Esther (1/10)  →
1. India rama inthoka Ethiopia chen inkar biel za le sawmhni le pasari chunga Lal Zarziaa inlal lai chun hi thil hi a hung tlung a.
2. Chuong lai chun Susa khawpuia a kula inthokin a lalram chu a op a.
3. A hung inlala inthoka kum thumnaa chun lal nauhai le thoktu poimawhai ta dingin ruoi a buotsai a, Media le Persia rama sipai ofisar lien po po le biel tina mi lienhai le thoktu poimawhai chu a fiel kim vong a.
4. A hausakzie le a lalram ropuizie chu inentirin, thla ruk sung zet chu chong an chen a.
5. Ruoi tumtiek zo chun Susaa a lal in huon kotzawla chun a siehlawhai le thoktuhai, a chin taka inthoka a lien tak chen ta dingin kar khat sung ruoipui lal chun a buotsai nawk a.
6. Kotzawl chu pat zai inhmia mawi taka khawng puon var le dumpawlin a chei a, chuonghai chu sailungvar bana a kei batna ding tangkaruo kuol an hlinga chun puon var le senduk hruiin an khai a. A tuolzawl tuonga chun sailungvar sen le var inpol dam, tuikeplung le lung man tam chi dam a pha a, chu chunga chun rangkachak le tangkaruoa siem thungna dup an rem khup a.
7. Chi hrang hranga siem rangkachak no mawi tak takin lal uoiin chu lal thupek angin ren der loin an sem a.
8. Tu khom pe lui loa mi tin mani du ang tawk senga tam indawntir dingin uoiin semtuhai chu lalin a hril a.
9. Lalnu Vashti khomin Lal Zarzia ina chun nuhmeihai ta dingin ruoi a the ve a.
10. A ni sari nia Lal Zarzia-in uoiin a'n rui deu hnung chun a rongbawltu mi tilre pasari Mehuman hai, Biztha hai, Harbona hai, Bigtha hai, Abagtha hai, Zethar hai le Karkas hai chu a ko a.
11. Lalnu Vashti hmel thatzie chu a mi lienhai inhmutir a nuom leiin, a lallukhum khuma a hmaa hung thuoi dingin anni rawi chu a tir a, lalnu hmel chu a tha hle si a.
12. A mi tirhai chun lal thupek chu an va hril a, sienkhom Lalnu Vashti chu a fe nuom naw a, lal chu namen loin a lungsen a.
13. Lal chun a thaw dan pangngaiin mi var, a hun laia thil chinchang le dan hre mihai chu rawn dingin a ko khawm a.
14. Chuonghai chu Persia le Media ram sunga a mi lien pasari Karsena hai, Sethar hai, Admatha hai, Tarsis hai, Meres hai, Marsena hai le Memukan hai an na, lal inhnaipui le a mi rawn takhai an nih.
15. Lal chun, "Pindan vengtu mi tilrehai tira a dan ang taka lalin hung dinga a kona chu lalnu Vashtiin a zawm naw leiin, dan angin a chungah iem ei thaw ding a na?" tiin a'n don a.
16. Memukan chun lal le a mi lienhai kuomah, "Lalnu Vashti hin lal chunga chauh poi a tawk naw a, a ram pumpuia mi lien po po le Lal Zarzia khuo le tuihai po po poi khom a tawk a nih.
17. Lalnu Vashti thilthaw hi a rama nuhmei po poin hung hrieng an ta, 'Lal Zarzia-in a kuoma hung dingin Lalnu Vashti thu a peka chu a fe nuom nawh' tiin hril sup sup an ta, an pasalhai hmusit phanain hmang an tih.
18. Voisuna Persia le Media rama mi lien nuhmei hunghai ngei khom hin, 'Lal Zarzia-in a nuhmei lalnu Vashti chu hung dingin thu a pek a, sienkhom a hungpek nuom nawh' ti an hriet charin ama thaw dan zuiin an pasalhai hmusit tum veng an ta, a ram pumah inzanawna le inhalnan chin tawk nei naw nih.
19. Chuleiin, lal remti zawng a ni chun, lalnu Vashti chu lal hmaa inlang thei ta lo dingin thupek, sut nawk thei ta lo, Persia le Media ram dan hmangin insuo sien ti hi kan thurawn pek nuom chu a nih. Chun, lalin ama aiin a neka tha lem lalnuah sie sien la.
20. A ram pumah lal thusuok puong dar a ni pha chun nuhmei tu khomin, a chin taka inthoka a lien tak chenin, an pasalhai thu hung poisa tang an tih" a ta.
21. Chu thurawn chun lal le a mi lienhai chu a suklawm hle a, Memukan hril ang takin lal chun a thaw a.
22. A lalram sung po po le biel tinah, a mi chenghai tong le hawrop chita ziekin, pasalin mani insung sengah thu an nei ding a nih ti lal thupek chu an thon dar ta chum chum a.
      Esther (1/10)  →