←  Ezekiel (12/48)  →
1. LALPA thu chu ka kuomah a hung tlung a.
2. "Mihriem naupa, hel hmanghai laia um i ni khah! Enna dingin mit an nei a, an hmu thei si naw a, ngaithlakna ding na an nei a, an hriet thei chuong bok naw a, an hel lui pei a nih.
3. Chuleiin, nang mihriem naupa, sun pachangah an mithmua ngei saltangnaa fe ding angin i puonthuo intel la, an hmu lai zingin i umnaa inthok khan hmun dang panin inthok suok rawh; hel hmang sungkuo an nia chu inhriet suoknaa an hmang pha takduoiin.
4. Sunah an hmu lai ngei i Saltangna ding puonthuo chu hung put suok la, zan tieng chun an hmu lai ngei sala intang ding angin suok rawh.
5. An mithmua ngei kul bang chu ver pop la, chu taka chun i thuomhnawhai leh suok rawh.
6. An hmu ngeiah i puonthuo chu liengkoah put la, thimbutah suok rawh. Khuo hmu thei lo dingin i hmai tuom rawh; Israel sungkuohai ta dinga entir lawknaah ka siem che a ni si a" a ta.
7. Chuongchun, thu a mi pek ang chun ka thaw a. Sun vara chun saltanga fe ding angin ka thuomhnawhai chu ka'n tel a. Zan tieng chun ka kutin bang chu ka ver pop a. An hmu zing laiin ka thuomhnawhai chu ka put a, thimbutin ka suokpui a.
8. Zing tieng chun LALPA thu chu ka kuomah a hung tlung a:
9. "Mihriem naupa, hel hmang Israel sungkuohaiin, 'Iem a na i thaw hi?' tia an indon che chun,
10. an kuomah hieng ang hin hril rawh: Lalpa PATHIEN chun hieng hin a tih: Hi thu hi Jerusalema roreltuhai le chu taka cheng Israel sungkuo po po ta dinga inentir lawkna thucha a nih.
11. Keima hi in ta dinga inchikna chu ka nih. Ka thaw ang hin nangni chunga khom thaw ni veng a ta, sala intang dingin thon hmang la ning in tih.
12. Lal Zedekia khomin puonthuo putin thimbutah tlan suok a ta, a suokna dingin bang ver poppek an ta, khuo a hmu thei nawna dingin a mit tuom a tih.
13. Ka len chang zara chun inawk a ta, Kaldaihai ram Babulon tieng thuoi ka ta, sienkhom chu khuo chu a mitin hmu thei loin chu taka chun thing a tih.
14. Ama thangpuitu, a bula um thoktuhai le vengtu sipaihai chu thliin inlen dartir ka ta, kawlhnam phawiin hnot thlur ka tih.
15. Hnam danghai lai hnot dar a, ram tinah ka sukdar pha chun LALPA chu ka nih ti hung hre tang an tih.
16. Amiruokchu, kawlhnam hai, tam hai le hripui hai laka chun mi tlawmte hlang ka tih. Chuonghai chun an saltangna rama mihai hrietah an tirdakumzie po po chu puong an ta, chu pha chun LALPA chu ka nih ti hung hre tang an tih" tiin.
17. Chun, LALPA thu chu ka kuomah a hung tlung a:
18. "Mihriem naupa, inthin hlop hlop pumin i bu fa la, mit arinta rak khopa tiin i tui chu dawn rawh.
19. A ram mipuihai kuomah hieng ang hin hril rawh: 'Hi hi Jerusalem le Israel rama chenghai chungthua Lalpa PATHIEN hril chu a nih: 'An bu chu lungkham takin fang an ta, an tui chu beidong takin dawn bok an tih, anni laia inpawngnekna leiin a ram sunga um po po chu rok faiin a um ding a ni si a.
20. An chengna khawpuihai chu tlu hmat vong a ta, a ram chu rausanin um a tih. Chu pha chun LALPA chu ka nih ti hung hre tang in tih' tiin hril rawh" a ta.
21. LALPA thu chu ka kuomah a hung tlung a:
22. Mihriem naupa, Israel rama thuvar tawi in nei, 'Ni khuo a hung sawt pha inlarna tin chu iengma lo a hung inchang hlak' ti hi ieng tina am a na?
23. Hi thuvar hi sukbo ka ta, Israel ramah tu khomin hril sawng nawk ta ngai naw ni hai. Inlarna tin tlung kimna ni ding chu a hnai tah.
24. Israel mihai laia inlarna tehlem le hmangna bohai le ngai thatna dinga thum vawra inhlemna hrim hrim um ta naw nih.
25. Kei LALPA hin ka hril ding taphot chu hril ka ta, chuonghai chu hlenin um vak a tih. Nangni sungkuo hel hmanghai, in dam lai ngei hin ka hril taphot chu hlen ka tih' ti hi LALPA Pathien thu suok a nih" tiin.
26. LALPA thu chu ka kuomah a hung tlung a:
27. "Mihriem naupa, Israel sungkuo chun, 'Inlarna a hmuhai chu nakie huna ding a na, a thu hril lawkhai khom hla tak hnunga tlung ding chauh a nih' an ti a.
28. Chuleiin, an kuomah, 'Lalpa PATHIEN chun hieng hin a tih: ka thu ieng khom hi sukhnuk um naw ni a, ka hril taphot chu tlung kim a tih' ti hi Lalpa PATHIEN thu suok a nih, tiin hril rawh" a ta.
←  Ezekiel (12/48)  →