←  Exodus (4/40)  →

---

1.

Mosie chun, "Mi ringhlela ka thu ngaithla loin, 'I kuomah LALPA inlar naw nih' mi tihai sien, iem a na ka law ding?" a ta.

2.

Pathienin a kuomah, "I kuta i chawi kha iem a na?" a ta, ama chun "Hmol" a ta.

3.

LALPA chun, "Hnuoiah pei rawh" a ta. A pei thlak charin rulin a'n chang a, Mosie chu a tlansie a.

4.

LALPA chun a kuomah, "I kutin ban la, a meia khan man rawh" a ta, a ban a, a hei man chun a hmolah a hung inchang nawk a.

5.

LALPA chun, "Hi hi LALPA, an thlatuhai Pathien, Abraham Pathien, Isak Pathien le Jakob Pathien chu i kuomah a hung inlar ngeizie an ring theina ding a nih" a ta.

6.

Chun, LALPA chun, "I kutin i korfuol mansa kha hang pur rawh" a ta. Mosie chun a pur a, a hang lak suok chun, ngai ta, a kut chu vur anga varin a lo inphar ta vong a.

7.

LALPA chun, "Tu khan i kutin i mansa pur nawk rawh" a ta. Mosie chun a pur a, a hang lak suok chun a kut chu a pang vun dang ang charin a hung um nawk el ta a.

8.

LALPA chun Mosie kuomah, "Inchikna thilmak i thaw voi khatna hi an awi naw a, i thu an ngaithlak naw a ni khomin a voi hnina hi chu awi tang an tih.

9.

Hi inchikna thil mak pahni hi pom lo a, i thu an la ngaithlak naw rop a ni chun, Nile vadung tui zu thal la, chu chu hnuoi charah bun thla la, tui chu thisenah hung inchang el a tih" a ta.

10.

Mosie chun LALPA kuomah, "Aw LALPA, kei hi chu kha hma le i siehlaw i biek hnung khom hin, mi bau themthiem ka ni ngai naw a, pa dangawk le muong taka thu hril mi ka ni si a" a ta.

11.

LALPA chun a kuomah, "Mihriem bau hi tu pek am a na? Tong thei lo le naseta siemtu chu tu am a na? Tu am a na mit sukvara sukdel theitu? Kei, LALPA hi ka ni naw am a ni?

12.

Tu hin fe el rawh, tong dan zirtir ka ti che a, i hril dinghai chu hril pei ka ti che" a ta.

13.

Mosie chun, "Aw LALPA, hi thilthaw ding hin chu mi dang tir lem el ta la" a ta.

14.

LALPA chu Mosie chungah a lungsen a, a kuomah, "I unaupa Aron, Levi chia mi hi teh? Ama hi chu a bau a themthiem ti ka hriet. Nangma hmu ding chein a hung nghe nghe a, a hmu pha che chu a lungril lawm a tih.

15.

Ama chu inbiekpui la, a bauah thu hi tu rawh; in pahnia in tong dan ding le thaw ding chu hril pei ka ti cheu.

16.

Ama chu mipuihai kuoma i thu hril sawngtu, i ta dinga bau ning a ta, nang chu ama ta dingin Pathien ang ning i tih.

17.

Amiruokchu, inchikna thil mak i thawna dingin hi hmol hi chawi rawh" a ta.

18.

Mosie chu a tarpupa Jethro kuomah a kir nawk a, a kuomah, "Aigupta rama ka mihai zu kan a, a dama muol an la um am ti en dinga ka fe mi phalpek rawh" a ta. Jethro chun, "Ni e, thlamuong takin fe rawh" a ta.

19.

Chun, Midian rama chun LALPAN Mosie kuomah, "Aigupta ramah kir nawk ta la, a that tumtu che po po kha an thi ram vong tah" a ta.

20.

Chuongchun, Mosie chun a nuhmei le a naupahai chu sabengtung chungah a'n chuongtir a, Aigupta panin an inthok suok a. Chun, a kutin Pathien hmol chu a chawi a.

21.

LALPA chun Mosie kuomah, "Aigupta ram i tlung pha chun inchikna thil mak thaw theina ka pek che hi Faraw hmaah i thaw ding a nih. Sienkhom a lungril sukkhaupek ka ta, mihai chu insuoktir phal el naw nih.

22.

Chu pha chun Faraw kuomah hieng hin hril rawh: 'Hi hi LALPA thu chu a nih: Israel hi ka nau lutir a na,

23.

ka naupa chun ka rong a bawl theina dingin insuoktir rawh khai, ka ti a, i'n suoktir phal naw vei a, chuleiin i naupa, i nau lutir chu sukhlum ka tih, a tih' ti rawh" a ta.

24.

Chun, lampuia an riekna hmuna chun LALPAN Mosie chu a zu sir a, a sukhlum hman vang a.

25.

Ziporra chun lung sir ngei a lak a, a naupa ser vun chu a tan thlak a, chu chun Mosie ke chu intawktirin, "Nang hi ka ta dingin pasal, thisen insuo hmang i lo ni ngei luo hi tie!" a ta

26.

Chuongchun, LALPA chun a tawk ta naw a (Hi taka 'thisen insuo hmang pasal' a ti hin sertan thu a hril a nih).

27.

LALPA chun Aron kuomah, "Mosie tuok dingin thlalerah fe rawh" a ta. Chuongchun, Mosie chu Pathien tlangah a'n tuokpui a, a fawp a.

28.

Mosie chun LALPAN a tir thu po po le inchikna thil mak a'n thawtir dan ding po po chu Aron a hril vong a.

29.

Mosie le Aron chun Israel upahai po po chu an ko khawm a,

30.

LALPAN Mosie kuoma thu a hrilhai po po chu Aron chun a hril sawng nawk vong a, inchikna thil makhai a thaw bok a, mipui chun an awi ta a.

31.

LALPAN Israel thlahai ngaisak a, an rinum tuor nasatzie a hmu tah ti an hriet chun kunin ama chu an chawibiek a.

---

←  Exodus (4/40)  →