←  Exodus (33/40)  →
1. Chun, LALPA chun Mosie kuomah, "Nang le Aigupta rama inthoka i hung thuoi suokhai khan hi hmun hi suoksanin, Abraham le Isak le Jakob kuoma 'In thlahai ta dingin ka la pek ding a nih' tia inkham meua ka lo tiem ram tieng chu pan tung ro.
2. In hmaah ka vantirko tir ka ta, Kanan mihai, Amor mihai, Hit mihai, Periz mihai, Hiv mihai le Jebu mihai chu lo hnot suok a tih.
3. Khuoizu le nenetui luongna ram chu pan tung unla, sienkhom hnam lulul tak in ni leiin nangni lai fe ve naw ning, lampuiah sukbohmang tawl rawi ka ti cheu" a ta.
4. Chu thu chu mipuiin an hrietin an bei a dong hle a, an tap a, tukhomin incheina thil an inbel nawh.
5. LALPA chun Mosie kuomah, "Hieng thu hi Israelhai kuomah hril rawh: 'Hnam lulul tak in nih. Chom khat khom ka'n tlonpui cheu chun ka sukbohmang pal el thei cheu a nih. Tu hin in incheina thil po po hlip thla vong unla, ieng am ka law ding cheu la sukfel ka tih' tiin" a ta.
6. Chuongchun, Horeb tlanga chun Israelhai chun an incheina thil po po chu an hlip thlak ta vong a nih.
7. Mosie chun puon in chu a som pei a, riebuk an khuorna taphotah an riebuka inthoka hla feah a zar a, chu chu 'Intuokna Puon in' tiin a'n buk a, LALPA rawn nuom taphothai chun puon in chu an pan hlak a.
8. Puon ina lut dinga Mosie suok an hmu pha leh mi po poin mani puon in kot senga inthokin a lut chenin an thlir thup hlak a.
9. Puon ina Mosie lut charin sum ngir chu a hung tum a, puon in kotkhara chun a ngir a, Mosie kuomah LALPA chun thu a hril hlak a.
10. Intuokna Puon in kotkhara sum ngir an hmu pha leh mi po po chun mani riebuk kot senga inthokin kunin an chawibiek hlak a.
11. Ruolcham biek ang elin LALPA chun Mosie chu inhmatonin a biek hlak. Chu zoah Mosie chu a puon inah a hung kir nawk hlak a, ama thangpuitu tlangval Joshua, Nuna naupa ruok chun puon in chu a maksan ve ngai nawh.
12. Mosie chun LALPA kuomah, "Ngai ta, nangin ka kuomah 'Hienghai hi thuoi suok rawh' i ti a, sienkhom tuin am a mi fepui ding ti i mi hril bok si nawh. Nang chun, 'Hminga ko nal khopa ka hriet che a na, ka mit khom i tlung ti ka hriet bok' i ti a.
13. Chuonga i mit dam ka lo tlung takzet a ni chun, nangma hre a, i mit ka tlung zing theina dingin i konglam mi zirtir rawh. Hi hnam hi i mihai ngei an nih ti hre zing rawh," a ta.
14. LALPA chun, "Ka umpuina chun som zing a ti cheu a, hadamna peng ka ti cheu" a ta.
15. Mosie chun, "I mi som zing naw ding chun hi taka inthok hin m'n fe suoktir lul naw rawh.
16. Nangin i mi fepui si naw chun kei le ka mihai chungah i lawm a nih ti tuin am hre thei an ta? I mi fepui ruok chun hnuoi hmun tina chenghaiin i mihai hi kan danglam bikzie hrieng an tih" a ta.
17. LALPA chun Mosie kuomah, "Ka mit i tlung lei le hminga ka ko hiel i ni leiin i thil mi hni chu thawng ka tih" a ta.
18. Mosie chun, "I hmel mi'n hmutir hram ta la" a ta.
19. LALPA chun, "Ka thatna po po i hmaah inlangtir ka ta, i hmaa ngei kei LALPA hin ka hming puong hlak ka tih. Ka nuom taphot lunginsiet ka ta, ka nuom taphot chungah za ngai ka tih.
20. Ka hmel ruok chu hmu thei naw ti nih, ka hmel hmua dam zing thei an um awm si nawh" a ta.
21. LALPA bok chun, "En ta, ka bula hin i ngir theina ding lungpui a um a, chu taka chun lo ngir rawh.
22. Ropui taka ka hung pha leh lungpui kak kara hin lo um la, ka fe khel hma khat che ka kutin hlieng ka ti che a,
23. ka liem pha ka kut chu la son ka ta, ka hnung tieng chauh hmu thei i ta, ka hmel ruok chu hmu thei naw ti nih" ta.
←  Exodus (33/40)  →