←  Exodus (31/40)  →

---

1.

LALPA chun Mosie kuomah,

2.

"Ngai ta, Juda hnama mi Hura naupa Uri, chu pa naupa Bezalel chu ka thlang suok a.

3.

Themthiemna dam, theina dam le thil hrang hrang siem thiem dinga chemkalna dam nei dingin Pathien Thlarauin ka sung sip a nih.

4.

Rangkachak le tangkaruo le dar hmanga thil mawi taka siem thiemna dam,

5.

lungmantam ser le bel mawi dan hai, thing them le ker thiemna dam le kong tinrenga themthiemna dam ka pek a nih.

6.

Chu bakah, ama thangpuitu dingin Dan hnama mi Ahisamak naupa Oholiab chu ka ruot a; thu ka pek che anga iengkim an siem theina dingin thoktu danghai khom kut themthiemna ka pek vong a nih.

7.

An siem dinghai chu Intuokna Puon in dam, Thuthlung Bawm dam, a chunga um ding Zangaina Thungpha dam, Biekbuk hmangruohai po po dam,

8.

dawkan le a hmangruo po po dam, rangkachak hlir hlaka siem khawnvar siena le a hmangruo po po dam, rimtui rawna maicham dam,

9.

pumraw inhlanna maicham le a hmangruo bur le bel hai dam, maihun le a thut dam,

10.

Aron le a nauhaiin thiempu sin thawa ka rong an bawl huna an inthuomna ding silfen thienghlim dam,

11.

thiempu namnghetnaa nal ding hriek dam le Hmun Thienghlima raw ding rimtui dam a nih. Thu ka pek che ang char khan an siem ding a nih," a ta.

12.

LALPA chun Mosie kuomah,

13.

"Israelhai kuomah hieng ang hin hril rawh: 'Ka Sabat hi in inser ding a nih. In Pathien, a sukthienghlimtu cheu chu ka ni ngeizie in hrietna dinga nangni le in thla la hung pei dinghai le keima inkara inchikna a nih.

14.

Chuleiin, Sabat hi inser ro, in ta dinga ni thienghlim a ni si a. Tu khom a bawsetu taphot chu sukhlum ngei ngei ding a nih. Hi nia tu khom sin thaw lui taphot chu a mihai laia inthoka tuithlar ding a nih.

15.

Ni ruk sung in sin thawng in ta, ni sari ni ruok chu Sabat chawl, LALPA ta dinga ni thienghlim a nih. Tu khom Sabat nia sin thaw chu sukhlum ngei ding a nih.

16.

Israel nauhai chun Sabat chu kumkhuoa kan thuthlungna a nih ti hrein an inser ngei ding a nih.

17.

Keima le Israel nauhai inkara kumkhaw inchikna ning a tih, ni ruk sungin LALPAN hnuoi le vanhai a siem a, a ni sarina nia chun a sinthawa inthokin a chawl si a' tiin hril bok rawh" a ta.

18.

Chuongchun, Sinai tlanga LALPAN Mosie a biek zo chun Thuthlung lungphek pahni, Pathien kut ngeia ziek lungphekhai chu Mosie kuomah a pek a.

---

←  Exodus (31/40)  →