←  Esther (4/10)  →
1. Mordekaiin chuong thilhai po po a hriet chun a puon a pot thler a, saiip a sil a, pilvut a'n bur khum a, inring tak le lung na taka tapin kotthler a fang a.
2. Saiip sil puma lal tuol inhuonna sung lut chu phal a ni si naw leiin a kot bul chen chun a fe a.
3. Lal thupek a tlungna taphotah Judahai chu lungngaiin an kur a, bu ngheiin an tap inrum a, a thenin saiip an sil a, pilvut lai an intal a.
4. Mordekai chanchin chu a siehlaw nunghakhai le pindan vengtu mi tilrehai chun Esther chu an hril a, nasa takin a lungngai a. A saiip sil lai chu hlippek a, thuomhnaw inhaktir dingin silfen leh mi a tir a, sienkhom a lo lak nuom naw a.
5. Chu phing leh Esther chun lal pindan vengtu pakhat, ama vengtu dinga ruot, mi tilre Hathak chu a ko a, ieng leia lungngai am a na ti thil chinchang indon chieng dingin Mordekai kuoma chun a tir a.
6. Lal in kot tuolzawl lien taka chun Hathak chun Modekai chu a va hmu a.
7. Mordekai chun a chunga thil tlunghai le Judahai po po suksietna dinga Hamanin lal sum ina tangkaruo pek a tiem zathai khom chu a hril vong a.
8. Esther inentir dingin, Susaa an puong dar Judahai sukchimit vongna dinga lal thusuok kawpi chu Mordekai chun a lo pek a; chun, a kuomah thil chinchang hril fie ding le a mihai ta dinga zangaina hnipek dinga lal kuoma fe dinga Esther chu ngen dingin thu a'n cha bok a.
9. Hathak chun Modekai thu inchahai chu Esther kuomah a hril vong a.
10. Esther chun Mordekai kuoma hril ding thu a lo incha a:
11. "Lalin a ko ni loa lal pindan rila nuhmei amanih pasal amanih mi tu khom an lut chun that an ni ngei ding a nih ti dan um chu biel tina ram optuhai le mipuihai hriet seng a nih. Lalin a rangkachak hmol anni tienga a lekhai ruok chu sukhlum an ni naw chauh a nih. Lalin a mi kona kha ni sawmthum zet a ni tah" tiin.
12. Esther thucha chu Mordekai kuomah an va hril a.
13. Mordekai chun Esther kuomah mi a tir nawk nghal a, "Lal inah i um lei elin Juda mihai po po pumpel thei lo chu pumpel thei bik dingin inring naw rawh.
14. Hieng ang huna hin i to zing a ni chun, Judahai himna le sansuokna chu hmun danga inthokin a hung a ni khomin, nang le i pa sunghai chu bohmang tho an tih. Lalnu ngirhmun i lo chel hi hieng huna ding hin a ni naw am a ni?" tiin thu a'n cha a.
15. Esther chun Mordekai kuomah mi a tir nawk a,
16. "Fe la, Susaa Judahai po po ko khawm la, ka ta dingin bu lo nghei unla, ni thum le zan thum sung chu sun le zan ieng khom fain dawn naw unla, kei le ka nunghakhai khomin lo nghei veng kan tih. Chuong anga ei thaw hnung chun, danin phal naw sienkhom lal kuomah lut ka ta, ka bohmang leh ka bohmang ni raw se" tiin thu an cha a.
17. Mordekai chu a fe a, Esther thu incha ang tak chun iengkim a thaw a.
←  Esther (4/10)  →