←  Exodus (24/40)  →

---

1.

Chun, ama chun Mosie kuomah, "Nang le Aron le Nadab le Abihu le Israel upa sawmsarihai kha ka kuomah hung tung unla, rala inthokin mi hung chawibiek ro.

2.

Mosie chauin LALPA hung pan hnai sien, mi dang chun hung hnai naw ro. Mipui khom ama leh hung naw raw hai se" a ta.

3.

Mosie chu a zu fe a, LALPA thu le rorel danhai po po chu mipui a zu hril a, anni chun lunginruol takin, "LALPA hril taphot chu thaw pei kan tih" an ta.

4.

Mosie chun LALPA hril po po chu a ziek thlak vong a. A zinga chun inhma takin a tho a, tlang thuta chun maicham a siem a, Israel hnam sawm le hnam hni aiawin lung sawmpahni a phun a.

5.

Chu zoa chun Israel tlangvalhai chu pumraw thilhlan nei dingin a tir a, inremna thilhlana dingin LALPA kuomah bawngchal tuoiin an inthawi a.

6.

Mosie chun ran thisen zatve chu a lak a, maihunah a sie a, thisen zatve dang chu maichamah a the a.

7.

Chun, Thuthlungna Bu chu a lak a, mipui hrietah a tiem a, anni chun, "LALPA hril taphot chu thaw pei kan ta, zawm pei kan tih" an ti duol duol a.

8.

Mosie chun thisen chu a chawi a, mipui chu thein, "Ngai ta u, hi thuthlungna bua Pathienin in kuoma thu a lo thlung tah po po thuthlungna thisen chu a ni hih" a ta.

9.

Mosie le Aron, Nadab le Abihu le Israel upa sawmsarihai chu an kai tung a,

10.

Israelhai Pathien chu an hmu a, a ke innghatna chu lungmantam safir rem khawm ang, van anga inthieng a nih.

11.

Sienkhom Israel hotuhai chunga chun Pathienin a kut a'n let nawh; Pathien chu an hang hmu a, fain an dawn tlang a.

12.

LALPA chun Mosie kuomah, "Tlanga khin ka kuomah hung kai la, chu taka chun lo um la, mipuihai zirtirna dinga an ta dinga lungpheka dan le thupek ka ziekhai chu lo peng ka ti che" a ta.

13.

Mosie chu a kaiza vengtu Joshua leh a'n thok suok a, Pathien tlanga chun a hang fe a.

14.

Upahai kuoma chun, "Kan hung kir nawk hma khat chu hi taka hin mi lo nghak zing ro. Nangni lai Aron le Hur an um a, thubuoi nei taphot an kuomah fe raw hai se" a ta.

15.

Mosien tlang a tlung chun tlang chu sumin a baw a,

16.

LALPA ropuina chu Sinai tlangah a um a, sumin tlang chu ni ruk a bawm khum a, a ni sarina chun suma inthokin LALPAN Mosie chu a hung ko a.

17.

Israelhai hmu dan chun, LALPA ropuina chu tlang sipa kang hmang thei mei ang el a nih.

18.

Mosie chu sum zinga chun a va lut a, tlanga chun a hang lawn a, ni sawmli le zan sawmli a hang um a.

---

←  Exodus (24/40)  →