←  Exodus (26/40)  →
1. "Chun, puonhlap thle sawm hmangin biekbuk siem la, chuong puonhlaphai chu patzai inhmi thlur kop, a dumpawl, a senduk le sendang inpola siem, puon khawng thiemhaiin cherub lim thiem taka an zep chei a ni ding a nih.
2. Puonhlap po po chu a sei tieng meter sawmpahni, a khang tieng meter hni seng, a ni ding a nih.
3. Puonhlap panga chu thui zom phot la, chu zoah panga dang chu thui zom nawk rawh.
4. Puonhlap thui zom hmasak sir hmora chun a naval ding a dum pawlin siem la, chuong ang bokin a dang i thui zoma khom chu siem bok rawh.
5. Puonhlap pakhata chun a naval sawmnga siem la, a danga khom chun sawmnga siem bok la, a navalhai chu an inep tuo vong ding a nih.
6. Chu zoah rangkachakin a chep dena ding sawmnga siem la, a chepdena chun a naval tinah chep de la, biekbuk chu pindan pakhat a hung ni ding a nih.
7. Chun, biekbuk chung inkhumna dingin kel hmula inthoka khawng puonhlap thle sawmpakhat i siem ding a nih.
8. Puonhlap chu a sei tieng meter sawmpathum, a khang tieng meter hni ning a ta, thle tin chu an intiet vong ding a nih.
9. Puonhlap panga chu phek khata dingin thui zom la, puonhlap paruk chu phek danga dingin thui zom bok rawh. Puon in kot tieng chun puonhlap paruk thui zom chu zar la, a sir tak chu thlep ding a nih.
10. Puonhlap pakhat hmor tieng tlanga chun a naval sawmnga siem la, chuong ang bokin puonhlap danga chun siem bok rawh.
11. Chun, an inkei bat tonna ding dar kom sawmnga siem la, a naval tin ve veah puonhlap pahnihai chu dar kom chun kom de la, biekbuk chu pindan pakhat hung ning a tih.
12. A chung inkhumna sahmul puon chenve lor chu biekbuk chawr tieng inkhai thla raw se.
13. Chun, a chung sir tuoka puonhlap, centimeter sawmngaa lor ve ve khom chu inkhai thla el raw se.
14. Chun, beramchal vun, rong sena nam chun puon in chung chu inkhum i ta, chu chunga chun tui bawng vunin i la'n khum nawk ding a nih.
15. "Biekbuk banga intung ding sitim thing phek tlun tak rem khawm rawh.
16. Phek tin chu a dung meter lia insang le a khang centimeter sawmruk le paruka hlaiin i rem ding a nih.
17. Phek tin chu phek dang leh phui taka an inman nghet theina dingin phek tinah mantu pahni i siem vong ding a nih. A bang phek po po chu chuong ang vonga siem ding a nih.
18. Biekbuk sim songa dingin phek sawmhni siem i ta,
19. a mongpha ding tangkaruo phek sawmli siem bok la, bang phek khat pei chu a mongpha pahni peiah innghat a tih.
20. Biekbuk hmar songa ding khomin phek sawmhni siemla,
21. a mong phaa hmang ding tangkaruo phek sawmli siem bok la, bang phek khat pei chu a mong pha pahni peiah innghat a tih.
22. Biekbuk chawr, thlang tienga dingin phek ruk siem la,
23. phek hni chu a kila thang ding a nih.
24. A kila phek hni hi a thuta inthoka a ler chen kil zom thlap ding a nih.
25. Chuong ang chun, phek riet um a ta, tangkaruoa siem a mong pha sawmparuk um bok a ta, a mong pha pahni pei chu bang phek pakhat peia hmang ding a nih.
26. "Chun, sitim thing tluonin bangru ding sawmpanga siem la, biekbuk bang khing tienga bang phek rem tlara chun bangru panga bel la,
27. a khing tieng khom panga bel bok la, biekbuk chawr thlang tienga bang phek rem tlara chun panga bok bel rawh.
28. A bangru lailung taka mi, bang chenvea insanga bel chun biekbuk chu a vel tuokin a man khawm ding a nih.
29. Bang phek po po chu rangkachak tuiin inluon khum vong la, a bangru man khawmna dingin rangkachak naval siem la, a bangru po po chu rangkachak tui inluon vong bok rawh.
30. Tlanga a ruongam ka'n entir che ang charin biekbuk chu i bawl ding a nih.
31. "Biekbuk sung pindana zar ding chu patzai inhmi thlur kop, a dumpawl, a senduk le senlar inpola khawng, puon khawng thiemhaiin cherub lim thiem taka an zep chei a ni ding a nih.
32. Sitim thing ban pali, rangkachak tuia inluon le tangkaruo phek pali thuta phuna chun rangkachak navalah puonzar chu khaiin i zar ding a nih.
33. Puonzar chu i zar zo pha leh Thuthlung Bawm chu a sung tieng sie lut i ta, puonzar chun Hmun Thienghlim le Hmun Thienghlim tak chu a daidan ding a nih.
34. Hmun Thienghlim taka chun Thuthlung Bawm le a sintu Zangaina Thungpha chu sie rawh.
35. Puonzar puo tienga dawkan kha hmar tieng sie la, khawnvar innghatna kha sim tieng sie rawh.
36. "Biekbuk lutna kotkhara zar ding chu patzai inhmi thlur kop, a dumpawl, a senduk le a senlar inpola khawng, puon khawng thiemhai kutsuok a ni ding a nih.
37. Puonzar khaina dingin sitim thing ban panga, rangkachak tuia inluon vong chu phun la, puonzar chu rangkachak navala chun khai rawh. Ban panga thuta hmang ding dar phek panga sung bok rawh.
←  Exodus (26/40)  →