←  Exodus (3/40)  →
1. Mosie chun Midian rama thiempu, a tarpupa Jethro beram ruol chu a veng a; chun, ral tieng thlaler ram hla tak chen a beramhai khalin, Horeb,b Pathien tlang chu a zu tlung a.
2. Chu taka chun chimbukah meichokin LALPA vantirko a kuomah a hung inlar a. Kang si loa chimbuk chok chu Mosien a hmu zing a.
3. Chuongchun a lungrilin, "Chimbuk saw a chok a, a kang bok si naw a, a va mak de! Va en chieng hrim ka tih" a ta.
4. En chieng dinga a fe lai chu Pathienin a hmu a, chimbuka inthok chun, "Mosie, Mosie" tiin Pathien chun a ko a. Mosie chun, "Hi taka hin ka um" a ta.
5. Pathien chun, "Kha bak kha hung hnai sap ta naw rawh. I pheikhok kha hlip rawh, i ngirna kha hmun thienghlim a nih" a ta.
6. Chun, Pathien vekin, "Kei hi i thlatuhai Pathien, Abraham Pathien, Isak Pathien le Jakob Pathien chu ka nih" a ta. Chu phing leh Mosie chun a hmai a hup a, Pathien chu a en ngam naw a.
7. LALPA chun, "Aigupta rama ka mihai rimsikzie ka hmu zing a, sal vengtuhai kut an tuor leia an inrum ri ka lo hriet a, an tuorna ka hriet zing a nih.
8. Chuleiin, Aiguptahai kuta inthoka anni chu san him ding le chu rama inthoka thuoi suok a, Kanan mihai, Hit mihai, Amor mihai, Periz mihai, Hiv mihai le Jebu mihai umna, ram tha le thawveng, nenetui le khuoizu luongna rama chun thuoi lut dingin, ka hung tum a nih.
9. Tu hin Israelhai inrum ri chun ka kuom a tlung zing a, Aigupta mihaiin an suknomnat dan khom ka hmu zing.
10. Thaw rawh, tu hin Aigupta rama inthoka ka mi Israelhai thuoi suok dingin Faraw kuomah ka tir ding che a nih" a ta.
11. Mosie chun Pathien kuomah, "Faraw kuomah fe a, Aigupta rama inthoka Israelhai thuoi suoktu ding chun kei hi tu am ka ni leh?" a ta.
12. Pathien chun, "Ka umpui ding che annawm. Keima tir ngei i nizie i ta dinga inchikna chu hi hi ning a tih: Aigupta rama inthoka ka mihai i hung thuoi suok pha chun, hi tlanga ngei hin Pathien chu chawibiek in tih"a ta.
13. Mosie chun Pathien kuomah, "Israelhai kuoma chun zu fe ta lang, an kuomah 'In thlatuhai Pathien chun in kuomah a mi tir a nih' zu ti ta lang, anni rawiin, "A hming ieng am a na?' lo ti sien, iem a na ka hril ding?" a ta.
14. Pathien chun Mosie kuomah, "KEIMA CHU KA NIH.c Israelhai kuoma chun, 'KEIMA chun in kuomah a mi tir a nih' i ti ding a nih" a ta.
15. Chun, Pathien vek chun Mosie kuomah, "Nangin Israelhai kuoma chun, 'LALPA, in thlatuhai Pathien, Abraham Pathien, Isak Pathien le Jakob Pathien chun in kuomah a mi hung tir a nih' i ti ding a nih. Hi hi kumkhuoa ka hming chu a nih, suon po po chena in mi hriet zingna ding hming chuh.
16. Fe la, Israel upahai ko khawm la, an kuomah, 'LALPA, in thlatuhai Pathien, Abraham Pathien, Isak Pathien, Jakob Pathien chu ka kuomah a hung inlar a, hieng hin a tih: Ka hung kan cheu a, Aigupta rama an soisak dan cheu khom ka hmu vong.
17. Aiguptaa sukrinuma in umnaa inthoka thuoi suokin, Kanan mihai, Hit mihai, Amor mihai, Periz mihai, Hiv mihai le Jebu mihai umna ram, nenetui le khuoizu luongna rama chun thuoi lut ka ti cheu ti ka tiem ta sa a nih' tiin hril rawh.
18. "Chuongchun, i thu lo ngaithlang an tih. Chun, nang le Israel upahai chu lal kuomah fe unla, a kuomah, 'LALPA, Hebraihai Pathienin a mi hung kan a, chuleiin, thlaler ni thum lamah LALPA kan Pathien kuoma kan va'n thawi theina dingin, lunginsiet takin fe mi phalpek rawh' ti ro.
19. Chun, kut hrat takin a'n thaw luitir a ni ngot naw chun Aigupta lal chun infetir phal mei mei naw ni cheu ti ka hriet.
20. Chuongchun, keiin ka kut phar suok ka ta, anni laia thil mak ka la thaw ding po po chun Aigupta chu hrem ka ta, chu zoa chun insuoktir a ti cheu.
21. "Chun, hi mihai hi Aigupta mihai inlunginsiettir ka ta, in suok pha khom kut ruokin suok naw ti niu.
22. Nuhmei taphotin a tuolbawmnu le a ina um nuhmei kuomah tangkaruo le rangkachaka siem incheina thilhai le silfenhai hni sien, chuonghai chun in naunu le in naupa hai inthuomtir ro. Chuong ang chun Aigupta mihai chu in rok ding annawm" a ta.
←  Exodus (3/40)  →