←  Esther (9/10)  →
1. Judahai chunga lal thupekhai sukpuitling ni dinga ruot, thla sawm le thla hnina, Adar thla, ni sawm le ni thumna ni chu a hung tlung a. Chu ni chun an hmelmahaiin Judahai chu rawt chimit vong an inbeisei a, sienkhom a letling daiin thil a hung inher ta lem a.
2. Lal Zarzia ram bung hrang hranga cheng Judahai chu anni chunga kut thlak theitu laka inveng him dingin khawpuia hai chun an tlan khawm a, tu khom a ngam an um naw a, mi po poin an ti ta lem a.
3. Ram bung tina mi lien hai, ram optu hai le thoktuhai chun Mordekai chu an ti leiin Judahai chu an thangpui a.
4. Mordekai chu lal ina chun ngirhmun insang taka hlangkai a ni leiin ram bung tinah a hming a'n thang a, a hung ropui ta deu deu a.
5. Ni ruot ni a hung tlung chun Judahai chu an nuom ang angin an che a, an hmelmahai chu kawlhnamin an sam a, an that a, an sukbohmang a.
6. Susa kul sunga ringot khom mi zanga an that a.
7. Anni hmelmatu an thathai lai chun Parsandatha hai, Dalfon hai, Aspatha hai,
8. Poratha hai, Adalia hai, Aridatha hai,
9. Parmasta hai, Arisai hai, Aridai hai, Vaizatha hai le
10. Hamedatha naupa Haman naupahai sawm an thang sa a, sienkhom rallak sum ruok chu an lak nawh.
11. Chu ni zan tieng chun Susa kul sunga mi an that zat chu lal kuomah an hril a.
12. Lal chun Lalnu Esther a ko a, "Judahaiin Susa kula ringot khom mi zanga an that a, Haman naupahai sawm an that vong bok a. Hi hmuna hman chuong ang a ni chun, ram bung hrang hranga lem chu an chet nasat dan ding chu hril loa hmang a nih. Tu hin dit dang i nei chun mi hni rawh, peng ka ti che. I hni taphot chu pek ning a tih" a ta.
13. Esther chun, "Lalin rem a ti chun, Susaa Judahai hin voi suna ang bok hin a zingah la thaw hai sien la, Haman naupa sawmhai ruong chu khaihlumnaa chun khai kang ni sien" a ta.
14. Lal chun chuong ang taka thaw dingin thupek a'n suo a, Haman naupa sawmhai chu an khai kang a.
15. Chun, Adar thla ni sawm le ni lia chun Susaa Judahai chu an pung khawm nawk a, an hmelmahai mi zathum an that bel a, rallak sum ruok chu an lak nawh.
16. A ram sunga Judahai po po khom chu an pung khawm a, insanhim dingin thang an khaw a, an hmelmahai chu mi singsari le sangnga an that a, sienkhom rallak sum ruok chu an lak nawh.
17. Chuong ang chun a ram pumpuiah Adar thla ni sawm le ni thuma chun an thaw a, a zinga chun hnena lawmin hlim takin ruoi an the a.
18. Susaa mihai ruok chun a ni hninaa chun an hmelmahai chu an la that a, a ni thumnaa chun an chawl a, lawmna ruoi an siem a.
19. Chu lei chun, thingtlang khuoa um Judahai chun hi ni hni sung hin hlim taka ruoi thein umni an kham a, fak ding inpek tonna niah an hung hmang ta pei a nih.
20. Chuong ang thil tlunghai chu Mordekai chun a ziek thlak a, Lal Zarzia lalram bung tina a hla le hnaia um Juda mihai kuoma chun a thon dar a,
21. hi ni hnihai hi kum tina inser hlak dingin thu a'n cha a.
22. Hieng ni hnihai hi an hmelmahai laka ralmuonga an hung um tak ni, an lungngaina chu lawmnaah inchang a, an tapna chu innuinaa a hung inchang ni a ni leiin, hlim taka ruoihai the a, mi retheihai kuoma thilpek nia hmang dingin thu a pek a nih.
23. Chuongchun, an lo thaw tan tah ang le Mordekaiin lekhathona a hril ang chun kum tina inser zom pei dingin Judahai chun an remti a.
24. Judahai hmelma Agag mi Hamedatha naupa Haman chun Judahai chu a sukbohmang hun ding ni le thla remchang zongin thum a vawr a, chu thum vawra aisan chu 'purim' an tih.
25. Amiruokchu, a thil phierruk chu lalin a hung hriet phing leh lal chun thupek letling insuoin, Judahai chunga a thil phierruk chu Haman chungah a'n tlaktir a, ama le a nauhai chu thingah an khai ta lem a.
26. An chunga thil tlung lei le Mordekai lekha insuo lei chun chu kut chu Purim, Aien Kut an hung ti tah a nih.
27. Anni le an thlahai pei khomin, Mordekai lekha insuo angin, hi ni hnihai hi kum tin a ram pumah umni khama a hun taka mathei loa inser zie dingin Judahai chun an intiem a.
28. A ram sung biel tin le khaw tina sungkuo tinin hi ni hi hre zinga inserin, an thlahai le an suon la hung um peihai kuoma khom an inhlan sawng pei ding a nih. Hieng nihai hi tawp loin Judahaiin an inser ding a na, an thlahai khomin hieng nia an chunga thil tlunghai chu an theinghil ngai ding a ni nawh.
29. Chuongchun, Abihail naunu Lalnu Esther le Juda mi Mordekai hai inkop chun lekha an thon bok a, chu taka chun Lalnu Esther-in Aien Kut hmang dan ding thua Mordekai thupek chu a namnghet a.
30. Chu baka chun, Lal Zarzia lalram ram bung za le sawmhni le pasaria Juda mi chenghai po po kuomah him tak le thlamuong taka an um an ditpuina thu lekha an thon bok a.
31. Hieng lekhahai hin Juda mi Mordekai le Lalnu Esther thupek anga kum tina a hun taka Aien Kut chu hmang ding a ni thu a namnghet a. Mipuiin anni ta ding le an thlahai ta dinga bu ngheia sunna ni an lo ruot ang bokin hi kut hi inser dinga mipuiin an lo ruot a nih.
32. Aien Kut hmang dan ding chungchang thu chu Esther thupek insuoin a namnghet a, chu chu lekhabua ziek a nih.
←  Esther (9/10)  →