←  Exodus (10/40)  →
1. Chun, LALPA chun Mosie kuomah, "Faraw kuomah fe la, LALPA chu ka nih ti in hrietna dinga inchikna thil mak tam tak ka thaw theina ding le chuong inchiknahai chu thaw a,
2. khau taka Aigupta mihai ka soisak thuhai chu in nauhai le in tu le tehai kuoma in inzawt theina dingin, Faraw le a thoktuhai lungril ka sukkhau a nih" a ta.
3. Chuongchun, Mosie le Aron chu Faraw kuomah an fe a, "LALPA, Hebraihai Pathien chun hieng ang hin a hril: 'Ka hmaah ieng chen top am inngaitlawm nuom loa i um ding chu? Ka mihai hi insuoktir rawh, an mi chawibiek theina dingin.
4. Ka mihai i'n suoktir phal naw chun zinga hin in ramah khau honpui ka hung intamtir ding a nih.
5. Hnuoi hi inlang thei lo khopin dap sip an ta, rielin a deng hlum bak thil tlawmte inla neihai le rama thing hna la um sunhai chu fa ram vong an tih.
6. Nang le i thoktuhai le i mihai inah sip vong an ta, chuong ang chu i pi le pu huna hi ram in hluo nia inthoka an la tong ngai lo thil ning a tih' a tih" tiin an hril a. Mosie chu a nghakir a, Faraw chu a suoksan ta a.
7. Faraw thoktuhai chun a kuomah, "Ieng chen top am hi pa hi ei ta dingin chang a'n chang ding a na? Hienghai hin LALPA an Pathien chu an chawibiek theina dingin infetir el rawh. Aigupta ram hi sukramin a um zo tah ti i la hriet naw a ni maw?" an ta.
8. Chuongchun, Mosie le Aron chu Faraw kuomah an hung thuoi nawk a, an kuomah, "Fe unla, LALPA in Pathien chu va chawibiek ro. Amiruokchu, tuhai am an na a fe ding chu?" a ta.
9. Mosie chun a don a, "LALPA kuoma kut hmang ding kan ni leiin kan rengin a chin a lien, kan naunu le naupahai le kan ran ruol po po leh feng kan tih" a ta.
10. Faraw chun, "Nunau le in ran ruol le ka'n fetir ding cheu a ni chun, LALPA Pathien chun umpui mol raw se cheu! Thil suol thaw tum in ni hlak chu a chieng bal sia le!
11. Chuong chu ni thei naw nih. In ngen tah angin, pasal po fe unla, LALPA chu va chawibiek ro" a ta. Mosie le Aron chu Faraw kuoma inthok chun an hnot suok a.
12. Chun, LALPA chun Mosie kuomah, "I kut kha Aigupta chungah phar rawh, a ram pheka khau honpui hung intam a, rielin a deng siet bak a rama thlai po po an fak ram vong theina dingin" a ta.
13. Chuongchun, Mosie'n a hmol chu Aigupta ram chunga chun a hang inlet a. LALPA chun sunnithlak le zankhawvarin chu rama chun sak thli a'n hrangtir a. A tuk zinga chun thliin khauhai chu a hung len lut hum hum a;
14. khauhai chun Aigupta an run a, a ram sung hmun tinah an fu a, an tam em em el a. Chuong ang lawma khau intam nasa chu a hmain hriet a la ni ngai naw a, hriet ni nawk ta ngai bok naw nih.
15. Hnuoi an tuom sip vong leiin a ram phekin a'n thim khup el a. Riel deng siet bak chu a rama thlai tinreng le thei ra po po chu an fak ram a, Aigupta ram chu thil inder hrim hrim hmu ding um loin a kol rit a.
16. Faraw chun inrang takin Mosie le Aron chu a'n kotir a, an kuomah, "LALPA in Pathien le nangni lakah thil suol ka thaw a.
17. Tu hin ka suolna hi mi ngaidam nawk hram inla, LALPA in Pathien kuomah hi hripui tium hi la hmang dingin mi ngenpek ro" a ta.
18. Mosie chun Faraw chu a fesan a, LALPA kuomah a tongtai a.
19. LALPA chun sak thli chu thlang thlipui hrat takin a'n changtir a, khauhai chu Tuipui Senah a len lut vong a, Aigupta ramah khau hlek khat khom a maksan nawh.
20. Amiruokchu, LALPAN Faraw lungril chu a sukkhauh leiin Israelhai chu a'n suoktir phal chuong nawh.
21. Chun, LALPA chun Mosie kuomah, "Van tieng khin i kut hang phar rawh, Aigupta rama hin ieng lai khoma an la hriet ngai lo thimpui a hung inzir theina dingin" a ta.
22. Chuongchun, Mosie chun van tieng kut a hang phar a, ni thum sung zet Aigupta ram chu thimpuiin a'n khum a.
23. Tu khom an inhmu thei naw a, mani umna hmuna inthokin ni thum sung chu an invak suok thei bok nawh. Israelhai umna ruok chu a var vong thung a.
24. Faraw chun Mosie chu a'n kotir a, a kuomah, "Fe unla, LALPA in Pathien chu va chawibiek ro. Nunau khom an rengin thuoi unla, in ran ruolhai ruok chu maksan ro" a ta.
25. Mosie chun, "LALPA kan Pathien kuoma kan inthawi theina dingin pumraw inthawinaa kan hmang dinghai chu chawi i mi phalpek ding annawm.
26. Kan ran ruolhai chu keini leh an fe ngei ding a na, an tin hlek khom maksan ni naw nih. LALPA kan Pathien kan chawibieknaah a then hi kan hmang a ngai a, a hmun kan tlung hma chun ieng thil am hmangin LALPA chu kan chawibiek ding ti kan hriet si nawh" a ta.
27. Faraw lungril chu LALPAN a sukkhau tlat leiin anni chu a'n suoktir phal chuong nawh.
28. Faraw chun Mosie kuomah, "Ka hmu phak loah fe hmang dai rawh! Ka hmaah hung inlang ta lo hrim hrim dingin fimkhur rawh. I hmel ka hmu nawk ni chu i thi ni ding ning a tih" a ta.
29. Mosie chun, "I ti ang tak chun ni raw se. I hmaah hung inlang nawk ta ngai naw ning" a ta.
←  Exodus (10/40)  →