←  Exodus (34/40)  →
1. Chun, LALPAN Mosie kuomah, "A hmaa ang bok kha lung phek pahni ser la, lung phek i sukkoi taa thu inziek kha ziekpek nawk ka ti che.
2. Zingah zing tieng siem zo la, Sinai tlangah hung la, tlang sipah ka hmaah hung inlang rawh.
3. Tu khomin an zui ding che a ni naw a, tlangah tu khom an inlang ding a ni bok nawh; beram ruol le bawng ruol khom tlang bula chu tla naw raw hai se," a ta.
4. Chuongchun, Mosie chun a hmaa ang bokin lung phek pahni a ser a, LALPAN thu a pek angin, lung phek pahni chu a kuta chawiin zing inhma takin Sinai tlangah a kai a.
5. LALPA chu sumah a hung tum a, Mosie bula chun a ngir a, LALPA a nizie a hril a.
6. A hma tienga Mosie a fe pel lai chun, "Kei hi LALPA, mi lainattu le lunginsiettu, lung inuoi, hmangaina le ringumnaa sip LALPA Pathien,
7. sang tam tak chunga hmangaina inlangtirtu le an ritlona hai, helna hai le suolna hai ngaidam hlaktu, amiruokchu thiem loa ruothai chu insuo ngai lo le an pahai suolna leia an nauhai le an nauhai nauhai, suon thum suon lina chen khom hrem hlaktu chu ka nih" tiin a puong a.
8. Mosie chun inrang taka bokkhupin a chawibiek a.
9. "Aw LALPA, tuhin i mit ka tlung takzet a ni chun, LALPA chun mi fepui hram raw se. Hnam lulul tak chu an ni ngei el, sienkhom kan ritlona le suolnahai chu ngaidam la, i ro hluotuah mi pom lul rawh" a ta.
10. LALPA chun, "Ngai ta, nang leh thu ka thlung ding a nih. Khawvel po poa tu hnam chunga khom la thaw ngai lo thil mak chu i mihai hmaah ka thaw ding a nih. I ta dinga thil rapum tak ka thaw ding chu in kawl vela umhai po poin la hmung an tih.
11. Voisuna thu ka pek che hi zawm rawh. Amor mihai, Kanan mihai, Hit mihai, Periz mihai, Hiv mihai le Jebu mihai chu i hmaa inthokin hnot suok ka tih.
12. I fena ding rama cheng hnamhai leh thuthlung siem lo dingin fimkhur rawh, chuong naw chun nangni lai chang inchang an tih.
13. An maichamhai sukchim vong unla, an lungphunhai vaw koi vong unla, an pathiennu Asera lem po po phur thlu vong ro.
14. Pathien dang hrim hrim be naw ro, in LALPA a hming Thika hi Pathien thikthusie a ni si a.
15. "A ram mihai leh thuthlung siem lo dingin fimkhur ro; an pathienhai kuomah inzorar an inhlan pha chun nangni khom fiel veng an ti cheu a, an inthawina sa fa ve hlauh rawi in tih.
16. In naupahaiin an naunuhai an nei chun, an pathienhai kuoma an inzor pha in naupahai khom an thil ching chu thaw ve dingin thuoi lut ve pal rawi an tih.
17. "In ta dingin sung chop pathien insiem naw ro.
18. "Chol thang lo Bei Kut in hmang hlak ding a nih. Thu ka pek ta cheu ang khan, ni sari sung chu chol thang loa siem bei chauh in fak ding a nih. Hi kut hi Abib thlaa a hun ruota ngei in hmang ding a nih. Abib thla chu Aigupta in suoksan thla kha a nih.
19. "Sul keu hong hmasa tak chu ka chan a nih, in ran vai, beram ruol le bawng ruol laia a chal pieng hmasa takhai khom.
20. Sabengtung pieng hmasa tak chu beramtein intlan unla, in intlan naw chun a nghawng suktliek ro. In nau pasal pieng hmasa tak chu in intlan ding a nih. Ka hmaah tu khom kut ruokin an hung inlang ding a ni nawh.
21. "Ni ruk sung sin thaw unla, a ni sarinaa ruok chu chawl ro. Lo kei hun le bu sik huna khom chawl hlak ro.
22. Bu in tharsuok hmasa takin Chawlkar Kut hmang unla, in buhai in hlu lut vong pha leh Pawl Kut hmang bok ro.
23. "I mihai laia pasal po po chu LALPA, Israel Pathien hmaah kum tin voi thum an hung inlang zie ding a nih.
24. In hmaa hnam danghai chu hnot suok ka ta, in ram zauh lien pei ka ta, LALPA in Pathien hmaa inlang dinga kum khatah voi thum in hang fe changin tu khomin in ram chu hung lak tum naw ni hai.
25. "Ka kuoma thisen in hung inhlan pha leh, chol thanga siem thil ieng khom inhlan sa naw unla, Fekan Kut inthawina sa khom a zinga chen in sie ding a ni nawh.
26. "In lo tharsuok laia a tha tak ngot chu LALPA in Pathien inah in hung chawi ding a nih. Kelte sa chu a pui nenetuiin in suong ding a ni nawh," a ta.
27. LALPA bok chun Mosie kuomah, "Hieng thuhai hi ziek thla diem rawh, hieng thuhai dungzui hin a nih nang le Israel kuomah thu ka thlung chu nih" a ta.
28. Mosie chu LALPA bulah bu fa lo le tui dawn loin ni sawmli le zan sawmli a um a, a lung phek chawia chun thuthlungna thu, Thupek Sawm chu a lo ziekpek a.
29. Tlanga inthoka thuthlung inziekna lung phek pahni chawia Mosie a hung kir chun, LALPA leh an inbiek leia hmel eng a put chu a hriet der nawh.
30. Aron le Israelhaiin Mosie hmel eng an hmu chun an pan hnai ngam naw a.
31. Sienkhom, Mosie chun anni chu a ko a, Aron le khawtlang hotuhai chun an hung hnai a, a lo inbiekpui a.
32. Chu zoah Israel mipuihai khom chun an hung pan hnai a, LALPAN Sinai tlanga thu a pekhai po po chu a lo pek sawng a.
33. Anni a biek zoin Mosie chun a hmai chu hmaidierin a'n khum a.
34. Amiruokchu, LALPA be dinga Puon ina a lut sung po a hmai inkhumna chu a hlip hlak. A hung suok pha leh LALPA thupekhai chu Israelhai kuomah a hung hril a,
35. mipuiin a hmel eng an hmu hlak a. Chu zoah LALPA inbepui dinga a lut nawk hma po chu hmaidier a khum nawk hlak.
←  Exodus (34/40)  →