←  Exodus (12/40)  →
1. Chun, LALPAN Aiguptaa chun Mosie le Aron a biek a, "Tuta thla hi in ta dingin thla hmasa tak ning a ta,
2. kum khat sunga thla in tiem tanna ning a tih.
3. Hi thla ni sawmnaa hin sungkuo tinin mani sungkuo ta ding seng beram tuoi pakhat la chit dingin Israel thlahai po po hril rawh.
4. Chun, beram tuoi thatna khop ni loa tlawm sungkuo an um chun an tuolbawmhai leh an sungkuo tamzie ang peiin beram pakhat intlang raw hai se. Mi tin fak khop tawk ang peia hisapin beram tuoi that ding zat chu ruot ro.
5. Ran tuoi in thlang dinghai chu kum khata upa, hmel hem lo ning a ta, kel amani beram amani laia mi a ni ding a nih.
6. Chu thla ni sawm le ni lina chen chu kol inta, chu zan tieng thimbut chun Israel sungkuo tinin in that seng ding a nih.
7. A thisen iemani zat lang in ta, chu chu a sa in fakna in kotkhar bieng chung le sir ve veah in tat ding a nih.
8. Chu zan la la chun a sa chu meiah em hminin, chol thang lo bei le thlai hna kha leh in fak ding a nih.
9. A selin fa naw unla, tuiin suong naw unla, a lu le a ke le a sung thang vongin in em hmin ding a nih.
10. A zinga ding ieng khom hla naw ro; a tuk chena fak bang la um chu meiah raw hmang ro.
11. Chun, hieng ang hin in fak ding a nih: thuom inbel sa diema pheikhok bunin, hmol chawiin, inhmaw takin fa ro, LALPA fekan kut a ni si a.
12. "Chu zan ngei chun Aigupta ram fang ka ta, mihriem le sa, nau lutir po po chu sukhlum ka ta, Aigupta rama pathienhai po po chu an chungthu relpek ka tih; kei hi LALPA chu ka ni si a.
13. Thisen chu in ta dingin in umna inchikna ning a ta, thisen ka hmuna taphot chu fe kan pei ka tih. Aigupta ka hrem ni chun nangni sukse thei hri reng reng inleng ve naw nih.
14. "Hi ni hi theinghil loa in inser hlak ding ni, thang la hung thar peihai khomin LALPA ta dinga kut hmanga an inser kumkhuo ding chu a nih.
15. Ni sari sung chu chol thang lo bei in fak ding a nih. A ni hmasa takah chol hrim hrim ina inthokin in inthiel fai vong ding a nih. Tu khom hi ni sari sunga chol thang bei fatu chu Israel sungkuo laia inthokin in thlauthlak ding a nih.
16. A ni hmasa tak le a tawpna takah inkhawmna hun ser in nei ding a nih. Hi ni hin mani fak siem ti chauh naw chu sin dang hrim hrim in thaw ding a ni nawh.
17. "Chol Thang lo Bei Kut hi in inser ding a nih, chu ni ngei chun Israel mipuihai chu Aigupta rama inthokin ka thuoi suok a nih. Thangthar peihai khomin dana neiin hi ni hi an inser hlak ding a nih ti hi kumkhaw thupek a nih.
18. A thla hmasa tak ni sawm pali zan tienga inthoka ni sawmhni pakhat zan tieng chen chol thang lo bei in fak ding a nih.
19. Ni sari sung chu in inah chol hrim hrim a um ding a ni nawh. A rama pieng le mikhuol tukhom chol thang bei fatu chu Israel sungkuo laia inthokin in thlauthlak ding a nih.
20. Chol thanga siem ieng khom fa naw ro. Khaw lai khom um inla, chol thang lo bei in fak ding a nih' tiin hril rawh" a ta.
21. Mosie chun Israel upahai chu a ko khawm vong a, an kuomah, "Fe vat unla, in sungkuo tin ta ding beram tuoi va thlang unla, Fekan Kuta ding beramte chu that ro.
22. Husop kau thliek unla, maihuna beramte thisena chun phum unla, in kotkhar chung le bieng ve veah thisen chu tat seng ro. A tuk khuo a var hma chun tu khom mani ina inthokin suok naw ro
23. LALPAN Aigupta mihai hrem dinga a ram a hung fang pha, in kotkhar chung le bieng intona thisen kai chu hmung a ta, fe kan a ta, sukhlumtu chu nangni sukhlum dinga a hung lut phal naw nih.
24. "Ka thupekhai hi nang le i thlahaiin in hung zawm kumkhuo ding a nih.
25. LALPAN pek a tiem cheu ram in lut pha khom hi ni hi inser hlak ro.
26. In nauhaiin, "Hi ni in inser hin ieng am in ta dingin umzie a nei a?" tia an indon pha che chun,
27. Hi hi LALPA Fekan leia inthawina a nih, ama chun Aigupta mihai a sukhlum lai khan kan inhai fekanin ami hla a, Aigupta rama Israel nauhai in chu a hung fe kan pei lei a nih' tiin in hril tawl ding a nih" tiin. Chu zoah mipui chun kunin Pathien an chawibiek a.
28. Mosie le Aron kuoma LALPAN thu a pek ang charin Israelhai chun an thaw a.
29. Zan rila chun LALPAN Aigupta rama nau lutir po po, lalthungphaa inthung Faraw naupaa inthoka rip sunga intang nau lutirhai le ran pieng hmasa tak po po chenin a sukhlum ta vong a.
30. Faraw chu a thoktuhai po po le Aigupta mi po po le chun zanah an tho a, Aigupta chu lusun tap riin a sip a, mithi um nawna in hrim a um si nawh.
31. Faraw chun Mosie le Aron chu a zan a zanin a'n kotir a, an kuomah, "Tho unla, nangni le Israel thlahai po po hi ka mipuihai laia inthok hin suok ro. In mi hni ang khan fe unla, LALPA chu va chawibiek ro.
32. In ti ang khan, in ran ruolhai khom thuoi unla, fe ta ro. Chun, mal mi sawm bok ro" a ta.
33. Aigupta mihai chun Israelhai kuomah, "In suok vat naw chun kan thi fai zo hman ding a nih" tiin an ram suoksan inhmaw dingin an nor a..
34. Chuongchun, mihai chun an bei hmet lai khom chu chol pol hman loin, an hmetna thleng le chun puonin an fun a, liengkoah an inchuon a.
35. Mosien a hril tawl ang khan Israelhai chun Aigupta mihai chu tangkaruo le rangkachaka siem incheina thilhai le silfenhai chu an hni a.
36. LALPA chun anni chu Aigupta mihai lunginsiet a'n phurtir a, an hni hni an pek a; chuong ang chun Aigupta mihai thil chu an rokpek tah a nih.
37. Israel thlahai chun Ramases khuoa inthokin Sukoth an tlung a, naupang tiem loin, puitling, kea lawn ringot khom nuoi ruk lai an nih.
38. Anni ruol chun hnam dang mi tam tak an fe ve a, beram ruol le bawng ruol an som teu bok a.
39. Aiguptaa inthoka chol thang lo bei hmet sa an chawihai chun chol thang lo bei an siem a. An bei hmeta chol an pol hman nawna san chu inhmaw taka hnaw suoka an um lei a nih, an fak ding buotsaina hun takngiel khom an nei hman si nawh.
40. Aigupta rama Israel thlahai an um sung chu kum zali le sawmthum a nih.
41. Kum zali le sawmthum an voi ni charin LALPA mihai chun Aigupta ram chu an suoksan ta vong a nih.
42. Chu zan, Aiguptaa inthoka a thuoi suok zan chun LALPAN a veng zing tawl angin, hi zan hi inserin, Israel mi po po chun, suon la hung pei ding chena khom, LALPA chawimawi dingin an meng khawvar ve ding a nih.
43. LALPA chun Mosie le Aron kuomah, "Fekan Kut in hmang dan ding chu hieng ang hin a nih: Hnam dang mihan kut sa hi an fak ve ding a ni nawh.
44. Amiruokchu, tangkaa bawi in inchawk tah, ser in tanpek tahai ruok chun fa thei an ta,
45. mikhuol lenglak le sinthawa mi in sorhai ruok chun fa thei naw ni hai.
46. In insung ngeiah in fak ding a nih; puo tieng chawi the phal a ni naw a, a ru in suktliek ding a ni bok nawh.
47. Israelhai po poin chu ni chu an inser ding a nih.
48. Nangni laia cheng ram dang miin LALPA Fekan Kut hmang ve an nuom chun an sungkuoa pasal poin ser an intantir ding a nih; chuonga an thaw chun a rama pieng ang thoin thang ve thei an tih. Sertan lo tu khomin kut sa an fak ding a ni nawh.
49. Chu dan chun a rama pieng le ram dang mi, nangni laia khawsahai khom a huop vong a nih" a ta.
50. LALPAN Mosie le Aron a hril ang takin Israel thlahai po po chun an thaw a.
51. Chu ni chun LALPAN Israel thlahai chu Aigupta rama inthokin a thuoi suok tah vong a nih.
←  Exodus (12/40)  →