←  Exodus (20/40)  →
1. Pathien chun hieng thu po po hi a hril a:
2. "Kei hi bawia in intangna Aigupta rama inthoka thuoi suoktu cheu LALPA in Pathien chu ka nih.
3. "Keima naw chu Pathien dang nei naw rawh.
4. "I ta dingin milem siem naw rawh, chung tieng vana mi amanih, hnuoi tieng hnuoia mi amanih, tui sunga mi amanih lem i siem ding a ni nawh.
5. Chuong thil hmaa chun kunin i chawibiek ding a ni nawh. Kei, LALPA i Pathien hi Pathien thikthu sie, pahai thil suol thaw leia an nauhai hrem hlak, mi theidatuhai chu an thlahai suon thum suon li chen khom hrem hlak le
6. mi hmangaia ka thupek zawmtuhai ruok chu suon sang tam tak chen chunga khom hmangaina inlangtir hlaktu chu ka nih.
7. "LALPA Pathien hming salin khel hril naw rawh; LALPA chun a hming hmang suoltu chu hrem loin insuo naw nih.
8. "Sabat hi thienghlim taka inser ding a nih ti hre zing rawh.
9. Ni ruk sung chu thokrimin sin thawng i ta,
10. ni sarina ruok chu LALPA i Pathien chawlni a nih. Chu ni chun sin ieng khom i thaw ding a ni nawh, nangni le i naupa le naunu, i suoknu le suokpa, i ranhai le i ina cheng ram dang mihai khomin.
11. Ni ruk sungin LALPAN hnuoi le vanhai, tuifinriet le a sunga um po pohai a siem a, a ni sarinaa ruok chu a chawl si a. Chuleiin, LALPAN chawlni chu mal a sawm a, a sukthienghlim a nih.
12. "I nu le pa chawimawi rawh, chuongchun LALPA i Pathienin a pek che rama hin dam sawt i tih.
13. "Tuol that naw rawh.
14. "Uire naw rawh.
15. "Inru naw rawh.
16. "I venghai khelin hek naw rawh.
17. "I venghai in le lo inhnar naw rawh. I tuolbawm nuhmei amanih, a siehlawnu le siehlawpa amanih, a bawngchal le sabengtung amanih le a thil nei dang hrim hrim inhnar bok naw rawh" tiin.
18. Mipuihai chun vaninrum dam, kawlinlep dam, tawtawrawt ri dam hre a, tlang kang khu lui lui dam an hmu chun thlabarin an inthin a.
19. Hla taka ngirin Mosie kuomah, "Nangman kan kuomah thu hril lem ta la, lo ngaithlang kan tih. Pathien ruok chun kan kuomah hril ta naw hram raw se, kan thi el thei ding a nih" an ta.
20. Mosie chun an kuomah, "Ti naw ro. Pathien tina nei a, thil suol in thaw nawna dingin Pathienin a hung fie cheu a ni hi" a ta.
21. Pathien umna sum sa tak tieng pana Mosie a fe lai chun mipui chu hla takah an ngir a.
22. LALPA chun Mosie kuomah, "Vana inthoka ka hung biek che ti Israelhai chun an hriet a, an kuomah hieng hin hril rawh:
23. Keima ti lo pathien dang hrim hrim in nei ding a ni nawh; tangkaruo le rangkachaka siem pathien lem khom in ta dingin siem bok naw ro.
24. "Pilin ka ta dingin maicham siem unla, in beramhai, in kelhai le in bawnghai chu pumraw thilhlan le inremna inthawina dingin inhlan ro. Khaw lai khom ka hming ka'n hriettirna taphota chun in kuomah hung ka ta, mal sawm ka ti cheu.
25. Chun, lung hmanga maicham in siem pha leh lung ser hmangin siem naw ro, hriemhrei in hmang chun sukporche rawi in tih.
26. Ka maicham kailawnah kai tung naw ro, in saruokna inlang pal rawi a tih.
←  Exodus (20/40)  →