←  Exodus (15/40)  →

---

1.

Chuongchun, Mosie le Israelhai chun LALPA chawimawiin hi hla hi an sak a:"LALPA inpakna hla sak ka tih,Ropui takin a hne ta si a;Sakor le a chunga chuonghai chu,Tuipuiah a pei thlak tah.

2.

LALPA chu ka hratna le ka hla,Mi sandamtu a hung ni tah. Ama chu ka Pathien a na,Ama chu inpak ka ta,Ka thlatuhai Pathien a na,Ama chu chawimawi ka tih.

3.

LALPA chu ralhrat a na,A hming khom LALPA a nih.

4.

Faraw tawlailirhai leA sipaihai po po chu,Tuipuiah a pei thlak tah. A hotu suongtawlolhai,Tuipui Senah an pil vong.

5.

Tuiin a chim pil vong a,Lungtum thlak ang vang vangin,Li rilah an pil hmang tah.

6.

LALPA, i kut chang tieng chu,Thilthawtheinan a sip a,LALPA, i kut chang tieng chun,Hmelmahai i pot nawi vong.

7.

I lalna ropui tak chun,Nangma khingtuhai che chu,I pei thlak tawl ta vong a,I lungsenna puok dar chun,Anni chu bu pawl angin,A kang hmang vong ta si a.

8.

I hnar i hang hnawt meu chun, Tui a hung intieng thur a,Tuifawn insawk lai hai khom,Bang angin an ngir khup a,Lipui rila tuihai khom,An inkhal zo tah a nih.

9.

Hmelma chun chapo takin,'Hnot thlurin hnot khum ka ta,Ka rallakhai chu semin,Ka du tawkin chen ka ta,Ka kawlhnam chu phawi suokin,Ka kut ngeiin anni chu,Sukbohmang ka tih' a tih.

10.

Sienkhom thuoka i mut chun,Tuipuiin a chim pil tawl a,Tuia suon tum thlak angin,Tuipuiah an pil vang vang.

11.

Aw LALPA, nang ang hrim hi,Tu pathien am an um a?Thienghlimna tienga ropui,Ropuina tienga rapum,Thil mak ropui tak thaw hlak,Tu hrim am um tang an ta?

12.

I kut chang tieng i phar a,Hnuoiin a lem zo tawl tah.

13.

I hmangaina chuoi lo chun,I'n tlansahai i thuoi a,I hmun thienghlim tlung chenin,I hratnan thuoi pei i tih.

14.

Hnam danghan an hriet pha chun,Tiin inthin hawp an ta,Filistin mihai khom chu,Thlaphangnan man tawl a ta,

15.

Edom lalhai chi-aiin, Moab hotuhai khom chu,Inthinnan man tawl a ta;Kanan rama chenghai khom,Intui ral zo vong an tih.

16.

Titna le thlaphangnaha'n,Anni chu tlakbuok a ta,I ban tha hrat an hmuin,Lung angin inchang an tih,Aw LALPA, i mihaiin,I'n chawk sa i mihaiin,Chu hmun an fe thleng chenin.

17.

Anni chu hung thuoi lutin,I ro hluo tlanga ngei chun,Anni chu la phun i ta,Chu hmun chu chengna dinga,Aw LALPA i siem a na,A hmun thienghlim khom LALPA,I kuta i'n din a nih.

18.

LALPA chun ro rel a tih,Chatuon a'nthok chatuon chenin"tiin.

19.

Faraw sakor hai, tawlailir hai le sakor chungchuong hai chu tuipuia an lut zoin LALPAN tui chu a hung inluong kirtir a, Israelhai ruok chun hnuoi charah tuipui chu an fe thleng a nih.

20.

Chun, zawlnei Miriam, Aron farnu chun khuongte a chawi a, a hnunga chun nuhmei po poin khuongte chawiin an zui a, an lam a.

21.

Miriam chun hi hla hi a sakpek a: "LALPA inpakna hla sak ka tih,Ropui takin a hne ta si;Sakor le a chunga chuonghai,Tuipuiah a pei thlak tah"tiin.

22.

Mosie chun Israelhai chu Tuipui Sena inthok chun Sur thlalerah a thuoi a, ni thum zet an inzin sungin tui hrim an hmu nawh.

23.

Mara hmun an hung tlung a, tui chu a kha leiin an dawn thei naw a, chu leia chu hmun chu Mara ti an inbuk a nih.

24.

Mipui chun Mosie kuomah, "Iem a na ei dawn ta ding?" tiin a chunga chun an chier a.

25.

Mosie chun LALPA a ko a, ama chun thing pakhat hi a kawkhmu a, chu chu tuiah a zuk deng lut a, tui chu a hung inhnik ta a. Chu hmuna chun LALPAN thupek le danhai a siempek a, anni chu a fie bok a.

26.

"LALPA in Pathien rawl fimkhur taka ngaithla a, a mit hmua thil indik thaw a, a thupekhai le a danhai in poisa chun, Aigupta mihai chunga hremna hri ka'n lengtir ang kha nangni chunga chu inlengtir ve naw ning; kei hi LALPA, a sukdamtu cheu chu ka ni si a" a ta.

27.

Chun, tui hnar sawm le pahni le tum thing sawmsari umna Elim chu an tlung a, chu hmuna chun tuikhur bulah an riek a.

---

←  Exodus (15/40)  →