←  Exodus (16/40)  →
1. Israel mipui po po chu Elim hmuna inthok chun an suok a, Aigupta ram an suoksana inthoka thla hnina ni sawm le pangaa chun Elim le Sinai inkara um, Sin thlaler chu an tlung a.
2. Israel mipui chu thlalera chun Mosie le Aron chungah an chier a.
3. Israelhai chun an kuomah, "Aigupta ramah sa bel bulah thung a, du tawka bei ei tlan lai khan LALPA kutah lo thi ta lem inla a that awm vei leh, hi thlaler hmuna hin pungkhawmhai po po hi phingtama thi dingin in mi thuoi suok a lo ni hi tie!" an ta.
4. Chuongchun LALPAN Mosie kuomah, "In fak ding vana inthokin bu ka'n surtir ding a nih. Mitinin an ni khat tlak pei chauh rut raw hai se. Chuong ang chun ka thupek an zawm le zawm naw hang fie tawl ka tih.
5. A ni ruknaa ruok chu an ni hni tlak rutin an siem ding a nih" a ta.
6. Mosie le Aron chun Israelhai kuomah, "Aiguptaa inthoka thuoi suoktu cheu hi LALPA a nizie zan tieng hin hrieng in tih.
7. Chun, zing tieng leh LALPA ropuizie hmung in tih, a chunga in chierna thu chu a hriet ta si a. Keini hi ieng telul am kan na, in mi chier khum chu?" an ta.
8. Mosie chun, "LALPAN zan tieng sa le zing tieng bu a pek cheu in hmu pha chun a thawtu chu LALPA a nih ti hre tang in tih, a laka in chierna kha a lo hriet ta si a. Keini hi tu am kan ni a? Keini laka chier ni loin Pathien laka chier in ni lem" a ta.
9. Chun, Mosie chun Aron kuomah, "Israel pungkhawmhai kuomah, 'LALPA hmaah hung ro, in chierna kha a hriet ta si a' tiin hril rawh" a ta.
10. Aronin Israel mipuihai kuoma thu a hril lai chun, thlaler tieng an hei thlir a, LALPA ropuina chu sumah a hung inlang a.
11. Chun, LALPAN Mosie chu a biek a,
12. "Israelhai chierna kha ka lo hriet; an kuomah, 'Zanbuah sa fang in ta, a tuka ruok chu tlai takin bu fa tang in tih. Chuongchun, kei hi LALPA in Pathien chu ka nih ti hrieng in tih' a tih tiin hril rawh" a ta.
13. Zan tieng chun an riekbuk tuom khopin vamim an hung vuong lut ta hum hum a; zingkar chun an riebuk vela chun daidaw a lo tla dup el a.
14. Daidaw a hang hul chun thlaler hnuoi chunga chun thil biel inper chik te te, daidaw khal ang el chu a bang uoi el a.
15. Chu chu Israelhaiin an hmu chun, "Hi hi iem a na?"f an ta, iem a nih ti an hriet si nawh. Mosie chun an kuomah, "In fak dinga LALPA bei pek cheu a ni hi.
16. Hi hi LALPA thupek chu a nih: Mi tinin mani mamaw tawk peiin in rut khawm ding a nih. In puon ina cheng mi pakhat pei ta dingin litar hni pei in rut ding a nih" a ta.
17. A hril ang chun Israelhai chun an thaw a, a rut teuh an um a, tlawmte rut an um bok a.
18. Noa an inkhi pha a rut tamin a hau bik naw a, a rut tlawmin a chang tlawm chuong bik bok nawh. Mi tinin mani khop tawk seng an rut a.
19. Chun, Mosien an kuomah, "Tu khomin a zinga fak dingin khek naw ro" a ta.
20. Amiruokchu, thenkhatin an poisa naw a, a zinga dingin an sie a, sienkhom a lo innge vong a, a rim a se em em a, chuleiin an chungah Mosie lung a sen hle a.
21. Tuk tin mani fak khop tawk chauh an rut ta seng a, nisa a hung insang pha leh a'n tui ral vong hlak.
22. A ni ruk nia ruok chu a let hnia tam, mi pakhatah litar li pei an rut a, chu chu khawtlang hotuhai chun Mosie kuomah an hung ripawt a.
23. Ama chun an kuomah, "Hi hi LALPA thupek chu a nih: 'Zinga chu LALPA Chawlni thienghlim, Sabat a ni leiin chawlna ni ding a nih. Chuleiin, beia zeu nuomin zeu unla, a suonga suong nuomin suong ro. In fak mahla chu zinga dingin hla ro" a ta.
24. Mosie hril ang chun a zinga ding khom an hla a, sienkhom a thum naw a, a'n nge bok nawh.
25. Mosie chun an kuomah, "Voisun chu hi hi fa ro. Voisun hi LALPA ta dingin Sabat a na, tuolah rut ding um naw nih.
26. Ni ruk sungin tuk tin rut in ta, a ni sari ni ruok chu Sabat a ni leiin rut ding ieng khom um naw nih" a ta.
27. A ni sari ni chun mi thenkhat chu rut dingin an suok a, amiruokchu rut ding an hmu nawh.
28. Chun, LALPA chun Mosie kuomah, "Ieng chen am ka thupek le ka danhai hi poisa loin in um ding a na?
29. En ta, LALPA chun chawlni a pek cheu a, chuleiin a ni ruk niah ni hni ring bu a pek cheu a nih. Mi tin in umnaah um tok tok unla, a ni sarinaa chu tukhom suok dok naw ro" a ta.
30. Chuongchun, mipuihai chu a ni sarinaa chun an chawl a.
31. Israel sungkuohai chun chu thil chu manna tiin an ko a. Maruoi mu anga var sar el a na, hang fak chun beipera khuoizu nal ang a nih.
32. Mosie chun an kuomah, "Hi hi LALPA thupek chu a nih: Manna omer khat la unla, suon la hung thar pei dinghai khoma Aigupta rama inthoka ka thuoi suok lai cheua thlalera fak ding bu ka pek cheu hi an hriet zing theina dingin, sie tha ro" a ta.
33. Mosie chun Aron kuomah, "Bel chawi la, a sungah manna litar hni thun rawh. Chu chu Pathien hmaah suon la hung thar pei ding chena vong dingin LALPA hmaah sie rawh" a ta.
34. LALPAN Mosie kuoma thu a pek angin, manna chu vong zing dingin Aron chun Thuthlungna hmaa chun a sie a.
35. Israelhai chun mihriem chengna ram, Kanan ramri bul an tlung chenin manna chu kum sawmli sung an ring a nih.
36. Chuong laia bu inkhinaa an hmang tak chu efa a na, chu chu litar sawmhni tluk a nih.
←  Exodus (16/40)  →