←  Esther (6/10)  →
1. Chu zan chun lal chu a in thei naw leiin lal chanchin ziekna bu hung la dingin thu a pek a, a hmaa chun an tiem a.
2. Kotkhar vengtu pahnih, Bigthana le Teres haiin Lal Zarzia that tuma an phier thu Mordekaiin lal kuoma a'n hriettir thu chu an hang hmu suok a.
3. Lal chun, "Hi thil lei hin Mordekaiin chawimawina le kaisangna ieng am a dong a?" a ta, lal rongbawltuhai chun, "Ieng khom thawpek a ni nawh" an ta.
4. Lal chun, "Tu am a na, kot puoa um saw?" a ta. Chuong lai tak chun Haman chu khaihlumna a siema Mordekai khai hlum phalna chu lal hni dinga a pindan kota hung a nih.
5. A siehlawhai chun, "Kot puoa ngir saw Haman a nih" an ta, lal chun "Hung inluttir ro" a ta.
6. Haman a hung lut chun lalin, "Lalin chawimawi a nuom mi chu ieng am thawpek inla tha'ng a ta?" a ta. Haman chun, "Keima neka lalin a chawimawi nuom chu tu am an um ding a na?" a ti lungril a.
7. Chuongchun, lal kuomah, "Lalin a chawimawi nuom chu hieng ang hin thaw sien a tha ka ring:
8. lal inbel hlak lal thuom hai, a chuongna hlak sakor hai, lalin a khum hlak lallukhum hai hung lapek hai sien,
9. lalin a chawimawi nuom inthuomna ding lal silfen le sakor chu lal hnuoia mi lienhai laia a lu lok tak kuomah inhlan ni sien, chawimawi ding chu inthuomtirin, sakor chungah inchuongtir sien, sakor chu keiin kotthler fangpui sien, 'Lalin a chawimawi nuom chunga chun hieng ang hin thaw a ni hlak'tiin puong pei raw se" a ta.
10. Lal chun Haman kuomah, "I hril ang chun lal puon le sakor chu va la vat la, lal in lutna kot bula inthung, Juda mi Mordekai chunga chun va thaw rawh. I hrilhai po po kha thaw thelh nei der naw rawh" a ta.
11. Chuongchun, Haman chun lal puon chu a lak a, sakor chu a kei a, Mordekai chu a'n thuomtir a, sakor chungah a'n chuongtir a, khawpui kotthlera chun a hmaa fein sakor chu a kei a, "Lalin a chawimawi nuom chunga chun hieng ang hin thaw a ni hlak" tiin a puong pei a.
12. Chu hnunga chun Mordekai chu lal in kota chun a hung kir nawk a, Haman ruok chu hmaimawk taka lu inkhumin, inhmaw takin a in tieng a'n lawi ve thung a.
13. Hamanin a nuhmei le a ruolhai kuomah a thil tuok a hril chun, "Sukhmaimawk tuma i bei Mordekai hi Juda mi a ni tlat a, i phierna hi hlawtling ngai naw ti nih. I kal zing chun sietpui i tih" an ta.
14. Chuonga an la tong zing lai chun lal pindan vengtu mi tilrehai chu an hung tlung a, lalnu buotsai ruoi kil dingin Haman chu an thuoi ta nghal a.
←  Esther (6/10)  →