←  Ezekiel (10/48)  →
1. Ka hang en a, ngai ta, cherub-hai lu chunga van zau tak inkum kula chun safir lunga siem ni awm tak lalthungpha ka hmu a.
2. LALPA chun puon zai inhmia inthuom kuoma chun, "Cherub hnuoia tawlailir ke inkara khun zu lut la, cherub-hai inkara meiling khu i kut khing hni sipin zu luok la, khawpui chungah the dar rawh" a ta. Ka thlir zing lai chun ama chu a fe a.
3. A lut lai chun cherub-hai chu tempul sim tieng pangah an ngir a, tuolpuk chu sumin a sip mup a.
4. LALPA ropuina chu cherubhai chunga inthok chun tempul tuonga chun a tum thla a. Tempul chu sumin a bawm a, LALPA ropuina chun a elvar phut a.
5. Cherubhai thla zap ri chu tempul tuol puo tienga inthok khomin Iengkim LALPAN mi a biek laia a rawl ang elin a'n hriet thei a.
6. LALPA chun puon zai inhmia inthuom kuoma chun, "Cherub-hai inkara tawlailir ke bula mei saw va la rawh" tiin thu a pek a, ama chu a lut a, tawlailir ke bula chun a ngir a.
7. Cherub laia pakhat chun cherub danghai le an inkara mei chu a ban a, a lak a, puon zai inhmia inthuom kuoma chun a pek a, ama chun a lak a, a hung suok a.
8. Cherub-hai chun an thla hnuoiah mihriem kut ang hi an nei seng a.
9. Chun, ka hei en a, cherubhai bula chun tawlailir pali, cherub pakhat bulah tawlailir pakhat pei, ka hmu a, tawlailirhai chu krisolit lung angin an tle sur a.
10. An inlang dan chu, an pali chun an inang vong a, tawlailir ke kuol sunga tawlailir ke kuol dang um ang a nih.
11. An hang inlir chun inher chuong loin cherubhai nghatna tieng tieng an inlir thei a.
12. An pumin, an hnung tienga hai, an kuta hai, an thlaa hai le tawlailir ke kuola hai khom chun mit a sip a.
13. Tawlailir kehai chu ka hriet ngeiah 'virvut' an ti a.
14. Cherub tinin hmel pali an nei seng a, hmel pakhatna chu cherub hmel a na, pahnina chu mihriem hmel a na, pathumna chu sakeibaknei hmel a na, palina chu mupui hmel ang a nih.
15. Chun, cherubhai chu an tho a. Hienghai hi Kebar vadung kawla ka hmuhai chie kha an nih.
16. An fe chun an bula tawlailirhai chu an inlir ve pei a, an vuong suok leh tawlailir kehai chun an zui pei bok a.
17. Anniah thilhringhai thlarau chu a um leiin, cherubhai chu an ngir leh tawlailirhai khom chu an ngir ve a, an vuong leh an vuong ve pei el a nih.
18. Chu zoa chun LALPA ropuina chun tempul tuong chu a maksan a, cherubhai chunga chun a chawl a.
19. Chuonga ka thlir zing lai chun cherubhai chun thla an zar a, hnuoia inthok chun an vuong tung a, tawlailirhai chun an zui ve pei a. LALPA tempul suo tieng kotsuoa chun an chawl a, Israel Pathien ropuina chu an chungah a um a.
20. Hienghai hi Kebar vadunga Israelhai Pathien hnuoia ka thilhring hmuhai chie kha an na, cherub ruol an nih ti ka hung hriet ta a.
21. Mi tinin hmel hrang pali le thla pali an nei seng a, an thla hnuoia chun mihriem kut ang kut an nei seng bok a.
22. Chun, an hmel chu Kebar vadunga ka hmuhai ang char kha an nih. Mi tinin an hma zawn sengah khaw tieng tieng khom an pan thei.
←  Ezekiel (10/48)  →