←  Exodus (22/40)  →
1. "Miin bawngchal amanih beram amanih inru a, that a, a zor chun, bawngchal pakhat aiin bawngchal panga le beram pakhat aiin beram pali chawi a tih.
2. "Miin a in roktu chu a rok laia a vuok hlum chun, a vawtu chunga chun thisen phuba lak ding a ni nawh;
3. amiruokchu, nisa suok hnunga a vuok hlum a ni ruok chun a thisen lakah maw phur a tih. Rukru chun a thil inruk chu thung kir a ta, pek ding a nei naw ruok chun a thil inruk thungna dingin ama chu zor ding a nih.
4. Ran inrutu kutah bawngchal amanih, sabengtung amanih, beram amanih a hringa man a ni chun a let hniin rul a tih.
5. Tu khomin a lo amanih grep huon amaniah ran a'n tlattir a, ranhai chu invaka mi loah an lut chun a lo le a grep huon thatna lai takin a rul ding a nih.
6. "Miin mei insuo a, lo hnawm inkang zaptir a, mi buphal amanih, bu kung amani le lo po po a kang siet chun, mei insuotu chun a rul ngei ding a nih.
7. "Tu khomin a tuolbawm kutah a sum le pai le thil neihai inkol thattir sien, chu chu a koltu ina inthokin inhmang ta sien, rukru chu man a ni phot chun a let hniin a rul ding a nih.
8. Rukru chu man a ni si naw chun, a koltu chu roreltu hmaah inlangin, ama thaw a ni le ni naw inchieng raw se.
9. Bawng amanih, sabengtung amanih, beram amanih le silfen le thil dang inhmang thuah hrim hrim, tu khomin 'Hi hi chu ka ta a nih' a ti chun an pahni thubuoi chu roreltu hmaah an intlun ding a nih. Roreltuin thiem naw a'n changtir taphot chun a tuolbawmpa laka chun a let hni chawi a tih.
10. "Tu khomin a sabengtung amanih, bawngchal amanih, beram amanih le ran dang ieng khom a tuolbawm kutah inkol thattir sien, ran chu thi le hliem le suomin lo um sien, a thawtu tu khomin hmu si naw hai sien,
11. a koltu chun ran chu a tawk nawzie inchiengna dingin a tuolbawm hrieta ngei Pathien hmaah inkhamna a nei ding a nih. Chu chu ran neitu chun pom a ta, a koltu chun a rul a ngai ta nawh.
12. Amiruokchu, an inrukpek a ni ruok chun a koltu chun a rul ding a nih.
13. Sain a se a ni chun, a sa hlek hung chawi sien, sa se ran ai chu a rul ngai naw nih.
14. "Tu khomin a tuolbawm ran a hmang haw a, a neitu um naw laia ran chu a hliem amanih a thi chun, a hmang hawtu chun rul a tih.
15. A neitu um lai a ni ruok chun rul a ngai nawh. Ran chu a man chawia haw a ni ruok chun a haw man chauh chawi a tih.
16. "Pasalin nunghak thienglam, nuhmei dinga mi la huol lo chu thlema a zalpui chun, man le muol pein nuhmeiah a nei ngei ding a nih.
17. A pain a naunu chu inneitir a phal tlat naw khomin nuhmeia a lo siem tah leiin a man chu a pek tho tho ding a nih.
18. "Nuhmei dawithiem hrim hrim chu damin hla naw ro.
19. "Tu khom ran rimtu taphot chu sukhlum ro.
20. "Tu khom LALPA ti chauh lo pathien dang kuoma inthawi hrim hrim chu sukbohmang ding a nih.
21. "Ram dang mi tukhom thaw sein neksawr naw ro, nangni khom Aigupta ramah mikhuol in ni hlak kha.
22. "Hmeithai amanih fahra amanih hai chu neksawr naw ro.
23. In soisak tha naw vai chun mi hung zuolko an ta, an rawl lo ngaithlang ka ta,
24. ka lung sen phut a ta, kawlhnamin hung sukhlum rawi ka ti cheu a, in nuhmeihai chu hmeithai hung ning an ta, in nauhai khom fahra hung ning an tih
25. "Nangni laia um ka mi, mi retheihai kuomah sum in inpuktir pha an bat angah ngai naw unla, a pung phut bok naw ro.
26. I tuolbawm silpuon chu bandaa i lo hrenpek a ni khomin nisa tlak ruolin pe kir nawk rawh;
27. a silpuon nei sun a na, a taksa suklumna dinga a silpuon a ni leiin ieng am silin zal tang a ta? A mi hung ko vai chun lo ngaithla ngei ka ta, kei hlak chu mi lunginsiet thei tak ka ni bok si a.
28. "Pathien hrilse naw la, i mihai chunga roreltu chu tongsie inphur bok naw rawh.
29. I thlai thar hmasa tak le uoiin thar i sawr hmasa tak chu i hung inhlan ding a nih. I naupa upa tak chu i mi pek ding a nih.
30. Chuong ang bokin i bawng le beramhai khom i thaw ve ding a nih. Ni sari chu a pui kuomah um a ta, a ni riet ni-ah i mi pek ding a nih.
31. Chun, ka mi thienghlimhai in ni ding a nih. Chuleiin, ram sa se sa hrim hrim in fak ding a ni nawh; ui kuomah in pek lem ding a nih.
←  Exodus (22/40)  →