←  Exodus (27/40)  →

---

1.

"Sitim thingin maicham kil li nei, a dung le khang meter hni le centimeter hni ve vea sei le lien le meter khat le centimeter thuma insang chu siem rawh.

2.

Maicham kil tinah a ki siem la, maicham le a kihai chu thing sakhat inzom vong ding a na, dar tuiin inluon khum vong bok rawh.

3.

A hmangruo, vut luokna ding vutluo le vut siena ding belhai, thil thenaa hmang ding maihunhai, sa thurna ding thirkuthai le hme suongna belhai chu dara siem vong a ni ding a nih.

4.

Chun, maichama dingin dar len siem i ta, a len chung tieng sir lia chun a khaina kuol i siem bok ding a nih.

5.

Chu thir len inphan chu maicham zawl hnuoi, a chenvea insanga chun i sie ding a nih.

6.

Maicham zawnna ding sitim thing tuoi siem la, dar tuiin inluon khum la,

7.

zawn phaa a zawnfung rol lutna dingin maicham sir khing ve vea chun a khei kuol siem tawl bok rawh.

8.

Maicham chu thingphek bangin inkhum i ta, a lai chu a kawrongin i sie ding a nih. Tlanga a ruongam ka'n hmutir che ang char khan i siem ding a nih.

9.

"Biekbuk tuolzawl chu puon zai inhmi thlura khawng puonzarin inhuon i ta, sim tienga mi chu meter sawmli le palia sei ning a ta,

10.

puonzar khaina ding chu ban sawmhni le ban inthutna ding dar phek sawmhni siem i ta, puonzar bangna tluon le a thlung nghetna hmangruo po po chu tangkaruoa siem a ni vong ding a nih.

11.

Hmar song tieng khom meter sawmli le palia sei ning a ta, ban sawmhni le ban inthutna ding dar phek sawmhni le puonzar bangna tluon le a thlung nghetna hmangruo po po chu i siem bok ding a nih.

12.

"Thlang tieng tuol zawla chun meter sawmhni le pahnia sei puon zar ding a na, ban sawm le a thut sawm um bok a tih.

13.

Suo tieng, nisa suokna tienga inhuonna puonzar khom meter sawmhni le pahnia sei a ni ding a nih.

14.

A lutna sir khata chun meter ruk le centimeter ruka sei puonzar le ban pathum le a thut pathum um a ta,

15.

khing tieng khom meter ruk le centimeter ruka sei bok puonzar le ban pathum le a thut pathum a um bok ding a nih.

16.

"Tuol kot tieng khom ban pali le a thut pali siem i ta, a puonzar dingin meter kuoa sei, pat zai inhmi thlur kopa khawng, a dum pawl, a sen duk le a sen lar inpol, puon khawng thiemhai kutsuok chu i khai bok ding a nih.

17.

Tuolzawl inhuonna ban po po chu tangkaraw tluonin zom vong i ta, puonzar bangna kuoi po po chu tangkaruoa siem ning a ta, a ban thut chu dar vong a ni ding a nih.

18.

A tuol zawl seizie chu a dung meter sawmli le pali le a khang meter sawmhni le pahni ning a ta, pat zai thlura siem puonzar, meter hni le centimeter hnia insangin inhuon i ta, a ban thut chu dar vonga siem a ni ding a nih.

19.

Biekbuka hmangruo hmanghai po po le puon in sung le a tuol zawla puonzar kei nghetna hmangruo po po chu dara siem vong a ni ding a nih.

20.

"Khawnvar chu zan tin sit chok a ni zing theina dingin oliv hriek an sawr laia thlit fim hlak chu hung chawi dingin Israelhai chu thu pe rawh.

21.

Biekbuka Thuthlung Bawm siena puonzar puo tieng, Intuokna Puon ina chun Aron le a nauhaiin zan tienga inthoka zing tieng chenin LALPA hmaah khawnvar chu an insit chok zing ding a nih. Hi hi suon la hung thar pei dinga khom Israelhai laia an thaw dinga kumkhaw thupek chu ning a tih.

---

←  Exodus (27/40)  →