←  Exodus (35/40)  →

---

1.

Mosie chun Israel thla sungkuohai po po chu a ko khawm a, an kuomah, "Hieng hi in thaw dinga LALPA thupek chu a nih.

2.

Ni ruk sung sin thawnain hmang in ta, a ni sarina ruok chu in ta dinga ni ser, LALPA chawl ni Sabat a nih. Tu khom hi nia sin thaw lui chu sukhlum ding a nih.

3.

Sabat ni chun in chengna hmunah hrim hrim mei in inkhuk ding a ni nawh," a ta.

4.

Mosie chun Israel thla pungkhawmhai kuomah, "Hi hi LALPA thupek chu a nih:

5.

In thil neia inthokin LALPA ta dingin thilpek hung pe ro. Mani phal ang ang hung chawi ro: rangkachak dam, tangkaruo dam, dar dam;

6.

pat zai dumpawl, senduk le senlar dam, puon zai inhmi dam, kel hmul dam;

7.

beram vun, rong sena nam dam le tui bawng vun dam; sitim thing dam;

8.

khawnvara sit ding oliv hriek dam; hriek nal phaa pol chi mawsawla le rimtui raw ding dam;

9.

thiempu zakuo dar bak le awmbela bel ding onik lung le lunghlu dang dang dam.

10.

"Nangni laia kut themthiem po po hung unla, LALPA hril dan angin hieng po po hi hung siem raw hai se:

11.

biekbuk le puon in le a'n khumna ding dam, a man nghetna ding dam, a bang ding thing phek dam, a bangru dam, a ban dam, a ban thut dam;

12.

thuthlung bawm le a zawnfung le a chunga zangaina thungpha le a hlietu ding puonzar dam;

13.

dawkan le a zawnfung le a hmangruo po po le hlanbei dam;

14.

khawnvar siena le a hmangruohai, khawnvar le a tuia hmang ding hriek dam;

15.

rimtui rawna maicham le a zawnfung dam, hriek nala hmang ding hriek rimtui le rimtui raw ding dam; biekbuk lutna kota zar ding puonzar dam;

16.

pumraw inthawina maicham le dar len inphanhai, a zawnfung le bur le belhai dam; dar maihun le a thut dam;

17.

tuolpuka zar ding puonzar le a banhai le a thuthai dam; tuolpuk kota zar ding puonzar dam;

18.

biekbuk puon in le a tuolpuk puon in kil dena hmangruohai le hruihai dam;

19.

hmun thienghlima rongbawlnaa hmang ding silfen mawi tak taka khawnghai, thiempuhaiin rong an bawl huna hak ding thiempu Aron silfen thienghlim le a naupahai silfen dinghai dam" a ta.

20.

Israel thla pungkhawmhai chu an tin dar ta a.

21.

Lungrila pek nuomna neihai chun Intuokna Puon in le chu taka rongbawlna hmangruo ding le silfen thienghlim siemna dinghai chu LALPA hmaah an hung chawi a.

22.

An phal ang taphot chu a nuhmei a pasalin rangkachak banbun dam, nabe dam, suoi namna kutsebi dam, thi dam le incheina belmawi tinreng dam le rangkachak tlang dam hung pein, LALPA hmaah then thilhlanahs an hung inhlan a.

23.

Chun, pat zai dumpawl, senduk le senlar dam, puon zai inhmi dam, kel hmul dam, beram vun, rong sena nam dam, tui bawng vun dam le an nei taphot chu, an hung chawi khawm bok a.

24.

Tangkaruo le dar pe nuomhai chun LALPA kuomah an hung pek a, sitim thing neihai chun an nei ang ang chu an hung chawi bok a.

25.

Pat them thiem nuhmei po poin pat an kher a, chuong an pat kher a dumpawl, a senduk le a senlar dam, pat zai inhmi dam chu an hung chawi a.

26.

Kel hmul kher thiem nuhmeihai chun phur takin an kher a.

27.

An hotuhai chun thiempu zakuo le a awmbela hmang dingin onik lung le lunghlu dang dang an hung thaw khawm a.

28.

Mawsawla le khawnvara sit ding oliv hriek dam, hriek nala hmang ding hriek rimtui le raw ding rimtui dam an hung chawi bok a.

29.

Chuong ang chun, LALPAN Mosie kuoma siem ding le thaw dinga a ti taphothai siemna dingin Israel mi, a nuhmei a pasalin mani lungril puok suok ang peiin LALPA kuomah thilpek an hung chawi khawm a nih.

30.

Chun, Mosie chun Israelhai kuomah, "Ngai ta u, Juda hnama mi Hur naupa Uria, chu naupa Bezalel chu LALPAN a thlang a,

31.

ama chu chemkalna, theina le hrietna nei ding le kong tinrenga kut themthiemna nei dingin Pathien Thlarauin a sung sip a,

32.

rangkachak le tangkaruo le dar hmanga mawi taka thil siem dan ding riruong thiemna dam,

33.

thiem taka lungmantam kera mawi taka zep thiemna dam, mawi taka thing chei thiemna hai le ze mawi hrang hrang siem thiemna hai damin a'n thuom a nih.

34.

Ama le Dan hnama mi Oholiab, Ahisamak naupa chu mi danghai zirtir thiem theina a pek bok a.

35.

Anni chu thil tinreng thiem taka siem thiemna dam, thaw ding thiem taka riruong lawk theina dam, pat zai dumpawl, senduk le senlar le puon zai inhmi hmanga ze mawi taka khawng thiemna le thui thiemna dam nei dingin lungril varnain a sung sip a.

---

←  Exodus (35/40)  →