←  Exodus (17/40)  →
1. Israelhai chu Sin thlalera inthok chun LALPA thupek angin hmun dang dangah an inson pei a, Refidim-ah riebuk an khuor a, sienkhom chu taka chun mipui dawn ding tui a um si nawh.
2. Mipuihai chun Mosie kuomah, "Dawn ding tui mi pe rawh" an ta. Mosie chun an kuomah, "Ieng dinga kei in mi mawsiet am a na? Ieng dinga LALPA in fie?" a ta.
3. Mipui hlak chu an dang a char si leiin Mosie chungah an chier a, "Ieng dinga keini le kan nauhai le kan ran ruolhai hi thlalera dangchara thi ding hin Aigupta rama inthokin i mi thuoi suok am a na?" tiin an suosal a.
4. Chuongchun, Mosie chun LALPA a ko a, "Hi mihai hi ieng am ka law ding a na? Lungin an mi deng tep a ni ta si a" a ta.
5. LALPA chun Mosie kuomah, "Mipuihai hmaah Israel upahai kha thuoi la, Nile vadung i vuokna hmol kha chawi bok la, fe rawh.
6. Horeb-a lungpui chunga son i hmaah lo ngir ka ta, lungpui chu vaw la, mipui dawn ding tui hung suok el a tih" a ta. Chuong ang chun Israel upahai mit hmuah Mosie chun a thaw a.
7. Chu hmun hminga chun Massa le Meribag a'n buk a, Israelhaiin ama chu inhalpui a, "LALPA chu eini lai a um tak tak meu am um tak tak naw" tia an fie lei a nih.
8. Refidima an um lai chun Amalek mihaiin Israelhai chu an hung bei a.
9. Mosie chun Josua kuomah, "Eini laia mi iemani zat thlang suok la, Amalekhai chu va bei ro. Zingah tlang sipa khin Pathien hmol hi chawiin lo ngir ka tih" a ta.
10. Mosie thupek angin Josua chun Amalek mihai chu a va do a, Mosie le Aron le Hur chu tlang sipa chun an kai tung a.
11. Mosien ban a phar sung po chun Israelhaiin an hne a, a ban a lak thlak pha leh Amalek mihai chu an hrat ve thung a.
12. Mosie ban a hung kham chun lung an va lak a, chu chunga chun a thung a, a ban chu a phar zing theina dingin Aron le Hur chun a ban khing tieng ve vea thangin nisa tlak chenin an dompui a.
13. Chuong ang chun Josuain Amalek sipaihai chu kawlhnam hmangin a tukdol tah a nih.
14. Chun, LALPA chun Mosie kuomah, "Hi thu hi hriet zing dingin lekhabuah ziek thla la, Amalek mihai hi van hnuoi mi tu khom hriet ta lo dingin ka nuoi bo ding a nih ti Josua ngei khom hril rawh" a ta.
15. Chu hmuna chun Mosien maicham a siem a, a hmingah Jehova Nissih a'n buk a.
16. Ama vekin, "LALPA lalthungpha tieng kut ka phar ta si a. LALPA chun suona inthoka suon nawk peiah Amalek mihai chu do tang a tih" a ta.
←  Exodus (17/40)  →