Ezekiel (1/48)  →
1. A kum sawmthumna, thla lina,ni nganaaa Juda saltanghai lai Kebar vadung kama ka um laiin van a hung inhong a, Pathien inlarna ka hmu a.
2. Chu thla a ni ngana chu sala lal Jehoiachin intanga inthoka a kum ngana a nih.
3. Kei thiempu Ezekiel, Buzi naupa kuoma hin Babulon rama Kebar vadung kamah LALPA thu chu a hung tlung a, LALPA kut chu ka chungah a um a.
4. Ka hei en a, hmar tienga inthoka thlipui hung inthok ka hmu a, sumpui intur ngula inthok chun kawl a hung inphe zor zor a, a kawl vel chu a el var phut el a. Kawl inphetnaa mei chu thir inling ang a nih.
5. Chu meilinga chun thilhring pali ni awm tak, mihriem ruongam put ni si hi, ka hmu a.
6. Thilhring tin chun hmai pali le thla pali an nei seng a.
7. An ngal a tlun a, an ke tin chu bawng ke tin ang a na, dar nawt tlet angin a tle phut a.
8. Hmai pali le thla pali bakah an thla hnuoia chun kut, mihriem kut ang hi an nei seng a.
9. An thlahai chu intawk phak vongin an zar a. Chu thilhringhai chu inhem ngai loin khaw tieng tieng khom an vuong suok thei nghal a.
10. Thilhring palihai inlang dan chu an hma tieng mihriem hmel, an chang tieng sakeibaknei hmel, an voi tieng bawngchal hmel, an hnung tieng mupui hmel ang a nih.
11. Chu chu an hmel put dan a nih. An thla pahni seng chu an thla ki intawk phakin an zar a, an thla pahni dang chun an taksa an inkhum a.
12. Thilhring palihai chu khaw tieng khom inhem kuol ngai loin thlarau fena tieng tieng chun an fe nghal thei a.
13. Thilhringhai hmel chu meiling amanih meiser chok lai amanih ang a na, anni lai chun mei var tak a lawn kuol a, chutaka inthok chun kawl a hung inlep a.
14. Thilhringhai chu kawlphe anga hratin an invir ton zok zok a.
15. Thilhring pali, hmai li seng neihai chu ka en zing laiin, an sir senga chun tawlailir, hnuoia innghat ka hmu bok a.
16. Tawlailirhai chu an inang vong a, lunghlu krisolit angin an var phat seng a, tawlailir ke kuol sunga tawlailir ke dang um ang hi a nih.
17. Inher loin khaw tieng ngha khomin an inlir thei a.
18. Tawlailir ke kuol chu lien tak le rapum tak a na, a rei kuol tlang chu mit ngotin a sip a.
19. Thilhringhai chu an che son pha leh tawlailirhai khom chun an zui pei a, an tho leh an tho ve pei a.
20. Thilhringhai chu thlarau fena tieng tieng an fe a, tawlailirhai khom chun an zui pei a, tawlailir kea chun thilhringhai thlarau chu a um a nih.
21. Thilhringhai chu an fe pha tawlailirhai khom an fe a, an ngir pha an ngir ve a, hnuoia inthoka an inkang pha an inkang ve pei a, tawlailir kea chun thilhringhai thlarau chu a um si a.
22. Thilhringhai lu chunga chun boruok inkum ang zau tak, rapum deu el, vur anga tle sur el hi a'n zar duoi a.
23. Chu inchung zau tak hnuoia chun thilhringhai chun an thla ki intawkin an thla pahni seng chu an zar a, an thla pahni dang chun an taksa an inkhum a.
24. An vuong laia an thla zap ri chu tuipui insok ri ang le sipai ruol hawhaw ri le Iengkim Pathien rawl ang a nih. An vuong naw pha leh an thlahai chu an inkhup a.
25. Vuong loa thla inkhupa an chung inkhumna zau tak hnuoia an um lai chun an lu chung tienga inthok chun rawl a hung suok a.
26. An lu chunga chun lalthungpha ni awm tak, safir lunghlu ang ela inlang hi a um a, chu hmun insang tak chunga lalthungphaa chun mihriem ni awm tak hi a'n thung a.
27. A kawnga inthoka chung tieng chu dar tle sut angin ka hmu a, a kawng hnuoi tieng chu mei chok angin ka hmu bok a, var ropui takin a tuom vel a.
28. Raw sur zoa sumrisang inzam ang phutin a vela chun a'n zam a. Hi hi Pathien ropuina inlang dan chu a nih. Chu chu ka hmuin bokkhupin ka tlu a, a mi betu rawl chu ka hriet a.
      Ezekiel (1/48)  →