←  Esther (8/10)  →
1. Chu ni chun Judahai hmelma Haman in chu Lal Zarzia chun lalnu Esther a pek a. Chun, Mordekai chu lal hmaah a hung a, Esther chun sung khat an ni thu chu a lo hril ta a.
2. Lal chun Haman kuta inthoka a lakpek, lal suoi namna kutsebi chu a phawi a, Mordekai a pek a. Esther chun Mordekai chu Haman in le lo chunga hotuah a sie a.
3. Chun, Esther chu mitthli tla puma lal ke bula bokin, Judahai laka thil tha lo Agag mi Hamanin a lo remruot chu sukbo dingin lal kuoma chun a ngen a.
4. Lal chun a rangkachak hmol chu Esther tieng chun a lek phei a, Esther chu a tho a, lal hmaa chun a ngir a.
5. Lal kuoma chun, "Lalin tha a ti zawng a ni a, a mit ka tlung a, ka chungah a lung a awi chun, Agag mi Hamedatha naupa Haman remruota Judahai suksietna dinga lekha, lal rama biel po poa thon dara um chu thaw ta lo dinga hrilna lekha ziek ni thei sien ti ka ngen a nih.
6. Ka chipuihai chunga sietna hung tlung ka hmu chu iengtin am tuor zo lul ka ta? Ka sungkuohai sukmanga an um chu iengtin am ka tuor zo ding?" a ta.
7. Lal Zarzia chun Lalnu Esther le Juda mi Mordekai kuomah, "Hamanin Judahai chungah kut a thlak leiin Haman in le lo chu Esther kuomah ka pek a, ama khom ka'n khaihlumtir ta a.
8. Judahai kuoma lal hminga thon ding i dit dan ang takin ziek la, lal suoi namin char rawh. Lal hminga ziek le lal kutsebia suoi nam le char ta chu sukdanglam thei a ni nawh" a ta.
9. Chuongchun, chu ni la la, thla thumna, Sivan thla, ni sawmhni le pathumnaa chun lal lekha ziektuhai chu Mordekai chun a ko a, a thupek ang chun Judahai kuoma dam, hotuhai kuoma dam, India rama inthoka Ethiopia ram chena biel hrang hrang za le sawmhni le pasaria ram optuhai le mi lienhai kuoma thon ding ram bung tina chenghai tong le hawropin lekha an buotsai a.
10. Chu lekha chu Lal Zarzia hminga ziek a ni a, lal kutsebi suoi an nam a, lekha chu sakor an inphurtir a, ama vai ngat sakor lien le hrat chi chunga chuongin an tlanpui a.
11. Chu lekhaa chun lal chun khaw tina um Juda mihai chu pungkhawma lo inveng him dingin a ti a. Khaw lai rama mi khom anni bei dinga hung inthok taphot chu lo bei let a, nu le nauhai khom suom a, an thil neihai rok a phalpek a.
12. Lal Zarzia lalrama ram bung po po sungah chu thupek chu Judahai that ni dinga ruot, thla sawm le thla hnina, Adar thla, ni sawm le ni thumna nia hmang ding a nih.
13. Chu nia hmelmahai chunga phuba an lak theina dinga inpei sa diema Judahai chu an lo um theina dingin ram bung tina chun thon dar a, mi po po kuoma puong dinga ti a nih.
14. Chuongchun, lal thupek angin, lal dak thaktuhai chun lal sakor lien le hrat chiah chuongin inhmaw takin an tlanpui a. Susa kul sunga khom lal thupek chu an puong dar a.
15. Mordekai chun lal thuom, a dumpawl le a var inbelin, rangkachak lallukhum ropui tak a khum a, pat zai inhmia khawng korfuol senduk hakin lal ina inthok chun a hung suok a, Susa khawpuia mihai chun hlim takin lawmna an siem a.
16. Judahai ta ding chun hlimna le lawmna ni, chawimawia an um ni, ni hlimum a nih.
17. Lal thupek a tlungna ram bung le khawpuia um Juda mi taphot chun hlim takin lawmna ruoi an the a, umni an kham a. Chuong ramhaia mi tam tak chu Juda-ah an inlet pha a, Judahai tina chun a man tawl si a.
←  Esther (8/10)  →