←  Exodus (7/40)  →
1. LALPA chun Mosie kuomah,"Ngai ta, Faraw ta dingin Pathien ang hielin ka siem che a, i unaupa Aron chu i zawlnei ning a tih.
2. Hril dinga thu ka pek taphot che chu puong suok i ta, i unaupa Aron chun Faraw kuomah a rama inthoka Israelhai po po insuoktir dingin hril raw se.
3. Amiruokchu, Faraw lungril sukkhauh ka ta, Aigupta ramah inchikna thil mak sukpung ka ta, sienkhom ngaithla naw ni che.
4. Chu pha chun Aigupta chungah kut thlak ka ta, ropui relin ka mi Israelhai chu thuoi suok ka tih.
5. Aigupta chungah kut inlen a, Israelhai ka thuoi suok pha chun kei hi LALPA chu ka nih ti hre tang an tih" a ta.
6. Mosie le Aron chun LALPA thupek ang charin an thaw a.
7. Faraw kuoma thu an hril lai hin Mosie chu kum sawmriet mi a ni ta a, Aron chu kum sawmriet pathum mi a ni tah.
8. LALPA chun Mosie kuomah,
9. "Farawin, 'Thil mak thaw ro' a ti pha leh nangin Aron kuomah, 'I hmol kha la la, Faraw hmaah pei la, rulin inchang a tih' tiin hril rawh" a ta.
10. Chuongchun, Mosie le Aron chu Faraw kuomah an fe a, LALPA thupek ang char chun an thaw a. Aron chun Faraw le a thoktuhai hmaah a hmol chu a pei a, rulin a hung inchang a.
11. Faraw khomin a mi varhai, dawithiemhai le mitdawivai thiemhai chu a ko ve a, anni khomin an mitdawivai thiem ruk chu hmangin chuong ang chun an thaw ve a.
12. An hmol chu an hang pei seng a, rulin an inchang ta vong a. Amiruokchu, Aron hmol chun hmol dang po po chu a lem vong a.
13. Chuong sa khom chun Faraw chun a lungril a sukkhau zing a, LALPAN a hril ang khan, an thu a ngaithlak nuom nawh.
14. LALPA chun Mosie kuomah, "Faraw lungril a la khau zing a, mihai chu a la'n suoktir phal nawh.
15. Zingkar leh Faraw tui insilna ding hmuna chun fe la, ama chu hmu dingin Nile vadung kamah lo nghak la, rula inchang thei i hmol kha chawi bok rawh.
16. Chun a kuomah hieng ang hin hril rawh: 'LALPA, Hebrai mihai Pathien chun hi thu hi i kuoma hril dingin a mi tir a nih: thlalera an mi chawibiek theina dingin ka mihai hi infetir rawh ka tia chu tu chen hin i la bengkhon nuom nawh.
17. Chuleiin, LALPA chun hieng hin a tih: Hi hin LALPA ka nizie chu hrieng in tih: Ngai ta, ka kuta ka chawi hmol hin Nile vadung chu vuong ka ta, thisenin inchang a tih.
18. Nile vadunga ngahai chu thing an ta, a vadung chu thu vong a ta, a tui chu Aigupta mihaiin dawn naw ni hai' tiin hril rawh a mi tih" a ta.
19. Chun, LALPAN Mosie kuomah, "Hieng hin Aron kuomah hril rawh: i hmol kha kutin chawi la, Aiguptaa vadungpui hai, vadungte hai, tui lam hai, dil hai le tui intling khawmna taphot chungah inlet la, tui po po chu thisenah inchang a tih. Aigupta ram po po chu thisenin sip a ta, thing kuong le lung bela tui um po po khom thisenah inchang a tih' tiin hril rawh" a ta.
20. Mosie le Aron chun LALPA thupek ang charin an thaw a, hmol chu a hang inlet a, Faraw le a thoktuhai po po hmua ngei chun tui chu a vuok a, chuongchun vadunga tui po po chu thisenin a hung inchang ta vong a.
21. Vadunga nga chu an thi vong a, vadung chu a thu vut vut a, Aigupta mihai chun tui chu an dawn nuom ta naw a, thisen hlak chu Aigupta ram sung po poah a um vong el si a.
22. Aigupta rama mitdawivaihai khomin an thiemna ruk hmangin chuong ang chun an hang thaw ve a, chu chun Faraw lungril a sukkhau a, LALPAN a hril tah ang khan, an thu le hla a ngaithlak nuom chuong nawh.
23. Ngaithla nek hmanin Faraw chu a in tieng a fe a, lungkham khom a lungkham zui nawh.
24. Vadung tui chu an dawn thei si naw leiin Aigupta mi po po chun tui dawn ding zongin Nile vadung kam vel chu an cho ta sup sup a.
25. Pathienin Nile vadung a vuoka inthokin ni sari zet a ni ta a.
←  Exodus (7/40)  →