←  Exodus (11/40)  →

---

1.

LALPA chun Mosie kuomah, "Faraw le Aigupta chungah hripui dang ka la hung inlengtir ding a nih. Chu zoa chun infetir a ti cheu a, a'n fetir pha cheu chu a hnotin a nih a hnot suok ding cheu.

2.

Mihai kha hril la, a nuhmei a pasalin an tuolbawmhai kuomah tangkaruo le rangkachaka siem incheina thilhai chu hni raw hai se," a ta.

3.

Mihai chu LALPAN Aigupta mihai lunginsiet a'n hlawtir a; chun Mosie chu Aigupta rama Faraw thoktuhai le a mipuihaiin nasa takin an ngaisang bok a.

4.

Mosie chun, "Hieng ang hin LALPA chun a hril: 'Zan ril velah Aigupta ram sir suok ka tih.

5.

Aigupta rama nau pasal pieng hmasa tak taphot, Faraw nau lutir, lalthungphaa inthung laia inthoka bu rawtna lunga thok bawinu nau lutir chen khom thi'ng an ta, ran chen khom a chal pieng hmasa tak chu thi vong bok an tih.

6.

Aigupta ram chu tap inrum riin sip a ta, chuong ang hrim hrim chu a hmain a la um ngai naw a, um nawk ta ngai bok naw nih.

7.

Israelhai lai ruok chu uiin mi amanih ran amanih an inbau ri tak ngiel khom hriet ni naw nih. Chu pha chun LALPAN Aigupta mi le Israel mihai chu a thlier ngei a nih ti hre tang in tih.

8.

I thoktuhai po po hi ka kuomah hungin ka hmaah la bokkhup an ta, 'Fe ta rawh, nang le a zuituhai po po le hin' tiin mi la hung ngen an ta, chu pha chun suok ka tih" a ta. Chuongchun, Faraw kuoma inthok chun lungsen takin a suok a.

9.

LALPA chun Mosie kuomah, "Aigupta ramah thil mak tam lem ka thawna dingin Faraw chun i thu ngaithlapek naw ni che" a ta.

10.

Mosie le Aron chun chuong thil makhai chu Faraw hmaah thaw hai sien khom LALPAN Faraw lungril a sukkhau tlat leiin a rama inthokin Israelhai chu a'n suoktir nuom si nawh.

---

←  Exodus (11/40)  →