48)  →