Exodus (29/40)  

1. "Chun, thiempu sin thawa ka rong an bawl theina dingin anni chu hieng ang hin inhlan thienghlim rawh: Hmel hemna nei lo bawngchal tuoi pakhat le beramchal tuoi pahni hung kei la,
2. chol thang lo beiphit indip takin bei siem la, sahriek le bei hmet polin kek siem la, beiper inphan siem bok la, a chungah thau nal rawh.
3. Chuonghai chu bawmah thun la, bawngchal le beram chal pahni keiin chu chu hung chawi rawh.
4. Chu zoah Aron le a nauhai chu Intuokna Puon in kotah hung thuoi la, dan angin tuiin insiltir rawh.
5. Thiempu silfen chu hung chawi la, korchung, korfuol, efod le awmbel hai chu Aron inhaktir la, thiem taka ta cheizem chun a kawng hren nghet rawh.
6. Chun, 'LALPA PUOL' ti inbelna lukawm chu inkawmtir rawh.
7. Hriek nal chi hung la la, a luah buok rawh.
8. A nauhai khom hung thuoi la, korfuol inhaktir tawl la,
9. lukawm inkawmtir bok rawh. Chu zoah Aron le a nauhai chu cheizem inzemtir la, namnghet la, thiempu ni kumkhuo tang an tih. Chuong ang chun Aron le a nauhai chu i namnghet ding a nih.
10. "Bawngchal chu Intuokna Puon in kota chun hung kei la, Aron le a nauhaiin bawng lu chungah kut innghat raw hai se.
11. Intuokna Puon in tuola chun LALPA hmaah bawngchal chu that rawh.
12. Bawngchal thisen chu iemani zat la la, i kutpar hmorin maicham kia chun thisen chu infar la, a dang chu maicham ke thuta chun bun thla vong rawh.
13. Bawngchal phing sunga a thau po po, a thin le a kal tuomtu duor le thau po po chu at thla la, maichama chun raw rawh.
14. Bawngchal sa le a vun le a ek ruok chu dai puo tieng i raw hmang ding a nih, chu chu suol ta dinga inhlan a ni si a.
15. "Beramchal pakhat chu hung kei la, Aron le a nauhaiin beramchal lu chungah kut innghat raw hai se.
16. That la, a thisen chu la la, maicham chunga chun a velin the rawh.
17. Beramchal chu chan nawi vong la, a sung le a kehai chu sawp fai la, a lu le a sa dang le chun sie khawm rawh.
18. Chun, beram sa po po chu maichama chun raw rawh, LALPA kuoma pumraw thilhlan, LALPA ta dinga meia inhlan, rim inhnik chu a ni si a.
19. "Beramchal dang khom chu hung kei la, Aron le a nauhaiin beramchal lu chungah kut innghat raw hai se.
20. That la, a thisen iemani zat la la, Aron le a nauhai chang tieng natila dam, chang tieng kutpui le chang tieng kepuia dam chun tat la, chu zoah maicham chunga chun a velin the rawh.
21. Thisen iemani zat le hriek iemani zat la la, Aron le a nauhai silfena chun the la, ama le a nauhai chu inhlan thienghlim hung ni tang an tih.
22. Chun, beram thau, a mei bul thau tak le a sung thau le a thin le kal tuomna duor le a thau po po le a chang tieng mal chu la la, chu chu namnghetna beram ning a tih.
23. Bawma chol thang lo bei, LALPA ta dinga inhlana inthoka mi, hrieka zeu beiphek le kek le beiper inphan chu la bok rawh.
24. Chuonghai chu LALPA hmaa then thilhlana dingin then la, Aron le a naupahai kuta chun inhlan rawh.
25. Chu zoah an kuta inthokin la kir la, pumraw thilhlan danghai leh LALPA hmaa rim inhnika inchang dingin meiah inhlan rawh.
26. Aron namnghetna dinga beramchal inhlan ir chu la la, LALPA hmaa then thilhlan dingin then la, chu zoa chun a sa chu i chanpuol hung ni tang a tih.
27. "Thiempu namnghetnaa thilhlan, beramchal ir le a mal, ka kuoma then thilhlana inhlan thienghlim chu thiempu Aron le a naupahai chanpuol ding a nih.
28. Ka mihaiin inremna inthawina thilhlan ka kuoma an hung inhlan ir le a mal chu thiempuhai chanpuol ni rop a tih ti hi Israelhai laka ka thu ruot chu a nih.
29. Aron silfen thienghlimhai chu a thlahaiin rochung pei an ta, chu taka inthok chun thiempua hriek nal le namnghet hung ni pei an tih.
30. Thiempua Aron hung thlaktu a naupa chun Hmun Thienghlima rong bawl dinga Intuokna Puon ina a hung pha leh ni sari sung a hak ding a nih.
31. "Thiempu namnghetnaa inhlan beramchal sa chu hmun thienghlima chun suong rawh.
32. Intuokna Puon in kota chun beramchal sa le bawma beihai chu Aron le a naupahaiin an fak ding a nih.
33. Chuong inremna thilthawna, anni namnghetna le inhlan thienghlimna dinga pumraw thilhlanhai chu anni chun fang an ta, amiruokchu sa ser a ni leiin mi dang chun fa thei naw ni hai.
34. Chun, a zing chena namnghetna sa le bei fak bang la umhai chu meia raw hmang ding a nih; sa ser a ni leiin fak ding a ni nawh.
35. Chuongchun, thu ka pek tah po po che ang hin Aron le a naupahai chunga chun thaw la, ni sari sung inser thienghlim raw hai se.
36. Chun, ni tin suol thawina dinga inremna thilhlanah bawngchal hung inhlan la, inremna siemin maicham sukfai la, hriek nalin sukthienghlim rawh.
37. Maichama inthienna dinga inremna thilhlan chu ni sari sung thawin sukthienghlim la, chuongchun maicham chu thil thienghlim tak hung ning a ta, maicham tawk taphot khom hung thienghlim pei an tih.
38. "Maichama chun ni tin pel loin beram tuoi pahnih, kum khat a upa in hung inhlan zie ding a nih.
39. Beram tuoi pakhat chu zing tieng inhlan unla, beram tuoi dang chu zan tieng inhlan ro.
40. Zing tienga beram in inhlan ruol chun beiphit indip tak kilogram khat, oliv hriek, a sawra sawr litar khat le chokpol le dawn thilhlanah uoiin litar khat in hung inhlan sa ding a nih.
41. Zan tieng thimbuta in inhlan pha khom zing tienga in thaw ang charin thaw ro. Chu chu LALPA ta dinga meia thil inhlan le rim inhnik chu a nih.
42. Hi hi in thlahai chena Intuokna Puon in kot bula LALPA hmaa pumraw inthawi in inhlan rop dan ding chu a nih; chu taka chun ka mihai hmu dingin hung ka ta, inbiekpui hlak ka ti cheu.
43. Chu hmuna chun Israel mipuihai inhmupui ka ta, chu hmun chu ka ropuina varin sukthienghlim ka tih.
44. Puon in le maicham chu sukthienghlim ka ta, Aron le a naupahai chu ka rongbawltu thiempu dingin ser hrang tawl ka tih.
45. Israel mipuihai lai cheng ka ta, an Pathien ning ka tih. Anni lai ka cheng theina dinga Aiguptaa inthoka thuoi suoktu LALPA an Pathien chu ka nih ti hrieng an tih, LALPA an Pathien chu ka ni si a.
46. (A um nawh)

  Exodus (29/40)