←  Ezekiel (11/48)  →
1. Chun, thlarau chun a mi chawi kang a, suo tienga LALPA tempul lutna kota chun a mi'n thum a. Kotkhar bula chun mi sawmhni le panga an lo um a, anni lai chun mipui thuoitu Azur naupa Jaazania le Benaia naupa Pelatia hai khom ka hmu ve a.
2. LALPA chun ka kuomah, "Mihriem naupa, hieng mihai hi an nih suol phier hlaktu le khawpuia thil rilo rot suok hlaktuhai chu.
3. Hienghai hi an nih, 'In bawl hun chu a hung tlung vak el naw dim a ni? Tu hin chu khawpui hi sa bel intlok lai ang a na, eini hi a sa chu ei nih' tituhai chu.
4. Chuleiin, mihriem naupa, an chungthu ding hi hrilpek rawh" a ta.
5. Chun, LALPA thlarau chu ka chungah a hung tlung a, ama chun ka kuomah, "Hril rawh, LALPA chun hieng hin a tih: Aw Israel sungkuohai, chuong ang chun in hril hlak hrim a, in lungrila thil umhai chu ka hriet fai vong si a.
6. Hi khawpuia hin mi tam tak in that tah a, a kotthlerhai chu mithi ruongin in suksip hlak kha.
7. Chuleiin, Lalpa PATHIEN chun hieng hin a tih: a sa chu mithi ruong in peihai chu an na, a sa bel chu khawpui hi a nih. Sienkhom, chu taka inthok chun hnot suok ka ti cheu.
8. Kawlhnam in ti a, kawlhnam ngei chu in chungah hung tir ka tih, Lalpa PATHIEN chun a tih.
9. Khawpuia inthoka hnot suokin, ram dang mihai kutah peng ka ti cheu a, hrem ka ti cheu.
10. Kawlhnamin thing in ta, Israel ramri sung ngeiah in chunga ka thu rel chu hlen ka tih. Chu pha chun LALPA chu ka nih ti hung hre tang in tih.
11. Hi khawpui hi in sa bel ni ta naw ni a, a sa khom ni bok naw ti niu. Israel ramri sunga ngei ka thu rel chu hlen ka tih.
12. Chu pha chun LALPA ka nizie hrieng in tih, ka thu ruothai zui loin, ka danhai vong bok loin, in kawl le kienga hnam danghai ching dan in zawm hlak si a' a ti a nih" tiin.
13. Chuonga ka hang hril lai chun Benaia naupa Pelatia chu a tlu a, a thi el ta a. Chu phing leh ka bokkhup a, inring takin, "E khai! Lalpa PATHIEN, Israel mi i hla sunhai hi i suksiet vong el ding a ni?" ka ta.
14. LALPA thu chu ka kuomah a hung tlung a,
15. "Mihriem naupa, i unauhai, i chi le kuong Israel sungkuohai hi an nawm Jerusalem hluotuhaiin, 'LALPA an hlat nasa em a, hi ram hi kan kutah a mi pek a nih' tia an hrilhai kha!
16. "Chuleiin, an kuomah hieng hin hril rawh: Lalpa PATHIEN chun hieng hin a tih: Hnam danghai lai ram hla takah son hmangin, ram tinah the dar lang khom, an fe dar sunga an umna hmun taphota chun an biekbuk ka ni pei a nih.
17. Chuleiin, Lalpa PATHIEN chun hieng ang hin a tih: 'Hnam danghai laia inthokin thuoi khawm nawk ta ti cheu a, in um darna rama inthokin la khawm nawk vong ka ti cheu a, Israel ram chu pe nawk ka ti cheu' tiin.
18. "Chu taka inthok chun hung kir nawk an ta, thil porche le milem tirdakumhai po po chu inthiel fai vong an tih.
19. Lungril hmun khat inneitirin, lungril thar peng ka ta; lung anga sakhat an lungril ngar chu la hmangin, taksa anga innem lungril peng ka tih.
20. Ka thupekhai zawm tang an ta, ka danhai fimkhur takin vong tang an tih. Ka mihai ning an ta, an Pathien ning ka tih.
21. Sienkhom, an thil tirdakum le porche la ngaina zingtuhai ruok chu an thilthaw maw an lu chungah bun thlang ka tih' tiin Lalpa PATHIEN chun a hril" tiin.
22. Chuongchun, cherubhai chu an vuong a, tawlailirhai chun an zui a, an chungah Israelhai Pathien ropuina chu a um a.
23. Khawpui sunga inthok chun LALPA ropuina chu a suok a, suo tieng tlanga chun a ngir a.
24. Kei khom thlarau chun a mi chawi kang a, Pathien thlarau inlarna chun Babulon rama saltanghai lai a mi thuoi a. Chu phing leh inlarna ka hmu chun chung tieng a mi fesan a.
25. LALPA thil mi'n hmutir po po chu saltanghai kuoma chun ka hril ta a.
←  Ezekiel (11/48)  →