←  Exodus (13/40)  →
1. LALPA chun Mosie kuomah,
2. "Mihriem a ni leh nau pasal, ran a ni leh a chal pieng hmasa tak chu ka kuomah hung inhlan pei rawh; Israel thlahai laia mi sul ner hmasa tak chu ka ta a nih" a ta.
3. Chun, Mosie chun mipuihai kuomah, "Voisun, bawia in intangna laka LALPA kut hrata Aigupta rama inthoka a thuoi suokna cheu ni hi in inser hlak ding a nih. Hi ni hin chol thanga siem bei hrim hrim in fak ding a ni nawh.
4. Voisun, Abib thlaa hin in suok a ni hih.
5. Kanan mihai, Hit mihai, Amor mihai, Hiv mihai le Jebu mihai ram hluo, khuoizu le nenetui luongna, in thlatuhai kuoma inkham meua pek a tiem ramah LALPAN a thuoi tlung pha cheu chun hi ni hi tuta thlaa hin in inser hlak ding a nih.
6. Ni sari sung chu chol thang lo bei in fak ding a nih. A ni sarina chu LALPA ta dinga kut a ni ding a nih.
7. Ni sari sung chun chol thang lo bei in fak ding a nih. Chol thanga siem thil hrim hrim nangni lai a um ding a ni nawh. In umna taphotah chol a um ding a ni bok nawh.
8. Chu ni chun in nauhai kuomah, 'Aigupta rama inthoka kan suok lai khan LALPAN thil a mi thawpek leiin hi ni hi kan inser a nih' tiin in hril ding a nih.
9. LALPA dan chu in bauah a um zing theina dingin, hi thil inser hi in kutzie ang le in chalmit inkara inchikna angah ngai ro. LALPA kut hratin Aiguptaa inthokin a thuoi suok ta si cheu a.
10. Hi dan thu hi zawmin kum tin kut hi a hun takah in hmang zie hlak ding a nih.
11. "Chun, in pi le puhai kuoma inkham meua pek a tiem Kanan ramah LALPAN thuoi luta a tiem ram a pek pha cheu chun,
12. in rila ra hmasa tak pasal taphot chu LALPA kuomah in inhlan ding a nih. In ran laia a chal pieng hmasa tak khom LALPA kuomah in inhlan bok ding a nih.
13. Sabengtung chal pieng hmasa tak chu beramtein in intlan ding a nih. In intlan nuom naw chun a ring in suktliek ding a nih. In nau lutir pasal taphot chu in intlan bok ding a nih.
14. "Chun, hi hnung peiah i nauhaiin, 'Hi thil umzie hi iem a na?' tia an hung indon pha che chun a kuomah, 'LALPA kut hratin bawia kan intangna Aigupta rama inthokin a mi thuoi suok a.
15. Lulul taka Farawin mi char de a tum tlat laiin, LALPAN Aigupta rama nau lutir po po, a mihriem a sain, a sukhlum vong a. Chuleiin ran laia a chal pieng hmasa tak phot LALPA kuomah inhlan a, kan naupasal pieng hmasa tak phot kan intlan hlak chu nih.
16. Chu chu i kutzie le i chalmit inkara inchikna ang el khan LALPA kut hratin Aiguptaa inthoka a mi thuoi suokzie inchikna a nih' tiin hril hlak rawh" a ta.
17. Farawin mihai a'n suo khan Filistinhai ram tieng chu lam hnaina lem ni sienkhom Pathienin chu tieng chun a thuoi nawh. Pathienin "Indona an tuok pal chun insir an ta, Aigupta ram tieng kir nawk hlauh rawi an tih" a ti lei a nih.
18. Chuongchun, mipuihai chu Tuipui Sen tieng panin thlaler lamah Pathienin a thuoi a, indo dinga inralring zingin Aigupta rama inthokin Israel thlahai chu an inthok suok tah a nih.
19. Josefan, "Pathienin a la hung kan nawk ngei ngei ding cheu a na, ka ruhai chu hi taka inthok hin in zawn tung ding a nih" tia Israel thlahai a'n cha anga thaw dinga thu inkham meua a lo intiemtir tah angin, Mosie chun Josefa ruhai chu a hawn tung a.
20. Sukot-a inthok chun an fe pei a, thlaler tontira khuo Ethama chun riebuk an khuor a.
21. Sun le zana an inzin theina dingin LALPA chun sunah sum lawnin an hma a thuoi a, zanah mei lawnin an lampui a el var bok a.
22. An hma thuoitu suna sum lawn le zana mei lawn chun mipui chu a fesan ngai hrim hrim nawh.
←  Exodus (13/40)  →