←  Exodus (21/40)  →
1. "Chun, hienghai hi ro an rel dan ding i siepek dinghai chu a nih:
2. Bawi dinga Hebrai mi in inchawk chun kum ruk sung in rong bawl a ta, a kum sarinaa ruok chu intlan loin zalen thei a tih.
3. Ama chaua hung lut a ni chun ama chauin suok a ta, a nuhmei le hung lut an ni ruok chun a nuhmei khom a suok sa ve ding a nih.
4. A puin nuhmei a lo inneitir a ni chun, a nuhmei le a nauhai chu a pu ta ning an ta, ama chauh suok thei a tih.
5. "Amiruokchu bawi chun, 'Ka pu le ka nuhmei le nauhai hi ka hmangai em leiin ka suok nuom nawh' a ti chun,
6. a pu chun roreltu hmaah thuoi a ta, kotkhar amanih kotkhar bieng bulah thir zumin a na verpek a ta, a dam sungin a pu bawi ni tang a tih.
7. "Tu khomin bawi dinga a naunu a zor chun, bawipa angin ama chu suok el thei naw nih.
8. A pu chun ama hmang dinga a thlang a lo ni a, a pu chu a suklawm bok si naw chun, mi dang intlan suoktir a ta, sienkhom a pu chun mi dang kuomah zor thei naw nih.
9. A naupa nuhmei dinga a huol a lo ni chun a naunu ang charin a en ding a nih.
10. A naupan nuhmei dang a neisan a ni khomin, fak le dawn le sil le fen a pek bakah a nuhmei a nina chanvo chu a hlippek ding a ni nawh.
11. Chuong thil pathumhai chu a thawpek si naw chun, intlanna sum pe loin, zalenin suok thei a tih.
12. "Tu khomin mi a vuok hlum chun ama khom sukhlum ve ngei ngei ding a nih.
13. Chun, tum reng lei ni loa Pathienin a'n tlungtir a ni ruok chun, a tlan lutna ding hmun keiman ruotpek ka tih.
14. Amiruokchu, phierruk a, tum reng leia a that a ni chun ka maichama inthokin thuoi hmang unla, sukhlum ro.
15. "Tu khom mani nu le pa vawtu chu sukhlum ngei ro.
16. Tu khom mihriem inrua zortu amanih, a la kol zing laia man amanih a ni chun ama chu sukhlum ngei ro.
17. Tu khom mani nu le pa tongsie inphurtu chu sukhlum ngei ro.
18. "Chun, mi an inhal a, pakhatin lunga dengin amanih kuttum a thlak a, thi ruok chu thi em loa khum beta a um chun,
19. hliema um kha a hung tho inkang a, funghrol thuna tuol a suok thei pha leh a vawtu kha insuo ding a nih; amiruokchu hliem tuortu hun inhmang hu zat rul a ta, a dam var chena inenkolnaa seng po po tum bok a tih.
20. "Tu khomin a bawipa amanih a bawinu amanih hmola a vuok hlum chun ama chu hrem ngei ding a nih;
21. sienkhom bawi chu ni khat ni hni hnunga a hung tho inkang nawk ruok chun hrem lo ding a nih, bawi chu ama thil nei laia mi a ni si a.
22. "Pasal insuolin nuhmei inrai lai lo tawk sa palin nau insiet pha sien, hliem na naw sienkhom, a pasalin a ngen zat le roreltuin a remti ang zat chu a sukhliemtu chu inchawitir ding a nih.
23. A hliem na a ni ruok chun hringna aiah hringna,
24. mit aiah mit, ha aiah ha, kut aiah kut, ke aiah ke,
25. raw aiah raw, hliem aiah hliem, vuok aiah vuokin in thung let ding a nih.
26. "Tu khomin a bawinu amanih bawipa amanih mitah vawin lo sukse pal sien, a mit siet aia zangna domna dingin bawi chu a'n suo zalen ding a nih.
27. A bawinu amanih bawipa amanih ha a lok tlam chun, a ha tlam aia zangna domna dingin a bawi chu a'n suo zalen ding a nih.
28. "Bawngchalin nuhmei amanih pasal amanih a sikhlum chun, chu bawngchal chu in denghlum ngei ding a nih; a sa khom fa naw ro. Bawngchal neitu ruok chu hrem lo ding a nih.
29. Bawngchal chu a hma khoma mi sik hmang a ni a, a neitu khomin chu chu a hriet a, sienkhom a khum nuom chuong si naw leia nuhmei amanih pasal amanih a lo sikhlum a ni ruok chun, a bawngchal chu denghlum ding a na, a neitu khom sukhlum bok ding a nih.
30. Amiruokchu, intlan dinga intukna a um chun hringna aiah an tuk zat taphot chu peka intlan thei ning a tih.
31. Mi naupa amanih naunu amanih khom lo sikhlum sien, hi dan ang boka rel ding a nih.
32. Bawinu amanih bawipa amanih a lo sikhlum a ni ruok chun bawi neitu kuomah tangka shekel sawmthum peng an ta, a bawngchal ruok chu lunga deng hlum ding a nih.
33. "Chun, miin a khur nei sin lo amanih, a khur cho nel nawk loa a um leia bawngchal amanih sabengtung amanih a lo tla hlum chun,
34. khur neitu chun rul a ta, ran neitu kuomah zangna domna tangka peng a ta, ama chun ran ruong chu inhlawm a tih.
35. "Chun, mi pakhat bawngchalin mi dang bawngchal lo sikhlum sien, bawngchal la dam chu zor an ta, a man le bawngchal thi ruong chu inzat charin insem an tih.
36. Amiruokchu, bawngchal la dam chu a hma khoma mi sik hmang a na, a neituin a khum nuom si naw lei a ni chun a neitu chun bawngchal chu peng a ta, bawngchal thi ruong chu aman chang thung a tih.
←  Exodus (21/40)  →