← Exodus (40/40) |
1. | LALPA chun Mosie kuomah, |
2. | "A thla khatna ni khatnaah Intuokna Puon in biekbuk chu inngir rawh. |
3. | A sungah Thuthlung Bawm chu sie la, puonzarin hlie khum rawh. |
4. | Dawkan la lut la, a umna ding taka chun sie rawh. Khawnvar siena la lut bok la, a khawnvarhai inbuk rawh. |
5. | Rimtui rawna rangkachak maicham chu Thuthlung Bawm hmaah sie la, biekbuk lutna kotah puonzar zar rawh. |
6. | "Biekbuk lutna kot hmaiah pumraw inhlanna maicham chu innghat la, |
7. | maihun chu Intuokna puon in le maicham inkarah sie la, tui sie bok rawh. |
8. | Biekbuk tuolpuk ding a velin rem la, tuolpuk lutna kota chun puonzar zar rawh. |
9. | "Hriek nal chi chawi la, biekbuk le a sunga um po po chu hriek nal la, a cheina thilhai chenin inhlan thienghlim vong la, chuongchun hung thienghlim a tih. |
10. | Chu zoah pumraw inhlanna maicham le a bur le bel po po nal la, maicham chu inhlan thienghlim la, chuongchun hung thienghlim a tih. |
11. | Maihun le a thut chu hriek nal la, inhlan thienghlim rawh. |
12. | "Aron le a naupahai chu Intuokna Puon in kotah hung thuoi la, dan angin tui insil raw hai se. |
13. | Chu zoah Aron chu silfen thienghlim inhaktir la, hriek nal la, thiempu nia ka rong a bawl theina dingin inhlan thienghlim rawh. |
14. | A naupahai hung thuoi la, korfuol inhaktir tawl rawh. |
15. | Chuongchun, thiempu sin chu thaw a, ka ta dinga rong an bawl theina dingin, an pa hriek i nal ang bok khan anni khom hriek nal ve rawh. Hriek nal an ni hnung chun an thlahai chen khom thiempu hung ni zui pei tang an tih" tiin a hril a. |
16. | Mosie chun LALPA thupek angin iengkim a thaw a. |
17. | Chuongchun, Aigupta an suoksana inthoka kum hnina thla hmasa tak le ni hmasa taka chun biekbuk ding chu bawl zo a ni ta a. |
18. | Mosie chun biekbuk bulthut chu a rem hmasa phot a, a bang phekhai chu a'n tung a, a bangruhai chu a rol a, a banhai chu a phun a. |
19. | LALPA thupek angin, biekbuk chung chu puonin a zar khum a, a chungkhum a'n thuo bok a. |
20. | Chun, Thuthlungna lungphek pahni chu a lak a, Thuthlung Bawma chun a sie a, a zawnfunghai chu a rol lut a, a chunga chun zangaina thungpha chu a sie a. |
21. | Thuthlung Bawm chu biekbuka chun a hung chawi lut a, LALPA thupek angin puonzar a zar khum a, Thuthlung Bawm chu an hlietir a. |
22. | Mosie chun dawkan chu Intuokna Puon in sung, biekbuk hmar tieng, puonzar puo tieng chun a sie a. |
23. | LALPA thupek angin dawkan chunga chun LALPA hmaah hlanbei a sie a. |
24. | Khawnvar siena chu Intuokna Puon in sung, biekbuk sim tieng, dawkan epa chun a sie a. |
25. | LALPA thupek ang takin khawnvarhai chu LALPA hmaa chun a sie a. |
26. | Mosie chun rangkachak maicham chu Intuokna Puon in sung, puonzar hmaa chun a sie a. |
27. | LALPA thupek angin maicham chunga chun rimtui a raw a. |
28. | Chun, biekbuk lutna kota chun puonzar a zar a. |
29. | Pumraw inhlanna maicham chu Intuokna puon in biekbuk kot bula chun a sie a, LALPA thupek angin a chunga chun pumraw thilhlan le fak ding thilhlan chu a'n hlan a. |
30. | Maihun chu Intuokna Puon in le maicham inkarah a sie a, insawpna ding tui a sie bok a, |
31. | chu chu Mosie le Aron le a naupahaiin kut le ke sawpna dingin an hmang a. |
32. | Mosie kuoma LALPA thupek angin, Intuokna Puon in an lut ding zat le maicham bula an fe ding zatin an insawp hlak. |
33. | Chu zoah Mosien biekbuk le maicham vela chun tuolzawl a siem a, tuolzawl lutna kota chun puonzar a zar a. Chuong ang chun Mosie chun a sin chu a zo ta a. |
34. | Chu zoah, Intuokna Puon in chu sumin a hung tuom ta mup a, biekbuk chu LALPA ropuinain a hung hluo sip a. |
35. | Chuonga sum a zing mup lei le LALPA ropuinain biekbuk chu a hluo sip leiin Intuokna puon in sunga chun Mosie khom a lut thei ta naw a. |
36. | Israelhai inzin sung po po chun, sumin biekbuk a'n kiengsan pha chauh an riebuka inthokin an inson suok hlak. |
37. | Sumin a baw sung chu an fe son ngai nawh. |
38. | Thlalera Israelhai inzin sung po po an mithmu ngeiah LALPA sum chu sunah biekbuk chungah inzamin, zanah zankhuoin meichokin a um hlak. |
← Exodus (40/40) |