←  Exodus (32/40)  →
1. Mosie chu tlanga inthoka a hung thlak intak ta ema mipuiin an hriet lei chun Aron kuomah an fe khawm a, "Thaw ta, kan hma thuoitu dingin pathien lem mi siempek rawh. Hi Mosie, Aigupta rama inthoka mi thuoi suoktu hlak hi iem a chang tah ti kan hriet si nawh" an ta.
2. Aron chun an kuomah, "In nuhmeihai, in naupahai le naunuhai be lai rangkachak nabe kha hung chawi khawm ro" a ta.
3. Mipuihai chun rangkachak nabe an be lai chu hlipin Aron kuoma chun an hung chawi a.
4. An pekhai po chu a lak khawm a, hmangruo ieng ieng amani hmangin bawngte lem angin a sung a. Mihai chun, "Aw Israelhai, hi hi Aigupta rama inthoka thuoi suoktu cheu pathien chu a ni hi" an ta.
5. Chu chu Aronin a hriet chun bawngte lem hmaa chun maicham a siem a, "Zinga hin LALPA ta dingin kut nei ei tih" tiin tlang a'n samtir a.
6. A tuk zinga chun inhma takin an tho a, pumraw thilhlan an inhlan a, inremna thilhlanhai an hung pek bok a. Chu zoah mipui chu fa le dawn dingin an inthung khawm a, hlimhlop chen dingin an tho nawk a.
7. LALPA chun Mosie kuomah, "Fe thla vat rawh khai, Aigupta rama inthoka i hung thuoi suokhai kha an insukporche zo ta khu!
8. Ka thupekhai sawt naw teah nghatsanin bawngte lem an insiem a, an biek a, a kuomah an inthawi a, 'Aw, Israelhai, hi hi Aigupta rama inthoka thuoi suoktu cheu pathien chu a nih' an ti chu!" a ta.
9. LALPA bok chun Mosie kuomah, "Hieng mihai hi ka enthlak zing a, en ta, hnam lulul tak an lo ni hi tie!
10. Lo inrol naw la, ka lungsen inlingin hang kang hmang vong tawl ka tih. Chu zoah nang ruok chu hnam ropui takin siem ka ti che" a ta.
11. Mosie ruok chun LALPA Pathien ditsakna ngenin, "Aw LALPA, i thilthawtheina ropui tak le kut hrata Aigupta rama inthoka i hung thuoi suokhai chunga hin ieng leiin am i lung i sukling ding a na?
12. Ieng leiin am Aigupta mihaiin, 'Thil tum tha lo neiin, thlalera sukhlum vong ding le khawvela inthoka sukchimit vong dingin a thuoi suok tawl a nih' an mi hung tizui ding? I lungsen inkei dei la, i mihai chungah sietna intlun lo hram dingin inhnuk kir raw khai.
13. I siehlaw Abraham hai, Isak hai, Israel hai kuoma, 'Arasi zat khin in thlahai la sukpung ka ta, hi ram pek ka lo tiem tah chu in thlahai la pe bok ka ta, kumkhuoin hluo tang in tih' tia i hming sala i lo intiemnahai kha hre zing raw khai" tiin a ngen rak a.
14. LALPA chun a hnina chu pomin, a mihai chunga sietna intlun dinga a vauna laka chun a'n hnuk kir a.
15. Thuthlung lungphek pahnih, a hma tieng le hnung tienga thu inker sip chu a kuta chawiin Mosie chu tlanga inthokin a hung thla a.
16. Lungphekhai chu Pathien kutsuok a na, a chunga thu inkerhai chu Pathien ziek ngei a nih.
17. Chun, Josua chun mipui khek ri a hrietin Mosie kuomah, " Chu! riebuk tienga ri ka hriet chu indo ri a va ang de!" a ta.
18. Mosie chun, "Chu chu hnetu khek ri a ni naw a, tlawmhai khek ri a ni bok nawh; hla sak ri a nih ka hriet lem chu" a ta.
19. Mosien riebuk a hung pan lai chun bawngte lem le an lam mup mup lai chu a hmu a, a lungsen chu an ling thut a, a lungphek chawihai chu a pei thlak a, tlang bula chun a koi dar ta vong a.
20. Bawngte lem an siem chu a lak a, meiah a raw a, a rawt nawi vong a, tui chungah a phul a, chu chu Israelhai a'n dawntir a.
21. Mosie chun Aron kuomah, "Hienghai hin i chungah iem thil lawm am an thaw a, hienga thil suol nasa tak el an chunga i'n tlungtir hi?" a ta.
22. Aron chun, "Ka lalpa, ka chungah lung suksen naw rawh. Hieng mihai hi suol tieng awn tlat mi an nih ti i hriet annawm.
23. Ka kuomah an hung a, 'Kan hma thuoitu ding pathienhai mi siempek rawh. Hi Mosie, Aigupta rama inthoka mi thuoi suoktu hlak hi a chanchin kan hriet ta si naw a' an hung ti a.
24. Kei chun, 'Rangkachak incheina nei taphotin hlip raw hai se' ka ta. Rangkachak chu an hung chawi a, meiah ka rawtui a, bawngte lem hi a hung suok el a nih" a ta.
25. An nuom dan dana mipui intal vel chu Mosien a hmu a, an hmelmahai nuizatbur inchang khopin Aronin a lo intaltir tawl a nih ti a hriet a.
26. Chuongchun, riebuk lutna kota chun Mosie chu a ngir a, "Tukhom LALPA kuom tienga thang taphot chu ka kuom tieng hin hung ro" a ta. Levi thlahai po chu a bula chun an hung vong a.
27. Mosie chun an kuomah, "LALPA, Israelhai Pathien chun hi hi a hril a nih: 'Mi tinin in kawlhnam pai unla, riebuk kota inthoka a tawp chen a suk a tungin fang inla, mi tinin in unauhai khom, in ruolhai khom, in tuolbawmhai khom that pei ro' a ti a nih" a ta.
28. Levi thlahai chun Mosie ti ang chun an thaw a, chu ni chun mi sangthum vel an that a.
29. Mosie chun an kuomah, "Voisun hin in nauhai ngei le in unauhai ngei khom in do ngam leiin LALPA ta dinga sie hrang in ni ta a, voisun hin mal a sawm cheu a nih" a ta.
30. A zinga chun Mosien mipui kuomah, "Thil suol nasa tak el in lo thaw ta a, sienkhom tuhin LALPA kuomah hang feng ka tih, in suolna lakah inremna ka siem thei takduoiin" a ta.
31. Chuongchun, Mosie chu LALPA kuomah a hang fe nawk a, "Hienghai rawi suol thaw hi a rapthlak a nih. Anni ta dingin rangkachak pathien an insiem a.
32. Sienkhom tu hin lunginsiet takin an suol ngaidam hram raw khai. I ngaidam thei lul naw chun kei hi i mihai hming ziekna lekhabua inthokin mi thai bo dai el lem rawh" a ta.
33. LALPA chun Mosie kuomah, "Ka chunga thil suol thawtuhai hming chauh ka lekhabua inthokin thai bo ka tih.
34. Tu hin fe la, fena ding ka hril ta che hmuna khan mipuihai chu thuoi phot la, ka vantirkoin iI hma thuoi pei a tih. Amiruokchu, ka hrem ding pha chu an suolna ngeia chun hrem ka tih" a ta.
35. Chuongchun, Aron siem bawngte chunga an thil thaw lei chun mipuihai chu LALPAN hripuiin a hrem tawl tah a.
←  Exodus (32/40)  →