←  Esther (5/10)  →
1. Ni thum hnunga chun Esther chun lalnu thuom inbelin lal inthungna pindan kotkhar zawna um lal in sunga chun a lut a, lal chu a lalthungphaah kotkhar tieng nghain a'n thung a.
2. Lal pindan tuol sunga lalnu Esther ngir lai chu a hmu a, a, a lawm lut a, ama tieng chun a rangkachak hmol chu a lek a, Esther chun a va hnai a, a hmor chu a tawk a.
3. Lal chun Esther kuomah, "Lalnu Esther, ieng am i dit a? Ka ram zatve hiel khom peng ka ti che" a ta.
4. Esther chun, "Lalin tha a ti zawng a ni chun, voisuna lal ta dinga ruoi ka buotsai hi kil dingin lal le Haman mi hungpek hram raw hai se" a ta.
5. Lal chun a siehlawhai kuomah, "Esther fielna ang chun Haman chu ruoi kil dingin hang ko vat ro" a ta. Chuongchun, lal le Haman chu Esther ruoi buotsai chu kil dingin an fe a.
6. Uoiin an dawn lai chun lalin Esther kuomah, "Iem a na i thil hni chu le? Pek ni ngei i tih. Ka ram zatve hiel khom pek ning i tih" a ta.
7. Esther chun, "Hi hi lungril taka ka hni chu a nih:
8. lalin ditsak tlakah a mi ngai a, ka thil hni chu lalin pek a remti zawng a ni chun, lal le Haman ta dinga zinga ruoi ka buotsai chu mi hung kil pek nawk hram raw hai se. Chu pha chun lal thil mi'n don chu iengkim hril ka tih" a ta.
9. Chu ni chun Haman chu hlim takin a suok a. Sienkhom, lal in kota ngir khom ngir ve lo le che chang loa lo inthung Mordekai a hmu chun a lung a chok a.
10. Amiruokchu, Haman chu a'n sum hram hram a, in tieng a'n lawi a, a ruolhai le a nuhmei Zeres chu a'n kotir nghal a.
11. Haman chun a hausakzie hai, nau a hauzie hai, lalin chawimawina a pekzie hai le a hnuoia thoktuhai po po chunga a'n kaisangtirzie hai chu uong takin a hril tawl a.
12. Hril zom peiin, "Chu chauh chu an le! Lalnu Estherin lal ta dinga ruoi a buotsai kil dinga mi dang a fiel sa chu keima chauh ka nih. Zinga khom hin lal leh ruoi kil dingin a mi fiel nawk a nih.
13. Nisienlakhom, lal in kota inthung, Juda pa Mordekai saw ka hmu sung chun hieng thil po po hin a mi suklungawi zo nawh" a ta.
14. A nuhmei Zeres le a ruolhai po po chun a kuomah, "Chuong a ni leh khaihlumna ding meter sawmhni pahni le a chenvea insang siem la, zingah zing tieng lal kuomah Mordekai chu inkhaihlumtir dingin va hni rawh. Chu hnungah zanbu kil dingin lal leh fe la, hlim takin um rawh," an ta. An thil rot chun Haman chu a suklawm a, khaihlumna ding chu a'n siemtir ta a.
←  Esther (5/10)  →