←  Exodus (28/40)  →
1. "I u Aron chu a naupa Nadab hai, Abihu hai, Eleazar hai le Ithamar hai le chun ko la, ka ta dinga thiempu ni dingin Israel mihai laia inthokin ser hrang rawh.
2. I u Aron chun inza phur a, ngaisang a hlaw theina dingin silfen thienghlim siempek bok rawh.
3. Aronin ka rong a bawl theina dinga inhlan thienghlim a ni huna a hak ding silfen thienghlim thuipek dingin hieng tieng thila varna le chemkalna ka pekhai kha hril rawh.
4. Silfen an siem dinghai chu awma inbel chi awmbel, thiempu dar bat zakuo,o korfuol, korchung chei infuol, kawng inrek le ban bul, lukhum le kawngzem a nih. Hieng silfen thienghlimhai hi i unaupa Aron le a naupahaiin thiempu rong an mi bawlpek theina dingin an siempek ding a nih.
5. Chu siemna ding chun rangkachak zai dam, patzai dum pawl, sen duk le sen lar dam le puon zai inhmi thlur kop an hmang ding a nih.
6. "Thiempu dar bat zakuo Efod chu rangkachak zai, patzai dum pawl, sen duk le sen lar le pat zai inhmi tak thlur kop hmanga mi themthiemhaiin an riruong ang taka khawng ding a nih.
7. Hnung tieng le hma tieng dar khing tieng khing tieng huopa hak thei dinga a sir ve vea tingmit a ni ding a nih.
8. A dar zemna hruol chu chuong ang boka thiem taka siem, rangkachak zai dam, pat zai dum pawl, sen duk le sen lar le pat zai inhmi thlur kopa siem ding a na, tluon inzom a ni ngei ding a nih.
9. "Onik lung pahni la khawm la, chu taka chun Israel thlahai hming ker rawh.
10. An hming ziek dan ding chu an pienga an upat dan indotin ning a ta, lung pakhatah hming paruk, a dangah hming paruk a chuong ding a nih.
11. Lunghlu ker thiemin suoi namna ding mawi taka a ker ang elin Israel nauhai hming chu inkertir la, chu lunghai chu rangkachak zaiin phier khum la,
12. Israel thlahai hriet zingna lung dingin a darbak ve vea chun khit de rawh. Aron chun an hminghai chu LALPA hmaa hriet zingna dingin a liengkoah a phur ta ding a nih.
13. Chun, lungmantam phumna dingin rangkachak zai phier la,
14. rangkachak hlir hlaka siem khaidiet pahnih her thlop la, chu chu lung phumna rangkachak zai phiera chun inbuk rawh.
15. Mi themthiem tak kutsuok anga thiemin, rorelna awmbel siem rawh. Thiempu dar bat ang bokin rangkachak zai le patzai dum pawl, sen duk le sen lar le puon zai inhmi le thlur kopin siem rawh.
16. Kil li nei, a dung centimeter sawmhni le pahnih, a khang centimeter sawmhni le pahnih ning a ta, chu chu a thuoa thlep theia siem ding a nih.
17. A chunga chun lunghlu tlar li bel rawh. A tlar hmasa taka chun rubi, topaz le beril lung um a ta,
18. a tlar hninaah torkuis, safir le emeral lung um a ta,
19. a tlar thumnaah jasin, agate le amethi lung um a ta,
20. a tlar linaa chun krisoli, onik le jaspi lung a um ding a nih. Chu lunghai chu rangkachak zaiin zem khum ro.
21. Lung po chu sawmpahni ning a ta, lung tin chun Israel thlahai hming put seng an ta, lung tin chu Israel hnam sawmpahnihai suoi namna lung ang ning a tih.
22. "Awmbela ding rangkachak hlir zai her thlopin hruol rawh.
23. Rangkachak naval pahni siem la, chuonghai chu awmbel chung tieng sir ve vea chun inbuk rawh.
24. Rangkachak khaidiet her thlop chu awmbel sir ve vea rangkachak naval pahnia chun thlung rawh.
25. Chun, rangkachak khaidiet her thlop pahni hmor khing tieng ve ve chu thiempu zakuo hma tieng darbaka rangkachak zaia phier khum lung pahni le chun inbuk zom rawh.
26. "Rangkachak naval dang pahni siem la, chuonghai chu awmbel kil khing tieng, thiempu dar bat zakuo dep, a sung tieng chun inbuk rawh.
27. Chun, rangkachak naval dang siem la, chuonghai chu thiempu dar bat zakuo hma tienga thiempu zakuo darzem chung char, a sir hmora chun inbuk rawh.
28. Thiempu zakuoa naval le awmbela navala chun pat dumpawl hruolin khit mat la, chuonga i thaw chun awmbel chu thiempu zakuoa inthok chun inphaw hawk thei naw nih.
29. "Kei LALPA hin Israel thlahai chu ka hriet zing theina dingin Hmun Thienghlima ka hmaa Aron a hung lut zatin an hming chuongna rorelna awmbel chu a lung zawn takah a hak zie hlak ding a nih.
30. Chun, rorelna awmbela chun Urim le Thummimp khom inthangtir ve rawh, LALPA hmaa Aron a hung inlang zata a lungrila an um ve theina dingin. Chuong ang chun, LALPA hmaa a'n lang zatin Israelhai rorelna chu a lung zawnah Aron chun a put zing ding a nih.
31. "Efod hnuoia hak ding thiempu incheina korfuol chu puon dumpawl hlang hlaka siem ding a nih.
32. A lai taka chun lu thunna ding chep awng la, a awng rei chu a'n ek nawna dingin zakuo tlang an kim angin kim vong rawh.
33. Korfuol hmor vel tuoka khai dingin pat zai dum pawl, sen duk le sen lar hmangin theibufai lim siem la, a kar inthlak peiah rangkachak telneng khai rawh.
34. Korfuol hmor tlang vel tuokin theibufai lim le rangkachak telneng chu inkarthlakin a um ding a nih.
35. LALPA hmaa rongbawl dinga Aronin Hmun Thienghlim a lut ri le chu taka inthoka a suok nawk ri chu hriet thei dingin a korfuol chu a hak zie ding a nih, a thi pha nawna dingin.
36. "Chun, rangkachak hlir hlak phek siem la, chu taka chun suoi namna kutsebia an ker ang elin, LALPA PUOL ti ker rawh.
37. Chu phek chu thiempu lukawm hma tieng bel la, patzai hruol dumpawlin khit de rawh.
38. Chu chu Aron chalbawk zawna chun um a ta, Israelhaiin thilpek thienghlim LALPA ta dinga an inhlan pha, an thilpek inhlana an suol tlak tum chu ieng khom ni sien, Aron chun phurpek pei a ta, LALPA hmaa pom tlaka an um theina dingin Aronin a chalbawkah a bel zing ding a nih.
39. Aron hak ding korchung le a lukawm ding chu patzai inhmi taka inthoka khawng le siem a ni ding a nih. A cheizemq khom patzai inhmia khawng le mawi taka chei a ni bok ding a nih.
40. Aron nauhai khomin mi inza le ngaisang an phur theina dingin, korfuol le cheizem le lukawm siempek rawh.
41. Hieng silfenhai hi i u Aron le a nauhai inhaktir la, ka ta dinga rongbawltu thiempu ni dinga hriek nalin namnghet la, ser hrangin inhlan rawh.
42. "An saruok inkhumna dingin kawnga inthoka malpui chen huop kekorte siempek rawh.
43. Chu chu Aron le a nauhaiin Intuokna Puon in an lut pha le Hmun Thienghlima rong bawl dinga maicham bula an fe pha an bun zie hlak ding a nih, inlang pala an thipui nawna dingin. Hi hi Aron le a thlahai ta dinga kumkhaw thupek chu a nih.
←  Exodus (28/40)  →