←  Exodus (23/40)  →
1. "Thuthang indik lo in hril dar ding a ni nawh. Mi rilo thangpuitu dingin thuhretu riloah in insiem ding a ni nawh.
2. Thil suol thaw tum mipui lai inzel ve naw ro. Thubuoi hrilnaah mipui tieng awn zawnga thangin thudik chu in sukbuongbar ding a ni nawh.
3. Mi rethei khom a thubuoiah in tan bik ding a ni bok nawh.
4. "In hmelma bawngchal amanih a sabengtung amanih invak hmang in hmu chun a kuomah in khal kirpek nawk ngei ngei ding a nih.
5. Nangni theidatu cheu sabengtung chu a phurin a del de lai in hmu chun, ieng angin thangpui rin inla khom, thangpui loin in maksan ding a ni nawh.
6. "In mi, rethei tak takhai thubuoi chu, indik naw takin in relpek ding a ni nawh.
7. Khela inheknaah thang ve naw unla, poi tawk lo le mi indikhai sukhlumtuah thang naw ro, mi rilo chu ka'n suo naw ding a ni si a.
8. "Thamna la naw ro, thamna chun a hmutuhai mit a sukdel a, mi indikhai thu khom a hem kawi hlak.
9. "Ram dang mihai neksawr naw ro, nangni khom Aigupta rama mikhuola in um lai khan mikhuol ni umzie in hriet chieng ta si a.
10. "Kum ruk sung chu in loah bu tuin a ra sik la,
11. a kum sarinaa ruok chu inlet lo le hmang loin sie ro; chu taka inthok chun mi retheihaiin fa ve thei an ta, an lak mahla po chu ramsahaiin tlan bok an tih. Chuong ang bokin in grep huonhai le in oliv huonhai chu thaw ro.
12. Ni ruk sung in sin thaw unla, ni sarinaa chun chawl ro. Chuongchun in bawngchalhai le in sabengtunghai khom chawl thei veng an ta, in insunga pieng in bawihai le hnam dang mihai khom chawl hadam ve thei an tih.
13. In kuoma ka hril po po hi ngaiven unla, pathien dang hming hrim hrim lam naw unla, in baua inthok khomin mihaiin hre naw hrim hrim raw hai se.
14. "Kum khatah voi thum ka ta dingin kut hmang ro.
15. Chol thang lo bei kut hmang unla, thu ka pek tah ang cheu khan, ni sari sung chu chol thang lo bei ring ro. Hi hi Abib thla sunga ni ruotah khan hmang unla, chu thla chu Aigupta rama inthoka in suokna thla a ni kha. Chun, ka hmaah tu khom kut ruokin in hung inlang ding a ni nawh.
16. "Loa in bu tharsuok hmasa takin Busik Kut hmang ro. Chun, kum tawp pawl tlakah in lo tharsuok in hlu lut vong pha leh Pawl Kut hmang ro.
17. Kum khatah pasal po po Chunghnung tak LALPA hmaah voi thum an hung inlang ding a nih.
18. "Chol thanga siem thil hrim hrim leh ka kuomah inthawina thisen inhlan naw ro. Chun, kuta thil hlana hmang thau reng reng chu a tuk zing chenin sie ngai naw ro.
19. "In lo tharsuok hmasa tak laia a tha tak vong chu LALPA in Pathien kuomah hung chawi ro. Kel tuoi sa chu a pui nenetuiin suong ngai naw ro.
20. "En ta, in lampuia veng zing ding cheu le hmun ka buotsaia thuoi tlungtu ding cheuin ka vantirko in hmaah ka hung tir ding a nih.
21. Ama chu ngaiven unla, a thu ngaithla ro. A lakah hel naw ro, ama chun ka hming a put leiin in helna chu a ngaidam awm si naw cheu.
22. Amiruokchu, a thu in pom a, a hril taphot in thaw pei chun, in hmelmahai hmelma ning ka ta, in dohai dotu ni bok ka tih.
23. Ka vantirko chun in hma thuoi pei a ta, Amor hai, Hit hai, Periz hai, Kanan hai, Hiv hai le Jebu hai umnaa chun thuoi a ti cheu a, anni chu ka la sukbohmang dai ding a nih.
24. An pathienhai hmaah kunin chawibiek naw unla, an thil chinghai chu ching bok naw ro. Anni chu inram vong unla, an lung biekhai chu suknawi vong ro.
25. LALPA in Pathien rong chauh bawl unla, fak le dawnah sukhnienghnar ka ti cheu a, nangni laia inthokin natna hri la hmang ka ta,
26. nau insiet amani le ching amani nangni lai um naw ni ti niu a, in dam kum khom a tluontlingin suksei ka tih.
27. "In hmaah ka tiumna infetir ka ta, tu hnam khom in hmasuon taphot chu sukchi-ai ka ta, in hmelmahai po po chu in hmaah intlansiettir ka tih.
28. In fena ding lampuia inthoka Hiv hai, Kanan hai le Hit hai hnot suoktu dingin in hmaah khuoivanriel tir ka tih.
29. Amiruokchu, kum khat sung chun hnot suok vong el naw ning, chuong naw chun a ram chu rausan vong an ta, in ta dinga ram sa tium hung tam taluong an tih.
30. A ram pum la thei khopa in hung pung hun chenin ahmatiemin in hmaa mihai hnot suokpek pei ka ti cheu.
31. "In ramri ding chu Tuipui Sena inthoka Filistinhai Tuipuii chen le thlalera inthoka Tuipui chen khangpek ka ti cheu a, chu rama umhai chu nangni kutah peng ka ta, anni chu hnot suok in tih.
32. Anni amani le an pathienhai amani leh thu in thlung ding a ni nawh. In ram sungah an um ding a ni bok nawh, chuong naw chun ka chungah hin suol inthawtir pal an ti cheu; in ta dinga chang tium chu an pathienhai chawibiek a nih' tiin" a ta.
33. (A um nawh)
←  Exodus (23/40)  →