←  Exodus (25/40)  →
1. Chun, LALPAN Mosie chu a biek a,
2. "Israelhai kuomah hril la, ka kuomah thilhlan hung chawi raw hai se. Lungrila an phal ang ang thilpek an hung chawihai chu ka ta dingin i lo lak khawm ding a nih.
3. Thilpek i lak khawm dinghai chu hienghai hi ning a tih: rangkachak dam, tangkaruo dam le dar dam;
4. patzai dumpawl, senduk le senlar dam, puon zai inhmi dam, kel hmul dam,
5. beramchal vun, rong sena nam dam, tui bawngvunj dam, sitim thingk dam,
6. khawnvara sit ding oliv hriek dam, hriek nal phaa pol chi mawsawla dam le rimtui raw ding dam,
7. Efod le awmbela bel ding onik lung le lunghlu dang dang hai chu an nih.
8. Chun, anni laia ka cheng ve theina ding in thienghlim mi bawlpek rawh.
9. A ruongam ka'n entir ang che khan biekbuk chu bawlin a sunga hmangruo ding po po khom i siem ding a nih.
10. "Chun, sitim thingin bawm insiemtir la, a dung chu centimeter za le sawmpakhat, a khang chu centimeter sawmruk le paruk le a'n sang tieng centimeter sawmruk le paruk ning a tih.
11. A sung le puo tieng rangkachak hlir hlakin inluon khum vong la, a tlang po po chu rangkachakin i kawm bok ding a nih.
12. Rangkachak kuol pali siem la, a ke thutah khing tieng pahnih, a dang tieng pahnih, inbuk rawh.
13. Sitim thing bokin a zawnna ding zawnfung siem la, chu chu rangkachak tuiin inluon rawh.
14. Bawm zawnna ding zawnfunghai chu rangkachak kuola chun a khing a khingin rol lut ve ve rawh.
15. Rangkachak kuola zawnfung i rol lut chu um zing a ta, lak suok ta lo ding a nih.
16. Chun, bawm sunga chun lungpheka Thuthlung inziek ka la pek ding che chu i sie ding a nih.
17. "Rangkachak hlirin zangaina thungpha,l a dung centimeter za le sawm, a khang centimeter sawmruk le paruka lien i siem ding a nih.
18. Chun, zangaina thungpha sin hmor intona inthut ding rangkachak cherub lim, a suta sut ngei i siem ding a nih.
19. A sin hmor khing tieng chun cherub lim pakhat sie la, a khing tieng chun pakhat dang sie bok la, zangaina thungpha leh an inmat ding a nih.
20. Cherubhai chu inhmatonin zangaina thungpha tieng nghang an ta, an thlain zangaina thungpha chu zar khum an tih.
21. Bawm chunga chun zangaina thungpha chu innghat i ta, bawm sunga chun Thuthlung ka la pek ding che chu i sie ding a nih.
22. Chu taka chun intuokpui hlak ka ti che a, thuthlung bawm chunga cherub pahni inkara zangaina thungpha chunga inthok chun Israel mihai kuoma thu ka pek ding taphot chu pe hlak ka ti che.
23. "Chun, sitim thingin dawkan siem la, a dung chu centimeter sawmriet le pariet, a khang chu centimeter sawmli le pali le an sangzie chu centimeter sawmruk le paruk a ni ding a nih.
24. Chu chu rangkachak hlir tuiin inluon vong la, a tlang chu rangkachakin kawm rawh.
25. Milimeter sawmsari panga tieta lienin a kawm siem i ta, chu chu rangkachakin i kawm ding a nih.
26. Rangkachak naval pali siem i ta, chuonghai chu dawkan ke pali kil tina chun inbuk rawh.
27. A zawnfung rol lutna dingin rangkachak navalhai chu dawkan kawm sira inbuk ding a nih.
28. Sitim thingin dawkan zawnna ding zawnfung siem la, rangkachak tuiin inluon rawh.
29. Chu taka ding chun rangkachak hlira siem thleng dam, no dam, uoiin thilhlan bun thlakna ding no tung le maihun dam i sie ding a nih.
30. Dawkan chunga chun ieng lai khomin ka hmaah hlanbeim i sie rop ding a nih.
31. Chun, rangkachak hlirin khawnvar siena i siem ding a nih. A ngul le bulthut chu a sera ser ding a na, a lu tienga a kumum le a par vul lai limhai leh ser inzom vong ding a nih.
32. A ngula inthok chun kau ruk, sir khatah kau thum, sir khing tieng kau thum a peng suok ding a nih.
33. A zar tinah ruon par kumum lai le a par lai lim pathum um a ta, a kau nawka chun chuong ang bok chu um a tih. Chuong ang chun khawnvar siena peng paruk chu i siem ding a nih.
34. Khawnvar siena ngula chun ruon kumum ang par vul lai lim pali a um ding a nih.
35. A zar chung le hnuoi inkarah par kumum pakhat pei a um ding a nih.
36. A kumum le parhai po po le a ngul le thut hai chu rangkachak hlir tlang sakhata inthoka ser ding a nih.
37. Chu taka sie ding chu khawnvar pasari siem i ta, i sit pha leh a vel chu a elvar vong ding a nih.
38. Khawnvar phita chep ruolna le hmangruo danghai khom rangkachak hlira siem ding a nih.
39. Khawnvar siena le a hmangruo ding po po siemna dingin rangkachak hlir hlak talenn khat i hmang ding a nih.
40. Tlanga a ruongam kan entir ang che khan iengkim i siem ding a nih ti hre rawh.
←  Exodus (25/40)  →