←  Exodus (8/40)  →
1. Chun, LALPAN Mosie kuomah, "Faraw kuomah fe la, hieng hin hril rawh: 'Ka mihai infetir rawh, an mi chawibiek theina dingin.
2. An suok ding i phal naw chun a ram pumah utok intamtir ka tih.
3. Nile vadung hi utokin sip an ta, i lal ina chen hungin, i riekna pindana hai, i khum chunga hai, i thoktuhai le i mipuihai ina hai, in thuk sunga hai, bei tlang in hmetna thlenga hai hung lut sup sup an ta,
4. nang le i mipuihai le i thoktuhai panga chen khom invak sup sup an tih' tiin" a ta.
5. Chun, Pathienin Mosie kuomah, "Aron kuomah hieng hin hril rawh, 'I kutah hmol chawiin, vadung le tui lam le dil chunga hai i hmol chu inlet la, Aigupta ram chungah utok hung intam raw se'ti rawh" a ta.
6. Chuongchun Aron chun Aiguptaa tui chunga hai chun a ban a phar a, utok an hung suok a, a ram phekin an hung intam a.
7. Sienkhom, an mitdawivaihai chun an thiemna ruk hmangin chuong ang chun an thaw ve a, hnuoi chunga chun utok an hung insuoktir ve a.
8. Faraw chun Mosie le Aron chu a'n kotir a, an kuomah, "Kei le ka mipuihai laia inthoka utok hi la hmang dingin LALPA kuomah mi hnipek unla, in mipuihai chu LALPA kuoma inthawina inhlan dingin infetir ka tih" a ta.
9. Mosie chun Faraw kuomah, "Nile vadunga um lai ti lo po po, nang le i thoktuhai le i mipuihai laia inthoka utok la hmang dinga i ta dinga ngenna ka neipek hun ding che chu nangman hung ruot rawh" a ta.
10. Faraw chun, "Zingah ni raw se" a ta. Mosie chun, "I ti ang chun ni raw se, LALPA kan Pathien ang hi an um nawh ti i hriet theina dingin.
11. Utokhai chun nang le i in, i thoktuhai le i mihai in chu suoksan vong an ta, Nile vadunga chauh um tang an tih" a ta.
12. Mosie le Aronin Faraw an maksan hnungin Mosie chun Faraw chunga utok a'n tamtir chungthuah LALPA a ko a.
13. LALPA chun Mosie ngen angin a thawpek a, in le tuol lai le rama utokhai chu an thi ta vong a.
14. Utok thi chu an deng vum hner hnur a, a ram phekin a thu vut vut a.
15. Chuonga an hung re nawk ta phing leh Faraw chun a lungril a sukkhau a, LALPA lo hril tah ang khan, an thu chu a ngaithlak nuom ta naw a.
16. Chun, LALPA chun Mosie kuomah, "Hieng hin Aron hril rawh" 'I hmol kha inlet la, pilvut vaw la, Aigupta ram po poa pilvut chu hrikind hung inchang a tih" a ta.
17. Chuong ang chun a thaw a, Aronin a hmol a hang inlet a, hnuoia pilvut a vuok charin Aigupta rama pilvut po po chu hrikin an hung inchang a, sa le mihriem hai chu an hung baw a.
18. An mitdawivaithiemhai chun an thiemna ruk hmanga thaw ve an tum a, an hlawsam der a. Hrik chun sa le mihriem hai chu an bawm a.
19. Mitdawivaithiemhai chun Faraw kuomah, "Hi hi Pathien kut a nih"e an ta. Sienkhom, Faraw lungril chu sukkhauin a um a, LALPA hril tah angin, an thu chu a ngaithlak nuom chuong nawh.
20. LALPA chun Mosie kuomah, "Zingkar inhma takin tho la, insil dinga Faraw a fe lai va nangching la, hi thu hi va hril rawh: Hieng hin LALPA chun a hril: 'Ka mihai infetir rawh, an mi chawibiek theina dingin'.
21. Ka mihai i'n suoktir naw chun nang le i thoktuhai le i mihai inah tho hon hung tir ka ta, Aigupta mihai in po po chu thoin sip an ta, an chengna ram po po khom thoin sip an tih.
22. Chu ni chun ka mihai umna Goshen ramah tho hrim hrim an um ve nawna dingin anni chu thlier hrang ka ta, chuongchun LALPA chu ka nih ti hung hre thei in tih.
23. Chun, ka mihai le i mihai chu thlier hrang ka tih. Hi inchikna thil mak hi zingah hung tlung a tih' tiin hril rawh" a ta.
24. Chuong ang char chun LALPAN a thaw a, Faraw in le a thoktuhai ina chun tho an hung vuong lut ta hum hum el a, Aigupta ram hmun tin el chu thoin an suksiet a.
25. Chuongchun, Faraw chun Mosie le Aron chu a'n kotir a, "Fe unla, hi rama hin in Pathien kuoma chun va'n thawi el ro" a ta.
26. Mosie chun, "Chu chu thil fel ni naw nih. LALPA kan Pathien kuoma kan inthawina chu Aigupta mihai tirdak zawng ning a tih. An tirdak zawng a lo ni chun, lungin an mi deng naw ding maw?
27. Ama thupek angin, LALPA kan Pathien kuoma inthawi ding chun hi taka inthoka ni thum lam thlalerah kan fe a ngai a nih" a ta.
28. Faraw chun, "LALPA in Pathien kuoma inthawi dingin thlalerah infetir ka ti cheu, amiruokchu fe hla naw ro. Tu hin mi tongtaipek raw leh" a ta.
29. Mosie chun, "Ka suoksan char che hin LALPA kuomah ngen ka ta, zinga hin Faraw le a thoktuhai le a mipuihai chu thoin inkiengsan an tih. Amiruokchu, LALPA kuoma inthawia an fe ding chu phal nawk lo a, dawhaa inhlem nawk ta lo ding a ni thua hin Faraw hi chieng phot sien" a ta.
30. Chuongchun, Mosie chun Faraw chu a maksan a, Pathien kuomah a tongtai a.
31. LALPA chun Mosie ngen ang takin a thawpek a, Faraw le a thoktuhai le a mipuihai kuoma inthokin tho tlimpui chu a hawl hmang a, pakhat hlekte khom an um ta nawh.
32. Chu tum khom chun Faraw chun a lungril a sukkhau a, mihai chu an suoktir phal nawh.
←  Exodus (8/40)  →