←  Esther (7/10)  →
1. Chuongchun, lal le Haman chu Lalnu Esther ruoi buotsai chu kil dingin an fe a.
2. Ni hninaa uoiin an dawn lai chun lalin Esther kuomah, "Lalnu Esther, iem a na i dit chu? Pek ni ngei i tih. Ram zatve hiel khom pek ning i tih" a ti nawk a.
3. Esther chun, "Lal mit ka tlung a, lal remti zawng a ni chun, ka hringna le ka mihai hringna mi hlapek hram dingin ka hni che a nih.
4. Kei le ka chipuihai chu that a, suom a, sukbohmang vong dinga zor hmang kan ni ta a. A nuhmei a pasalin bawia zor hmang vong ding ti ringot ni inlang chu, lal meu hang sukbuoina tham a tling naw leiin, ieng khom hril naw ning" a ta.
5. Lal Zarzia chun, "Chuong ang thil chu tuin am a thaw ding a na? Chuong ang thil thaw ngamtu chu khaw lai mi am a na?" a ta.
6. Esther chun, "Mi dotu le hmelmatu chu hi mi rilo Haman hi a nih" a ta. Chuongchun, lalnu le lalpa hmaa chun Haman chu tiin a hmel a dang a.
7. A uoiin dawn lai chu maksanin lal chu lungsen takin a tho a, lal huonah a lut a. Haman chun a chungah lalin thil tha lo thaw a tum nia a hriet leiin lalnu Esther kuoma chun a hringna hlapek dingin a ngen a.
8. Huona inthoka ruoi kilna pindana lal a hung kir lai chun Haman beidong chu Esther inthungna thungpha chunga chun a tlu a. "Hi lal ina ka bula lalnu a um lai zing khom hin suol lui a tum a ni hiel awm de!" a ti nghur a. Chuonga lal a tong phing leh Haman hmai chu an inkhum a.
9. Lal pindan vengtu mi tilrehai laia pakhat, lal rongbawltu Harbona chun, "Ngai ta u, lal ta dinga thu tha hriltu Mordekai khaihlumna dingin Hamanin a inah meter sawmhni pahni le a chenvea insang inkhaihlumna a siem sa diem a um" a ta. Lal chun, "Chu taka chun ama hi khai hlum ro" a ta.
10. Chuongchun, Mordekai khaihlumna dinga a buotsaia chun Haman chu an khai hlum a, lal lungsen chu a hung dei ta a.
←  Esther (7/10)  →