Exodus (5/40)  

1. Chu hnunga chun Mosie le Aron chu Faraw kuomah an fe a, "LALPA Israelhai Pathienin hieng hin a tih: 'Ka mihai hi thlalera ka kuoma kut an hmang theina dingin infetir rawh' tiin" an ta.
2. Faraw chun, "A thu awi a, Israelhai kan suoktir ngotna san ding LALPA chu tu am a na? Chu LALPA chu ka hriet ngai nawh; Israelhai khom insuoktir bok naw ning" a ta.
3. Anni chun, "Hebraihai Pathien chun a mi hung kan a. Tu hin hi taka inthoka ni thum lama hla thlalerah fe a, LALPA kan Pathien kuoma kan inthawi theina dingin lunginsiet takin mi'n fetir rawh, chuong naw chun hripui amanih kawlhnam amanih hung inlengtir rawi a tih" an ta.
4. Aigupta lal ruok chun, "Mosie le Aron, ieng dinga an sin thaw buoi laia hieng mipuihai hi thuoi hmang phet in tum am a na? In sin seng va thaw tok tok ro" a ta.
5. Faraw bok chun, "En ta u, a ram mipui hi an tam ta hle a, an sin in hung sukchai nasatzie hih!" a ta.
6. Chu ni la la chun sinthaw vengtuhai le an hotuhai kuoma chun,
7. "Tuta inthok chu kha hma ang khan teklei siemna dingin bupawl pe ta naw ro, anni ngeiin inzong chop raw hai se.
8. A hmaa an siem zat tho siem dingin tuk unla, suktlawm chuong naw ro. An tha a bo a, chu leia 'Kan Pathien kuomah fein va'n thawi kan tih' tia inphin an ni hi.
9. Pasalhai sin sukrik zuol unla, khel thu an ngaisak hman nawna dingin chawl loin sin inthawtir ro" a ta.
10. Chu ni ngei chun sinthaw vengtuhai le an hotuhai chun, "Faraw thupek angin, tuta inthok chu bupawl pek ni ta naw ti niu.
11. Nangnin bupawl chu in hmu theina ang anga inthokin la khawm ro. In sina tuk zat chu suktlawm ni bok naw nih" tiin mipui chu an hril a.
12. Chuongchun, mipui chu Aigupta ram hmun tinah bupawl aia hmang ding bu kung bul la khawm dingin an fe dar ta chum chum a.
13. Sinthaw vengtuhai chun, "Bupawl in dong laia in thaw suok zat bok kha ni tin in thaw suok ding a nih" tiin an nor zing bok a.
14. Chun, sinthaw vengtuhaiin Israel mi hotua an ruothai chu, "Iengtiziea zani le voisun hin kha hma ang boka teklei in siem zat dinga bituk chu in la siem zo naw?" tiin an vuok a.
15. Chuongchun, Israelhai hotuhai chu Faraw kuomah an fe a, "I siehlawhai hi ieng dinga hieng lawm lawma i mi soisak am a na?
16. I siehlawhai hi bupawl hrim hrim i pek ta naw a, i mihai hlak chun, 'Teklei siem ro' tiin an mi nor zing bok si. I siehlawhai hin an mi vuok a, sienkhom a thaw indik nawtu chu i mihai an ni lem sia" tiin an beidong thu an va'n tlun a.
17. Ama ruok chun, "In tha a bo annawm, mi thabo ruol in nih. In thabo lei annawm, 'LALPA kuomah va'n thawi kan tih' in ti hi.
18. Chuleiin, fe unla, in sin va thaw ro. Bupawl pek ni ta nawng in ta, sienkhom teklei siem zat dinga an bituk cheu chu in siem zo hrim hrim ding a nih" a ta.
19. Ni tina teklei siem zat dinga an bituk chu suktlawm a ni chuong naw ding thu Israel hotuhaiin an hriet chun an chan sietzie chu an hmu suok a.
20. Faraw ina inthoka an hung suok chun lampuia ngir Mosie le Aron chu an hmu a, an kuomah,
21. "Faraw le a siehlawhai mithmuah tirdakum in mi'n kaitir a, an mi thatna dingin kawlhnam an kutah in sie leiin LALPA chun nangni enin in chungthu rel raw se," an ta.
22. Chun, Mosie chu LALPA tieng a ngha a, "Aw LALPA, hi mihai chunga hin ieng leia buoina i siempek am a na? Hi ding lei hin a ni maw i mi tir chu?
23. Faraw kuoma i hminga thu ka va hril nia inthokin hi mihai chunga hin harsatna a'n tluntir a, i mihai hlak chu i hung san bok si nawh" a ta.

  Exodus (5/40)