Exodus (30/40)  

1. "Rimtui rawna ding sitim thingin maicham siem rawh.
2. Maicham chu a dung centimeter sawmli le panga, a khang centimeter sawmli le panga, kil li nei ning a ta, a'n sangzie chu centimeter sawmkuo ning a tih. A kihai chu maicham le sakhat, inzom vong a ni ding a nih.
3. A chung le a sir po po le a kihai chu rangkachak hlirin inluon khum la, a ko tlang sir tuokin rangkachak bel vong rawh.
4. A zawnfung rolna dingin a tlang sir hnuoi tieng puo ve veah rangkachak naval inbuk la, khing tieng khom chuong ang bok chun inbuk rawh.
5. A zawnfung ding khom sitim thingin siem la, rangkachakin inluon khum rawh.
6. Thuthlung Bawm chunga Zangaina Thungpha, ka'n tuokpuina hlak ding che khela puonzar dot chara chun maicham chu innghat rawh.
7. "Tuk tin Aron-in khawnvar a buotsai pha leh rimtui a raw zie ding a nih.
8. Zan tieng thimbuta khawnvar a sit zatin rimtui raw bok a ta, chuong ang chun thang la hung um peia khom LALPA ta dingin in raw pei hlak ding a nih.
9. Hi maichama hin rimtui dang amanih, pumraw inthawina amanih, bu le bal thilhlan amanih le dawn ding thilhlan amanih in inhlan ngai ding a ni nawh.
10. Maicham inthienna dingin, inremna dinga suol thawina thisen chu kum tin Aron-in maicham ki-ah a nal zie ding a nih. Chu chu kumkhuoin kum tin voi khat in thaw zie ding a nih; maicham chu LALPA ta dinga thil thienghlim tak a ni si a.
11. LALPA chun Mosie kuomah,
12. "Intiempui laia hripuia in thi nawna dingin, Israel mi tiem laia thang taphot chun an tiem hunah LALPA kuomah hringna intlanna man an pek seng ding a nih. Chuonga an thaw chun in intiem pha hripui inleng naw nih.
13. Intiempuia thang taphotin a pek zat dinga tuk, tempula an pek hlak zat shekel zatve an pek seng ding a nih (shekel khat chu gerah sawmhnia rik a nih); chu chu LALPA puola dinga thilhlan a nih.
14. Tiem laia thang kum sawmhni le a chung tieng po chun LALPA kuomah hi thilhlan hi an pek seng ding a nih.
15. Hringna intlanna dinga shekel zatve an pek neka tam chu mi hausain a pek ding a ni naw a, chu neka tlawm khom chu mi retheiin a pek ding a ni bok nawh.
16. Intlanna sum in hmu chu Intuokna Puon in enkolna dingin hmang ro. In hringna intlanna thil hi LALPAN Israelhai a hriet zingna sik a nih" tiin a hril a.
17. Chun, LALPA chun Mosie kuomah,
18. "Insawpna dingin dar maihun siem la, a thut khom dar bokin siem la, chu chu Intuokna Puon in le maicham inkarah inthut la, chu taka chun tui sie rawh.
19. Chu tui chu Aron le a naupahaiin kut le ke sawpnain hmang an tih.
20. Intuokna Puon ina an lut ding zatin, an thi nawna dingin, tui chun an insawp ngei ding a nih. Chun, pumraw thilhlan LALPA hmaa meia an inhlan ding zatin, an thi nawna dingin, an kut le ke an sawp zie bok ding a nih.
21. Suon la hung um pei dinga khom hi hi Aron le a thlahai kuoma kumkhaw thupek a nih" a ta.
22. Chun, LALPA chun Mosie kuomah,
23. "Rimtui inhnik tak laia mi, murra tui kilo ruka rik, thingzungthak rim inhnik kilo thum, mafu rimtui kilo thum,
24. thingzungthak kau hawng kilo ruk le oliv hriek litar li, biekbuka shekel hmang lai anga buk chu hung chawi rawh.
25. Chuonghai chu rimtui siem thiemin thiem taka a chokpol angin chokpol la, hriek nala hmang dingin hriek thienghlimah siem rawh.
26. Chu rimtui chu hienghai hi nal rawh: Intuokna Puon in hai, Thuthlung Bawm hai,
27. dawkan le a hmangruo hai, khawnvar siena le a hmangruo hai, rimtui rawna maicham hai,
28. pumraw inthawina maicham le a bur le bel hai le maihun le a thut hai chu.
29. Thienghlim tak an hung ni theina dingin i sukthienghlim ding a nih; chuong thilhai tawk taphot chu hung thienghlim an tih.
30. "Chun, hriek chu Aron le a naupahai khom nal la, thiempu sin thawa ka rong an bawl theina dingin, sukthienghlim tawl rawh.
31. Israelhai kuomah hieng hin hril rawh: 'Hi hriek hi suon la hung um pei dinghai ta ding khoma hriek thienghlim chu a nih.
32. Mi naran nal naw unla, a siem dan hmangin siem bok naw ro. Hriek thienghlim a ni angin hriek thienghlimah ngai ro.
33. Tu khom hieng ang hriek rimtui hi siem a, thiempu ni ve lo a nal chun ama chu nangni laia inthokin tuithlar ro' tiin hril rawh" a ta.
34. Chun, Pathienin Mosie kuomah, "Rim inhnik gom hnai dam, onika dam le galbanum thing hnai dam le beraw fim tak chu inzat vongin hung la la,
35. rimtui siem thiemin a siem angin, chuonghai chu chokpolin rimtui inhnik tak siem rawh. Chu rimtui chu machia saw thieng, fim tak le thienghlim tak a ni ding a nih.
36. A then rawt dip la, Intuokna Puon ina Thuthlung Bawm hma, ka'n tuokpuina ding chea chun the rawh. Chu chu i ta dingin thil thienghlim tak a ni ding a nih.
37. Hi rimtui siem dan hmang hin i ta ding khomin rimtui siem ngai naw la, LALPA ta dinga thil thienghlimah ngai rawh.
38. Nangni lai tu khomin hieng ang rimtui hi mani hmang dinga siemtu chu a chipuihai laia inthoka tuithlar ding a nih" a ta.

  Exodus (30/40)